ଭୁବେନେଶ୍ୱର, : ଶିକ୍ଷା ଓ ଅନୁସନ୍ଧାନ (ସୋଆ) ପକ୍ଷରୁ ଦୁଇ ମାସ ବ୍ୟାପୀ ଅନ୍ଲାଇନ୍
ଯୋଗ ଶିବିରର ଅୟମାରମ୍ଭ ହୋଇଛି । କେନ୍ଦ୍ର ସରକାରଙ୍କ ପୋର୍ଟକଲ୍ ଆଧାରରେ ଏହି ଯୋଗ ଶିବିରକୁ
ଗୁରୁବାର ସକାଳ ୬ ଟାରେ ଆନୁଷ୍ଠାନିକ ଭାବେ ସୋଆ କୁଳପତି ପ୍ରଫେସର ଅଶୋକ କୁମାର ମହାପାତ୍ର
ଉଦ୍ଘାଟନ କରିଥିଲେ ।
ଏହି ଅବସରରେ ପ୍ରଫେସର ମହାପାତ୍ର କହିଥିଲେ ଯେ ଯୋଗ ଶାରୀରିକ, ମାନସିକ ଓ ଆଧ୍ୟାତ୍ମିକ
ସ୍ତରରେ ସୁସ୍ଥତା ଆଣିବା ପାଇଁ ଶରୀର ଓ ମନକୁ ଯୋଡିବାର ଏକ ମାର୍ଗ । ନିୟମିତ ଯୋଗ ଅଭ୍ୟାସ ବଳରେ
ଜଣେ ସାମଗ୍ରିକ ଭାବରେ ସୁସ୍ଥ ରହିପାରିବ । ଭାରତୀୟ ଦର୍ଶନଶାସ୍ତ ଭଗବତ ଗୀତାର ପ୍ରତ୍ୟେକ ଅଧ୍ୟାୟ ଏକ
ଯୋଗ । ତେଣୁ ଯୋଗଯୁକ୍ତ ହୋଇ ଗୀତାର ଅଧ୍ୟୟନ କରିବା ଉଚିତ୍ ବୋଲି ସେ କହିଥିଲେ ।
ସୋଆର ଆଉଟରିଚି୍ ନିର୍ଦ୍ଦେଶକ ପ୍ରଫେସର ନଚିକେତା କେ. ଶର୍ମା ଏହି ଯୋଗ ଶିବିରରେ ଯୋଗ
ଦେଇଥିବା ଅତିଥିମାନଙ୍କ ପରିଚୟ ଦେବା ସହ ଦୁଇ ମାସ ଧରି ଯୋଗ କାର୍ଯ୍ୟକ୍ରମ ଏବଂ ତାହାର ନିୟମାବଳୀ
ବିଷୟରେ ସୂଚନା ଦେଇଥିଲେ । ଏହି କାର୍ଯ୍ୟକ୍ରମରେ ସୋଆର ଯୋଗ ଶିକ୍ଷକ ଶ୍ରୀ ଅଖିଳ ଚନ୍ଦ୍ର ରଣା
ମଙ୍ଗଳାଚରଣ କରିବା ସହ ଯୋଗାଭ୍ୟାସ କରାଇଥିବା ବେଳେ ଏନ୍ଏସ୍ଏସ୍ ପ୍ରୋଗ୍ରାମ୍ ଅଫିସର ଡା. ସରୋଜ
କୁମାର ମହାନ୍ତି ଧନ୍ୟବାଦ ଅର୍ପଣ କରିଥିଲେ ।
ଏହି ଅବସରରେ ଇନ୍ଷ୍ଟିଚ୍ୟୁଟ୍ ଅଫ୍ ଏଗ୍ରିକଲ୍ଚରାଲ୍ ସାଇନ୍ସେସ୍ର ଡିନ୍ ପ୍ରଫେସର ବିଜୟ କୁମାର
ସାହୁ, ଭେଟେନାରୀ ଡିନ୍ ପ୍ରଫେସର ବ୍ରହ୍ମଦେବ ପଟ୍ଟନାୟକ ଏବଂ ଏନ୍ଏସ୍ଏସ୍ ପ୍ରୋଗ୍ରାମ ଅଫିସର ଡକ୍ଟର କମଳ
ଲୋଚନ ମହାନ୍ତ, ଡକ୍ଟର ରାଜାରାମ ମହାପାତ୍ର, ଡକ୍ଟର ସତ୍ୟନାରାୟଣ ଶତପଥୀ, ଡକ୍ଟର ଶାନ୍ତିଲତା ଚମ୍ପତି,
ଡକ୍ଟର ପି.ଜି.ଆର୍ ଆଚାରୀ ଓ ରାକେଶ ରୋଶନ୍ ଶତପଥୀ ପ୍ରମୁଖ ଅଂଶ ଗ୍ରହଣ କରିଥିଲେ । ପ୍ରାୟ ୧୫ ଜଣ
ଆନ୍ତର୍ଜାତିକ ଛାତ୍ରଛାତ୍ରୀ ଓ ୫୦ ରୁ ଅଧିକ ଏନ୍ଏସ୍ଏସ୍ ସ୍ୱେଚ୍ଛାସେବୀ ଏହି ଶିବିରରେ ଯୋଗ ଦେଇଥିଲେ ।
ସୋଆରେ ଆରମ୍ଭ ହେଲା ଦୁଇ ମାସ ବ୍ୟାପୀ ଅନ୍ଲାଇନ୍ ଯୋଗ ଶିବିର
