ହାଇଦ୍ରାବାଦ: ମଦ ଦୋକାନରେ ପଶି ଚୋରି କରିବା ଜଣେ ଚୋର ପାଇଁ ମହଙ୍ଗା ସାବ୍ୟସ୍ତ ହୋଇଛି । ଦୋକାନ ଭିତରେ ପଶି ପ୍ରଥମେ ସିସିଟିଭି କ୍ୟାମେରା ଭାଙ୍ଗିଥିଲା ଚୋର । ଏହା ପରେ ଦୋକାନରେ ଥିବା ଟଙ୍କା ଧରି ଚମ୍ପଟ ମାରିବାକୁ ଉଦ୍ୟମ କରିଥିଲା । କିନ୍ତୁ ମଦ ଦୋକାନକୁ ଆସି ମଦ ନପିଇ କେମିତି ଚାଲିଯିବ ବୋଲି ଭାବି, ମନଭରି ମଦ୍ୟପାନ କରିଥିଲା ଚୋର । ଖୁସିରେ ଏତେ ମଦ ପାନ କରିଦେଲା ଯେ, ବେହୋସ ହୋଇ ସେହି ଦୋକାନ ଭିତରେ ହିଁ ପଡ଼ିଗଲା । ସକାଳ ହେବା ପରେ ମଧ୍ୟ ଚୋରର ହୋସ୍ ଫେରିନଥିଲା ।
ଦୋକାନ ମାଲିକ ପହଞ୍ଚି ଦେଖିଲା ବେଳକୁ ଚୋର ତଳେ ପଡ଼ିରହିଛି ଏବଂ ତା ପାଖରେ ମଦ ବୋତଲ ଓ ଟଙ୍କା ଏଣେତେଣେ ପଡ଼ିଛି । ଏହା ପରେ ପୋଲିସ ଖବର ପାଇ ଦୋକାନରେ ପହଞ୍ଚିଥିଲା । ଚୋରକୁ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ହୋସ୍ ଫେରିଲେ ଆଗକୁ ତଦନ୍ତ ହେବ ବୋଲି ପୋଲିସ କହିଛି । ଘଟଣାଟି ତେଲେଙ୍ଗାନର ମେଡକ ଜିଲ୍ଲାରେ ଘଟିଛି । ଚୋରକୁ ରମାୟମପେଟା ସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି । ସବ ଇନ୍ସପେକ୍ଟର ଅହମ୍ମଦ ମୋହିନୁଦ୍ଦିନଙ୍କ ଅନୁସାରେ, ଚୋରର ପରିଚୟ ମିଳିନଥିବା ବେଳେ ଏବେ ବି ସେ ସମ୍ପୂର୍ଣ୍ଣ ସୁସ୍ଥ ହୋଇପାରି ନାହିଁ । ମାମଲା ରୁଜୁ ହୋଇଥିବା ବେଳେ ଚୋରର ହୋସ୍ ଫେରିବା ପରେ ତଦନ୍ତ ଆଗକୁ ବଢ଼ିବ ।
