ନୂଆଦିଲ୍ଲୀ: ମାନସିକ ବିକାରଗ୍ରସ୍ତ ମହିଳାଙ୍କୁ ନିଜ କ୍ଲିନିକ୍ରେ ଦୁଷ୍କର୍ମ କରିବା ଅଭିଯୋଗରେ ଡାକ୍ତର ଗିରଫ । ମହାରାଷ୍ଟ୍ରର ଥାନେ ଜିଲ୍ଲାରେ ରବିବାର ଅପରାହ୍ନରେ ଏହି ଘଟଣା ଘଟିଛି । ଏନେଇ ଜଣେ ଅଧିକାରୀ କହିଛନ୍ତି ଯେ, ଜିଲ୍ଲାର ବଦଲାପୁର ପଶ୍ଚିମାଞ୍ଚଳରେ ଏହି ଘଟଣା ଘଟିଛି । ପୀଡିତା ଜଣକ କିଛି ଜରୁରୀ ସାମଗ୍ରୀ ଆଣିବା ପାଇଁ ଘରୁ ବାହାରକୁ ବାହାରିଥିଲେ ଏବଂ ଡାକ୍ତରଙ୍କ କ୍ଲିନିକ୍ ପାଖରେ ଥିବା ଏକ ଦୋକାନକୁ ଯାଇଥିଲେ । ଏହାର ସୁଯୋଗ ନେଇ ଡାକ୍ତର ଜଣକ ତାଙ୍କୁ କ୍ଲିନିକ ଭିତରକୁ ଡାକିଥିଲେ ଏବଂ ବଳାତ୍କାର କରିଥିଲେ ।
ତେବେ ମହିଳା ଘରକୁ ଫେରିବାରେ ବିଳମ୍ବ କରିବାରୁ ପରିବାର ଲୋକେ ତାଙ୍କୁ ଖୋଜାଖୋଜି କରିଥିଲେ । ଏହି ସମୟରେ ଡାକ୍ତରଙ୍କ କ୍ଲିନିକ ସାମ୍ନାରେ ତାଙ୍କ ଜୋତା ରହିଥିବା ଦେଖିବାକୁ ମିଳିଥିଲା । ସନ୍ଦେହ ହେବାରୁ ପରିବାର ଲୋକେ କ୍ଲିନିକ ଭିତରକୁ ପ୍ରବେଶ କରିଥିଲେ ଏବଂ ଅଭିଯୁକ୍ତ ଡାକ୍ତରଙ୍କୁ କାବୁ କରି ପୋଲିସକୁ ହସ୍ତାନ୍ତର କରିଥିଲେ । ପୋଲିସ ଏହି ମାମଲାରେ ତଦନ୍ତ ଜାରି ରଖିଛି ।
