ଆବୁଧାବି: ୟୁଏଇରେ ସଙ୍ଗୀନ ବନ୍ୟା ସ୍ଥିତି । ବନ୍ୟା ଜଳରେ ଉବୁଟୁବୁ ୟୁଏଇ । ରାସ୍ତାଘାଟ ପାଣିରେ ଧୋଇ ହୋଇଯାଇଥିବା ବେଳେ ଅନେକ ଦାମୀକାର ଭାସି ଯାଇଛି । ୟୁନାଇଟେଡ ଆରବ ଏମିରେଟ୍ସରେ ଗତ ଗୁରୁବାର ପ୍ରବଳ ବର୍ଷା ଯୋଗୁ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା । ଏଥିରେ ଅନେକ ଜନବସତି ବୁଡି ରହିଥିବା ବେଳେ ପାଖାପାଖି ୭ଜଣଙ୍କ ମୃତ୍ୟୁ ହୋଇଥିବା ନେଇ ସୂଚନା ରହିଛି । ଏନେଇ ଗତକାଲି ସୂଚନା ଦେଇଛନ୍ତି ୟୁଏଇର ଗୃହମନ୍ତ୍ରୀ । ବିଶେଷ ଭାବେ ବନ୍ୟାରେ ଶରଜାହା ଓ ଫୁଜେରିଆ ଅଞ୍ଚଳ ଅଧିକ କ୍ଷତିଗ୍ରସ୍ତ ହୋଇଛି ।
ବନ୍ୟା ପାଣି ଘରେ ପସିବା ଫଳରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି । ଏଠାରେ ସରକାର ତରଫରୁ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । ଶରଜାହ ଓ ଫୁଜେରିୟାରେ ୩,୮୯୭ ଲୋକଙ୍କୁ ଉଦ୍ଧାର କରାଯାଇ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ଅନେକ ଗାଡି ମଧ୍ୟ ପାଣିରେ ଭାସୁଥିବା ଦେଖାଦେଇଛି । ଅନେକ ସ୍ଥାନକୁ ଯୋଗାଯୋଗ ମଧ୍ୟ ବିଚ୍ଛିନ୍ନ ହୋଇଛି । ସେହିପରି ଦୁବାଇ ଓ ଆବୁଧାବିରେ ମଧ୍ୟ ଅନେକ ଲୋକଙ୍କୁ ଉଦ୍ଧାର କରାଯାଇ ସୁରକ୍ଷିତ ସ୍ଥାନକୁ ନିଆଯାଇଛି ।
