ମୁମ୍ବାଇ: ମହାରାଷ୍ଟ୍ର ବିଧାନସଭା ନିର୍ବାଚନରେ ଭୋଟିଂ ଏବଂ ଗଣନା ପ୍ରକ୍ରିୟାରେ ବ୍ୟାପକ ଅନିୟମିତତା ଅଭିଯୋଗ କରିଆସୁଛି ବିରୋଧୀ କଂଗ୍ରେସ। ତେବେ କଂଗ୍ରେସ ଏନେଇ ଶୁକ୍ରବାର ଦିନ ନିର୍ବାଚନ ଆୟୋଗଙ୍କୁ ଏକ ଚିଠି ଲେଖିଛି। ଏହି ପ୍ରସଙ୍ଗରେ କଂଗ୍ରେସ ବ୍ୟକ୍ତିଗତ ଶୁଣାଣି କରିବାକୁ ମଧ୍ୟ ଦାବି କରିଛି। ଦଳ ଅଭିଯୋଗ କରିଛି ଯେ ଭୋଟରଙ୍କୁ ମନଇଚ୍ଛା ଭୋଟର ତାଲିକାରୁ ହଟାଇ ଦିଆଯାଇଛି ଏବଂ ପ୍ରତ୍ୟେକ ବିଧାନସଭା କ୍ଷେତ୍ରରେ ୧୦,୦୦୦ରୁ ଅଧିକ ଭୋଟରଙ୍କୁ ସାମିଲ କରାଯାଇଛି।
ଦଳ ଏହା ମଧ୍ୟ କହିଛି ଯେ ମହାରାଷ୍ଟ୍ରର ଭୋଟର ତଥ୍ୟକୁ ନେଇ ପୂର୍ବତନ ମୁଖ୍ୟ ନିର୍ବାଚନ କମିଶନର ମଧ୍ୟ ପ୍ରଶ୍ନ କରିଛନ୍ତି। କଂଗ୍ରେସ ନିଜ ଚିଠିରେ ଉଲ୍ଲେଖ କରିଛି ଯେ, ମନମୁଖୀ ହଟାଇବା ଏବଂ ଯୋଡିବାର ଏହି ପ୍ରକ୍ରିୟା ଯୋଗୁ ଜୁଲାଇ ୨୦୨୪ରୁ ନଭେମ୍ବର ୨୦୨୪ ମଧ୍ୟରେ ମହାରାଷ୍ଟ୍ରର ଭୋଟର ତାଲିକାରେ ପ୍ରାୟ ୪୭ ଲକ୍ଷ ନୂତନ ଭୋଟରଙ୍କୁ ଅନ୍ତର୍ଭୁକ୍ତ କରାଯାଇଥିଲା। ଦଳ ଦାବି କରିଛି ଯେ ୫୦ଟି ବିଧାନସଭା ନିର୍ବାଚନମଣ୍ଡଳୀ ମଧ୍ୟରୁ ଯେଉଁଠାରେ ହାରାହାରି ୫୦,୦୦୦ ନୂତନ ଭୋଟର ଯୋଡିହୋଇଛନ୍ତି, ସେଥିମଧ୍ୟରୁ ୪୭ଟି ଆସନରେ ଶାସକ ଗଠବନ୍ଧନ ଏବଂ ଏହାର ସହଯୋଗୀମାନେ ବିଜୟୀ ହୋଇଛନ୍ତି।
କଂଗ୍ରେସ ନିର୍ବାଚନ କମିଶନଙ୍କ ଦ୍ୱାରା ପ୍ରକାଶିତ ତଥ୍ୟକୁ ନେଇ ମଧ୍ୟ ପ୍ରଶ୍ନ ଉଠାଇଛି। ଦଳ କହିଛି ଯେ ୨୧ ନଭେମ୍ବର, ୨୦୨୪ ଅପରାହ୍ନ ୫ଟା ସୁଦ୍ଧା ମହାରାଷ୍ଟ୍ରରେ ୫୮.୨୨% ମତଦାନ ହୋଇଥିଲା, ଯାହା ରାତି ସାଢ଼େ ୧୧ଟା ସୁଦ୍ଧା ୬୫.୦୨%କୁ ବୃଦ୍ଧି ପାଇଛି । ଏହାବ୍ୟତୀତ ଚୂଡ଼ାନ୍ତ ରିପୋର୍ଟରେ ୬୬.୦୫% ମତଦାନ ରେକର୍ଡ କରାଯାଇଛି, ଯାହା ଗଣତି ଆରମ୍ଭ ହେବାର କିଛି ଘଣ୍ଟା ପୂର୍ବରୁ ଘୋଷଣା କରାଯାଇଥିଲା। ଏହାର ଅର୍ଥ ଅପରାହ୍ନ ୫ଟାରୁ ସନ୍ଧ୍ୟା ୬ଟା ମଧ୍ୟରେ ମାତ୍ର ଏକ ଘଣ୍ଟା ମଧ୍ୟରେ ପାଖାପାଖି ୭୬ ଲକ୍ଷ ଭୋଟ୍ ପଡ଼ିଛି ବୋଲି ଚିଠିରେ ଦର୍ଶାଯାଇଛି।
