ପ୍ୟାରିସ: ଚଳିତ ଫ୍ରେଞ୍ଚ୍ ଓପନ୍ ଟୁର୍ଣ୍ଣାମେଣ୍ଟ୍ର ଚତୁର୍ଥ ରାଉଣ୍ଡ୍ରେ ପ୍ରବେଶ କରିଛନ୍ତି ଇଗା ସ୍ୱିଆଟେକ୍ ଓ ଆଣ୍ଡ୍ରେ ରୁବଲେଭ୍ । ପୋଲାଣ୍ଡ୍ର ଟପ୍ ସିଡ୍ ସ୍ୱିଆଟେକ୍ ମହିଳା ସିଙ୍ଗଲ୍ସରେ ତାଙ୍କ ତୃତୀୟ ରାଉଣ୍ଡ୍ ମୁକାବିଲାରେ ମଣ୍ଟେନେଗ୍ରୀନ୍ର ଡେଙ୍କା କୋଭିନିକ୍ଙ୍କୁ ୬-୩,୭-୫ରେ ହରାଇଥିବା ବେଳେ ପୁରୁଷ ସିଙ୍ଗଲ୍ସରେ ରୁଷିଆର ରୁବଲେଭ୍ ଚିଲିର କ୍ରିଷ୍ଟିଆନ୍ ଗାରିନ୍ଙ୍କୁ ୬-୪,୩-୬, ୬-୨,୭-୬(୧୩/୧୧)ରେ ହରାଇଛନ୍ତି । ଏଥିସହ ସ୍ୱିଆଟେକ୍ କ୍ରମାଗତ ଭାବେ ତାଙ୍କର ୩୧ତମ ବିଜୟ ହାସଲ କରିଛନ୍ତି । ସେହିପରି ପୁରୁଷ ସିଙ୍ଗଲ୍ସରେ ଅନ୍ୟ ଏକ ମ୍ୟାଚ୍ରେ ଏକାଦଶ ସିଡ୍ ଇଟାଲୀର ଜାନିକ୍ ସିନର୍ ଆମେରିକାର ମ୍ୟାକେଞ୍ଜି ମ୍ୟାକ୍ଡୋନାଲ୍ଡଙ୍କୁ ୬-୩,୭-୬(୮/୬), ୬-୩ରେ ହରାଇଛନ୍ତି । ଚତୁର୍ଥ ରାଉଣ୍ଡ୍ରେ ସେ ରୁବଲେଭ୍ଙ୍କୁ ଭେଟିବେ ।
ଆହୁରି ଦ୍ୱିତୀୟ ସିଡ୍ ରୁଷ୍ରିଆର ଡାନିଲ୍ ମେଡଭେଡେଭ୍ ସର୍ବିୟାର ମିଓମିର୍ କେକ୍ମାନୋଭିକ୍ଙ୍କୁ ୬-୨,୬-୪,୬-୨ରେ ହରାଇ ପ୍ରିକ୍ୱାର୍ଟର୍ ପର୍ଯ୍ୟାୟକୁ ଉନ୍ନୀତ ହୋଇଛନ୍ତି । ତା’ଛଡ଼ା ବିଂଶତମ ସିଡେଡ୍ କ୍ରୋଏସିଆର ମାରିନ୍ ସିଲିକ୍ ସ୍ଥାନୀୟ ଖେଳାଳି ଜାଇଲ୍ସ ସିମନ୍ଙ୍କୁ ୬-୦,୬-୩,୬-୨ରେ ହରାଇଛନ୍ତି । ପ୍ରିକ୍ୱାର୍ଟର୍ରେ ତାଙ୍କର ମୁକାବିଲା ମେଡଭେଡେଭ୍ଙ୍କ ସହ ହେବ । ସେହିପରି ମହିଳା ସିଙ୍ଗଲ୍ସରେ ଏକାଦଶ ସିଡେଡ୍ ଆମେରିକାର ଜେସିକା ପେଗୁଲା ସ୍ଲୋଭେନିଆର ଟାମାରା ଜିଡାନ୍ସେକ୍ଙ୍କୁ ୬-୦,୬-୩ରେ ହରାଇ ପ୍ରିକ୍ୱାର୍ଟର୍ ପର୍ଯ୍ୟାୟରେ ପହଞ୍ଚିଛନ୍ତି । ତେବେ ତୃତୀୟ ସିଡ୍ ସ୍ପେନ୍ର ପାଉଲା ବଡ଼ୋସା ରୁଷିଆର ୨୯ତମ ସିଡେଡ୍ ଭେରୋନିକା କୁଡେର୍ମେଟୋଭାଙ୍କ ବିପକ୍ଷରେ ୩-୬,୧-୨ରେ ପଛୁଆ ଥିବା ବେଳେ ଓହରିଯିବାରୁ କୁଡେର୍ମେଟୋଭା ପରବର୍ତ୍ତୀ ରାଉଣ୍ଡ୍କୁ ଉନ୍ନୀତ ହୋଇଛନ୍ତି । ତା’ଛଡ଼ା ଚୀନ୍ର କିନେନ୍ ଝେଙ୍ଗ୍ ସ୍ଥାନୀୟ ଖେଳାଳି ଆଲାଇଜ୍ କୋର୍ନେଟ୍ଙ୍କ ବିପକ୍ଷରେ ୬-୦,୩-୦ରେ ଆଗୁଆ ଥିବା ବେଳେ ୱାକ୍ଓଭର୍ ପାଇଛନ୍ତି ।
