ନୂଆପଡ଼ାରେ କରେଣ୍ଟ ଲାଗି ୨ ବର୍ଷର ଶିଶୁର ମୃତ୍ୟୁ

ନୂଆପଡ଼ା: ନୂଆପଡ଼ା ଜିଲ୍ଲାରେ ଏକ ଦୁଃଖଦ ଅଘଟଣ ଘଟିଛି । କେମନା ଥାନା ଅନ୍ତର୍ଗତ ଭେଲା ଛତ୍ରିଆପଡ଼ା ଗାଁରେ କରେଣ୍ଟ ଲାଗି ଦୁଇ ବର୍ଷର ଏକ ଶିଶୁପୁତ୍ରର ମୃତ୍ୟୁ ହୋଇଛି । ସୂଚନା ଅନୁଯାୟୀ, ଶିଶୁଟି ଘର ଭିତରେ ଖେଳୁଥିବା ସମୟରେ ହଠାତ୍ ଘରେ ପଡ଼ିଥିବା ବିଦ୍ୟୁତ ତାରକୁ ଧରିଦେଇଥିଲା । ଏହାରେ ତୀବ୍ର କରେଣ୍ଟ ଲାଗି ଶିଶୁଟି ଗୁରୁତର ଆହତ ହୋଇଥିଲା । ପରିବାର ଲୋକେ ତୁରନ୍ତ ତାଙ୍କୁ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲକୁ ନେଇଥିଲେ, କିନ୍ତୁ ଡାକ୍ତରମାନେ ଶିଶୁଟିକୁ ମୃତ ଘୋଷଣା କରିଥିଲେ । ଏହି ଅଘଟଣ ପରେ ସମଗ୍ର ଗାଁରେ ଶୋକର ଛାୟା ଖେଳିଯାଇଛି । ଗ୍ରାମବାସୀମାନେ ବିଦ୍ୟୁତ ତାରର ସୁରକ୍ଷା ବ୍ୟବସ୍ଥା ନେଇ ଗଭୀର ଚିନ୍ତା ପ୍ରକାଶ କରିଛନ୍ତି ଏବଂ ଏଭଳି ଅବହେଳା ପୁନରାବୃତ୍ତି ନ ହେବାକୁ ଦାବି କରିଛନ୍ତି ।