ପାଟନା: ମହିଳା ଫୁଟବଲ ଖେଳାଳିଙ୍କୁ ଦୁଷ୍କର୍ମ ଉଦ୍ୟମ । ବିହାରର ସିୱାନ ଜିଲ୍ଲାରୁ ସାମ୍ନାକୁ ଆସିଛି ଏପରି ଲଜ୍ଜା ଜନକ ଘଟଣା । ଏନେଇ ଖେଳାଳି ଜଣଙ୍କ ଜିଲ୍ଲାପାଳଙ୍କ ନିକଟରେ ପହଞ୍ଚି ଜଣେ ଯୁବକ ତାଙ୍କୁ ଦୁଷ୍କର୍ମ ଉଦ୍ୟମ କରିଥିବା ଅଭିଯୋଗ କରିଛନ୍ତି । ପୀଡିତା ଜଣଙ୍କ ମେରବା ପୋଲିସ ଷ୍ଟେସନ ଅଞ୍ଚଳର ହୋଇଥିବା ବେଳେ ଫୁଟବଲ ଖେଳରେ ଦେଶ ତଥା ବିଦେଶରେ ଅନେକ ଥର ପୁରସ୍କୃତ ହୋଇ ଦେଶକୁ ଗର୍ବିତ କରାଇଛନ୍ତି । ଏହି ଘଟଣାରେ ତଦନ୍ତ କରାଯାଇ ଯୁବକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି । ପୋଲିସ ଏହି ଘଟଣାରେ ତଦନ୍ତ ଜାରି ରଖିଛି । ମହିଳା ଫୁଟବଲ ଖେଳାଳି ଜଣଙ୍କ କହିଛନ୍ତି ଯେ, ସୋମବାର ସନ୍ଧ୍ୟାରେ ମୁଁ ଗାଁକୁ ବୁଲିବାକୁ ଯାଇଥିଲି ।
ଏହି ସମୟରେ ଜଣେ ଯୁବକ ମୋତେ ଟାଣି ନେଇ ଏକ ଖୋଲା ସ୍ଥାନକୁ ନେଇଯାଇଥିଲା । ଏହାପରେ ମୋତେ ଦୁଷ୍କର୍ମ ଉଦ୍ୟମ କରିଥିଲା । ମୁଁ ପାଟି କରିବାରୁ କରିବାରୁ ସେ ମୋତେ ଆକ୍ରମଣ କରିଥିଲା । ଏହାପରେ ସ୍ଥାନୀୟ ଲୋକେ ଆସୁଥିବା ଦେଖି ସେ ଘଟଣାସ୍ଥଳରୁ ଫେରାର ହୋଇଯାଇଥିଲା । ଏଥିସହ ମୋତେ ହତ୍ୟା କରିବାକୁ ଧମକ ମଧ୍ୟ ଦେଇଥିଲା । ପୀ଼ଡିତା ଜଣଙ୍କ ସିୱାନ ଜିଲ୍ଲାପାଳଙ୍କୁ ଲିଖିତ ଆକାରରେ ଅଭିଯୋଗ କରିଛନ୍ତି । ଏଥିସହ ଦୁଷ୍କର୍ମ ଉଦ୍ୟମ କରିଥିବା ଅଭିଯୁକ୍ତ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି । ସେ ଓଡିଶା ଓ ରାଜସ୍ଥାନରେ ମଧ୍ୟ ଖେଳିଛନ୍ତି । ବର୍ତ୍ତମାନ ଏହି ଖେଳାଳି ଜଣଙ୍କୁ ଦୁଷ୍କର୍ମ ଉଦ୍ୟମ ହୋଇଥିବା ଘଟଣା ସାମ୍ନାକୁ ଆସିବା ପରେ ପୋଲିସ ଘଟଣାର ତଦନ୍ତ କରୁଛି । ଯୁବକଙ୍କୁ ବର୍ତ୍ତମାନ ସୁଦ୍ଧା ଗିରଫ କରାଯାଇ ନାହିଁ । ଜଣେ ଅନ୍ତର୍ଜାତୀୟ ଖେଳାଳିଙ୍କୁ ଦୁଷ୍କର୍ମ ଉଦ୍ୟମ ଅତ୍ୟନ୍ତ ନିନ୍ଦନୀୟ ଘଟଣା । ଜଣେ ମହିଳା ଖେଳାଳି ଯଦି ସୁରକ୍ଷିତ ନୁହନ୍ତି ତେବେ ଜଣେ ସାଧାରଣ ମହିଳା ସମାଜରେ କିପରି ସୁରକ୍ଷିତ ରହିବ ସେନେଇ ସ୍ଥାନୀୟ ଲୋକେ ପ୍ରଶ୍ନ କରିଛନ୍ତି ।
