ନୂଆଦିଲ୍ଲୀ: ଆଦାନୀ ଗ୍ରୁପର ଅଧ୍ୟକ୍ଷ ଗୌତମ ଆଦାନୀ ପୁଣିଥରେ ଏସିଆର ସବୁଠାରୁ ଧନୀ ବ୍ୟକ୍ତିର ମାନ୍ୟତା ପାଇଛନ୍ତି। ଏବେ ତାଙ୍କ ପାଖରେ ୧୦୦ ବିଲିୟନ ଡଲାରର ସମ୍ପତ୍ତି ରହିଛି। ସେହିପରି ବିଶ୍ୱ ଧନୀ ତାଲିକାରେ ମଧ୍ୟ ଆଦାନୀଙ୍କ ନାଁ ୧୦ନଂରେ ରହିଛି। ଆଦାନୀ ୧୦ ନଂରେ ପହଞ୍ଚିବାରୁ ରିଲାଏନ୍ସ ଗ୍ରୁପର ଅଧ୍ୟକ୍ଷ ମୁକେଶ ଅମ୍ବାନୀ ୧୧ ନଂକୁ ଖସିଛନ୍ତି। ସେହିପରି ଏସିଆ ମହାଦେଶର ଧନୀ ତାଲିକାରେ ଅମ୍ବାନୀ ଦ୍ୱିତୀୟ ସ୍ଥାନରେ ରହିଛନ୍ତି।
Bloomberg Billionaires Index ଅନୁଯାୟୀ, ଗତ ଆର୍ଥିକ ବର୍ଷରେ ଆଦୀନଙ୍କ ସମ୍ପତ୍ତି ୨୩.୫ ବିଲିୟନ ଡଲାର ବଢ଼ିଛି। ଏହା ଧନୀ ତାଲିକାରେ ଥିବା ସବୁ ବ୍ୟକ୍ତିବିଶେଷମାନଙ୍କ ତୁଳନାରେ ଅଧିକ। ସମାନ ସମୟରେ ଅମ୍ବାନୀଙ୍କ ସମ୍ପତ୍ତି ମାତ୍ର ୯.୦୩ ବିଲିୟନ ଡଲାର ବୃଦ୍ଧି ପାଇଛି। ଫଳରେ ସେ ଅମ୍ବାନୀଙ୍କୁ ପଛରେ ପକାଇ ଏସିଆର ସବୁଠାରୁ ଧନୀ ବ୍ୟକ୍ତି ହୋଇଯାଇଛନ୍ତି। ଅମ୍ବାନୀଙ୍କ ମୋଟ ସମ୍ପତ୍ତି ୯୯ ବିଲିୟନ ଡଲାର ଠାରୁ ସାମାନ୍ୟ କମ ରହିଛି।
