ଭଦ୍ରକ: ଧାମରା ପୋଷ୍ଟ ଅଫିସରେ କାର୍ଯ୍ୟରତ ପୋଷ୍ଟ ମାଷ୍ଟର ୨ଦିନ ହେବ ଗାଏବ ଅଛନ୍ତି ବୋଲି ତାଙ୍କ ପତ୍ନୀ ଧାମରା ଥାନାରେ ଏକ ଲିଖିତ ଅଭିଯୋଗ କରିଛନ୍ତି । ସତ୍ୟମ ସୁନ୍ଦରମ ମଙ୍ଗଳମ ଦାସ ଦୀର୍ଘ ଦିନ ହେବ ଧାମରା ସବ ପୋଷ୍ଟ ଅଫିସରେ କାର୍ଯ୍ୟରତ । ଗତ ଶନିବାର ଏବଂ ସୋମବାର ସେ ଏହି ପୋଷ୍ଟ ଅଫିସରେ ଥିବା ୧୫.୫ଲକ୍ଷ ଟଙ୍କା ଜମା ରାଶିକୁ ନେଇ ଭଦ୍ରକ ମୁଖ୍ୟ ପୋଷ୍ଟଅଫିସକୁ ଜମା କରିବାକୁ ଯାଇଥିଲେ । ସନ୍ଧ୍ୟା ୫ଟା ସମୟରେ ସେ ଧାମରାରୁ ନିଜ ସ୍କୁଟି ଯୋଗେ ବାହାରିଥିବା ବେଳେ ଭଦ୍ରକ ମୁଖ୍ୟ ପୋଷ୍ଟମାଷ୍ଟର, ଧାମରା ସବ୍ ପୋଷ୍ଟମାଷ୍ଟରଙ୍କ ମୋବାଇଲକୁ ଟ୍ରାକ୍ କରି ଚାଲିଥିଲେ ।
ଭଦ୍ରକ ପର୍ଯ୍ୟନ୍ତ ସଂପୃକ୍ତ ସବ ପୋଷ୍ଟମାଷ୍ଟରଙ୍କ ମୋବାଇଲ ଟ୍ରାକ୍ ହେଉଥିବା ବେଳେ ମାର୍କୋଣାଠାରୁ ତାଙ୍କ ଫୋନ୍ ବନ୍ଦ ହୋଇଯାଇଥିଲା । ପରେ ଏନେଇ ଭଦ୍ରକ ମୁଖ୍ୟ ପୋଷ୍ଟ ମାଷ୍ଟର ଭଦ୍ରକ/ସିମୁଳିଆ ଥାନାରେ ଏକ ଲିଖିତ ଅଭିଯୋଗ କରିଥିବା ବେଳେ ଅନୂରୂପ ଭାବେ ଧାମରା ସବପୋଷ୍ଟ ମାଷ୍ଟରଙ୍କ ଧର୍ମପତ୍ନୀ ନିଜର ସ୍ୱାମୀ ନିଖୋଜ ଅଛନ୍ତି ବୋଲି ଧାମରା ଥାନାରେ ଲିଖିତ ଅଭିଯୋଗ କରିଛନ୍ତି । ଏନେଇ ଧାମରା ଥାନାରେ ଏକ ନିଖୋଜ ମାମଲା ରୁଜୁ ହୋଇଛି । ଏନେଇ ଧାମରା ଥାନାଧିକାରୀ ଧାମରା ସବପୋଷ୍ଟ ଅଫିସ ଆସି ତଦନ୍ତ କରି ଫେରିଯାଇଥିବା ବେଳେ ଆଗାମୀ ଦିନରେ ବିଭାଗୀୟ ଅଧିକାରୀ ଏନେଇ କ’ଣ କାର୍ଯ୍ୟାନୁଷ୍ଠାନ ନେବେ ତାହା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।
