ଲକ୍ଷ୍ନୌ: ଉତ୍ତର ପ୍ରଦେଶର ଏଟା ଜିଲ୍ଲାରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି । ଏଠାରେ ସ୍କୁଲ ଯାଉଥିବା ଜଣେ ଦଶମ ଶ୍ରେଣୀ ଛାତ୍ରୀଙ୍କୁ ଅପହରଣ କରିନେଇ କିଛି ଦୁର୍ବୃତ୍ତ ଗଣଦୁଷ୍କର୍ମ କରିଛନ୍ତି । ଏହାପରେ ଦୁର୍ବୃତ୍ତମାନେ ପୀଡ଼ିତାଙ୍କୁ ଏକ ବସ୍ ଷ୍ଟାଣ୍ଡ ନିକଟରେ ଫିଙ୍ଗି ଫେରାର ହୋଇଯାଇଛନ୍ତି । ଗୁରୁତର ଅବସ୍ଥାରେ ପୀଡ଼ିତାଙ୍କୁ ଉଦ୍ଧାର କରାଯାଇ ପାଖ ହସ୍ପିଟାଲରେ ଭର୍ତ୍ତି କରାଯାଇଛି । ସୂଚନା ଅନୁଯାୟୀ, ଦଶମ ଶ୍ରେଣୀର ଜଣେ ଛାତ୍ରୀ ସ୍କୁଲ ଯିବା ପାଇଁ ଘରୁ ବାହାରିଥିଲେ । ପୀଡ଼ିତାଙ୍କ ଅଭିଯୋଗ ଅନୁସାରେ, ରାସ୍ତାରେ କାର୍ରେ ୩ ଜଣ ଦୁର୍ବୃତ୍ତ ଆସି ତାଙ୍କୁ ଅପହରଣ କରି ନେଇଥିଲେ । ଏହାପରେ ତାଙ୍କୁ ଦିଲ୍ଲୀର ସଙ୍ଗମ ବିହାର ନେଇଯାଇଥିଲେ । ସେଠାରେ ସାରା ରାତି ତାଙ୍କ ସହିତ ଗଣଦୁଷ୍କର୍ମ କରିଥିଲେ ।
ପୀଡ଼ିତା ବିରୋଧ କରିବାରୁ ସେମାନେ ତାଙ୍କୁ ନିର୍ଯାତନା ଦେଇଥିଲେ । କେବଳ ଏତିକି ନୁହେଁ, ଏହାପରେ ଦୁର୍ବୃତ୍ତମାନେ ତାଙ୍କୁ ପରଦିନ ସକାଳେ ସେହି ଅବସ୍ଥାରେ ନିକଟସ୍ଥ ଏକ ବସ୍ ଷ୍ଟାଣ୍ଡ ପାଖରେ ଫିଙ୍ଗି ଦେଇ ଫେରାର ହୋଇଯାଇଥିଲେ । ଏଠାରୁ ଛାତ୍ରୀ ଜଣକ କୌଣସି ବି ପ୍ରକାରେ ବସ୍ରେ ବସି ଘରକୁ ଫେରିଥିଲେ । ତାଙ୍କ ପାଖରେ ଟିକେଟ୍ ପାଇଁ ପଇସା ନ ଥିଲା, ତେଣୁ ଯାତ୍ରୀମାନେ ପଇସା ଚାନ୍ଦା କରି ତାଙ୍କୁ ଟିକେଟ୍ ଦେଇଥିଲେ । ଏଟାରେ ପହଞ୍ଚିବା ପରେ ଛାତ୍ରୀ ଜଣକ ବେହୋସ୍ ହୋଇ ତଳେ ପଡ଼ିଯାଇଥିଲେ । ସେଠାରୁ କିଛି ଲୋକେ ତାଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରିଥିଲେ । ଛାତ୍ରୀଙ୍କ ଶରୀରରେ ଆଘାତ ଚିହ୍ନ ଦେଖିବାକୁ ମିଳିଛି । ଅନୁମାନ କରାଯାଉଛି କି, ତାଙ୍କୁ କୌଣସି ବି ପ୍ରକାରେ ନିର୍ଯାତନା ଦିଆଯାଇଛି । ପୋଲିସ ଏହି ମାମଲାର ତଦନ୍ତ କରୁଛି ।
