ମୟୁରଭଞ୍ଜ : ବେତନଟୀ ବ୍ଲକର ଦହିକୋଟୀ ପଞ୍ଚାୟତର ସାରିଆ ଗ୍ରାମର ଉଗ୍ରସେନ ମହାନ୍ତଙ୍କ ଏକମାତ୍ର ପୁତ୍ର ଦିଗାମ୍ବର ମହାନ୍ତ(୨୮) ଦାଦନ ଖଟିବାକୁ ଗୁଜୁରାଟ ଯାଉଥିଲେ । ମହାରାଷ୍ଟ୍ର ମଧ୍ୟ ଦେଇ ଟ୍ରେନ୍ଟି ଯାଉଥିବା ସମୟରେ ଦିଗାମ୍ବର ଟ୍ରେନ୍ରୁ ଅସାବଧାନତା ବଶତଃ ଖସିପଡ଼ିଥିଲେ ଓ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିବା ଖବର ମିଳିଛି । ଦୁର୍ଘଟଣା ପରେ କ୍ଷତବିକ୍ଷତ ଶରୀର ରେଳଧାରଣା ପାଖରେ ପଡ଼ି ରହିଥିବା ବେଳେ ଏହାକୁ ଜବତକରି ସେଠାକାର ରେଳବାଇ ପୁଲିସ ବ୍ୟବଚ୍ଛେଦ କରାଇଛି । ଶବ ବ୍ୟବଚ୍ଛେଦ ପରେ କୌଣସି ସୂତ୍ରରୁ ଠିକଣା ପାଇ ରେଳବାଇ ପୁଲିସ ପରିବାରକୁ ଖବର ଦେଇଥିଲା । ଖବର ମିଳିବା ପରେ ପରିବାର ଲୋକ ଦୁଃଖରେ ଭାଙ୍ଗି ପଡ଼ିଛନ୍ତି । ଦିଗାମ୍ବର ଓ ଅନ୍ୟ ତିନିଜଣ ଆଦିବାସୀ ଶ୍ରମିକ ଗତ ଶନିବାର ଦିନ ପୁରୀକୁ ଯାଇ ସେଠାରୁ ଅଖା-ପୁରୀ ଏକ୍ସପ୍ରେସ ଟ୍ରେନ୍ରେ ଗୁଜୁରାଟ ଯାଉଥିଲେ ବୋଲି ଜଣାପଡ଼ିଛି । ଦିଗାମ୍ବର ପରିବାରର ଏକମାତ୍ର ରୋଜଗାରକ୍ଷମ ପୁତ୍ର ଥିଲେ । ମୃତ୍ୟୁ ଖବର ପାଇ ଦିଗାମ୍ବରଙ୍କ ମାଆ ଓ ପତ୍ନୀ ଉଭୟ ଚେତାଶୂନ୍ୟ ହୋଇପଡ଼ିଥିଲେ । ତାଙ୍କର ଗୋଟିଏ ୬ବର୍ଷର ପୁତ୍ର ସନ୍ତାନ ଥିବା ଜଣାପଡ଼ିଛି ।