ଭୋପାଳ: ଟ୍ରେନ୍ରେ ଯାତ୍ରା କରୁଥିବା କରୁଥିବା ଜନୈକା ମହିଳାଙ୍କ ସହ କେତେକ ଦୁର୍ବୃତ୍ତ ଅସଦାଚାଣ କରିବାକୁ ଉଦ୍ୟମ କରିଥିଲେ । ତେବେ, ମହିଳା ଜଣକ ଏହାର ପ୍ରତିବାଦ କରିବାରୁ ଦୁର୍ବୃତ୍ତମାନେ ତାଙ୍କୁ ଚଳନ୍ତା ଟ୍ରେନରୁ ଠେଲି ଦେଇଥିବା ଅଭିଯୋଗ ହୋଇଛି । ସୂଚନା ଅନୁଯାୟୀ, ଉତ୍ତରପ୍ରଦେଶର ଜଣେ ୨୫ ବର୍ଷୀୟା ମହିଳାଙ୍କ ଟ୍ରେନ୍ରେ ଯାତ୍ରା କରୁଥିବା ବେଳେ ମଧ୍ୟପ୍ରଦେଶ ଛତ୍ରପୁର ଜିଲ୍ଲାର ଖଜୁରାହୋ ନିକଟରେ େତେକ ଦୁର୍ବୃତ୍ତ ତାଙ୍କ ସହ ଅସଦାଚରଣ କରିବାକୁ ଆରମ୍ଭ କରିଥିଲେ । ତେବେ, ମହିଳା ଜଣକ ଏହାର ପ୍ରତିରୋଧ କରିବାରୁ ଜଣେ ଦୁର୍ବୃତ୍ତ ତାଙ୍କୁ ଚଳନ୍ତା ଟ୍ରେନ୍ରୁ ତଳକୁ ଠେଲି ଦେଇଥିଲେ । ଏହି ଘଟଣାରେ ଗୁରୁତର ଆହତ ମହିଳାଙ୍କୁ ଏବେ ଛତ୍ରପୁରର ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇ ତାଙ୍କର ଚିକିତ୍ସା କରାଯାଉଛି ।
ଜବଲପୁରର ସରକାରୀ ରେଳ ପୁଲିସ (ଜିଆରପି) ଆରକ୍ଷୀ ଅଧୀକ୍ଷକ (ଏସପି) ବିନାୟକ ବର୍ମା ଗଣମାଧ୍ୟମକୁ କହିଛନ୍ତି, ଜଣେ ପୁରୁଷ ସହ-ଯାତ୍ରୀଙ୍କ ଅସଦାଚରଣ ଉଦ୍ୟମକୁ ବିରୋଧ କରିବା ପରେ ମହିଳାଙ୍କୁ ସେ ଚଳନ୍ତା ଟ୍ରେନରୁ ଠେଲି ଦେଇଥିବା ଅଭିଯୋଗ ହୋଇଛି । ସେ କହିଛନ୍ତି ଯେ ଏପ୍ରିଲ ୨୭ ରାତିରେ ଖଜୁରାହୋ (ମଧ୍ୟପ୍ରଦେଶ) ଏବଂ ମହୌବା (ଉତ୍ତରପ୍ରଦେଶ) ଷ୍ଟେସନ ମଧ୍ୟରେ ଏକ ଯାତ୍ରୀବାହୀ ଟ୍ରେନରେ ଏହି ଘଟଣା ଘଟିଛି । ଅଭିଯୁକ୍ତଙ୍କୁ ଚିହ୍ନଟ କରାଯାଇଛି ଏବଂ ପୁଲିସ ତାଙ୍କୁ ଗିରଫ କରିବାକୁ ଉଦ୍ୟମ ଆରମ୍ଭ କରିଛି ବୋଲି ବର୍ମା କହିଛନ୍ତି ।
ବର୍ତ୍ତମାନ ଛତ୍ରପୁରରେ ଚିକିତ୍ସିତ ହେଉଥିବା ପୀଡ଼ିତା ମହିଳା କହିଛନ୍ତି ଯେ ଖଜୁରାହୋ ନିକଟସ୍ଥ ରାଜନଗର ସହର ନିକଟରେ ଏହି ଘଟଣା ଘଟିଥିଲା । ସେ କହିଛନ୍ତି, ‘ମୁଁ ବାଗେଶ୍ୱର ଧାମ (ଛତ୍ରପୁର)ର ମନ୍ଦିରକୁ ଆସିଥିଲି । ଜଣେ ସହ-ଯାତ୍ରୀ ମୋତେ ଅସଦାଚରଣ କରିବା ଆରମ୍ଭ କରିଥିଲେ । ମୁଁ ଏହାର ପ୍ରତିରୋଧ କରିଥିଲି ଏବଂ ତାଙ୍କୁ ଦୂରରେ ରହିବାକୁ କହିଥିଲି । ନିଜକୁ ବଞ୍ଚାଇବା ପାଇଁ ମୁଁ ତାଙ୍କୁ ହାତକୁ କାମୁଡି ଦେଇଥିଲି । ପ୍ରାୟ ୩୦ ବର୍ଷ ବୟସର ଏହି ବ୍ୟକ୍ତି ପରେ ମୋତେ ରାଜନଗର ନିକଟରେ ଚଳନ୍ତା ଟ୍ରେନରୁ ତଳକୁ ଠେଲି ଦେଇଥିଲେ’ ବୋଲି ପୀଡିତା କହିଛନ୍ତି ।
