ମାହାଙ୍ଗା : ମାହାଙ୍ଗା ଥାନା ଲଳିତଗିରି ପଞ୍ଚାୟତ ଜେରକନ୍ଦ ଗ୍ରାମରେ ଜଣେ ବୃଦ୍ଧଙ୍କୁ ତାଙ୍କ କୁମ୍ଭାରଶାଳରେ ଗତକାଲି ରାତିରେ କେହି ଦୁର୍ବୃତ୍ତ ଅତିନିର୍ମମ ଭାବେ ତାଙ୍କ ମୁଣ୍ଡକୁ ହାଣି ହତ୍ୟା କରିଥିବା ଜଣାପଡ଼ିଛି । ଖବର ପାଇ ମାହାଙ୍ଗା ଥାନା ଆଇଆଇସି ବିଜୟ କୁମାର ମଲିକ, କୁମୁଡା ଜୟପୁର ଫାଣ୍ଡି ଅଧିକାରୀ ଗୋପବନ୍ଧୁ ମଲିକ, ଭଦ୍ରେଶ୍ୱର ଭାରପ୍ରାପ୍ତ ଥାନା ଅଧିକାରୀ ତପନ କୁମାର ନାୟକ ଓ ସାଲେପୁର ପୁଲିସ ଉପଖଣ୍ଡ ଅଧିକାରୀ ବିମଳ ବାରିକ ଘଟଣାସ୍ଥଳରେ ପହଞ୍ଚି ମୃତକଙ୍କ ଶବ ଜବତ କରିବା ସହ ଅନୁସନ୍ଧାନକାରୀ ଟିମ୍ ସହାୟତରେ ହତ୍ୟାକାଣ୍ଡର ତଦନ୍ତ ଆରମ୍ଭ କରିଛନ୍ତି ।
ସୂଚନା ଅନୁଯାୟୀ ଭଦ୍ରେଶ୍ୱର ଥାନା ପାଇକରାପୁର ପଞ୍ଚାୟତ ମାଟିପାରିଲୋ ଗ୍ରାମର(୬୧) ବର୍ଷୀୟ ବୃଦ୍ଧ ଦିବାକର ବେହେରା ଘରଠାରୁ ପ୍ରାୟ ୫ଶହ ମିଟର ଦୂର ତଥା ମାହାଙ୍ଗା ଥାନା ଅନ୍ତର୍ଗତ ଜେରକନ୍ଦ ଗ୍ରାମର କ୍ଷେତ ମଧ୍ୟରେ ଏକ ଚାଳିଆଘରେ କୁମ୍ଭାରଶାଳ କରି ହାଣ୍ଡି, ମାଠିଆ ଆଦି ମାଟିପାତ୍ର ନିର୍ମାଣ କରନ୍ତି । ତାକୁ ବିକି ସେହି ଅର୍ଥରେ ସେ ନିଜ ପରିବାର ଭରଣପୋଷଣ କରୁଥିଲେ । ପ୍ରତିଦିନ ପରି ଗତକାଲି ରାତିରେ ସେଠାରେ ସେ ଶୋଇବାକୁ ଯାଇଥିଲେ ।
ତେବେ ଆଜି ସକାଳୁ ତାଙ୍କର ଜଣେ ସଂପର୍କୀୟ ସେଠାକୁ ଯାଇଥିବା ବେଳେ ଦିବାକର କୁମ୍ଭାରଶାଳ ମଧ୍ୟରେ ରକ୍ତ ଜୁଡୁବୁଡୁ ଅବସ୍ଥାରେ ମୃତ୍ୟୁବରଣ କରି ପଡ଼ିଥିବା ଦେଖିବାକୁ ପାଇ ତାଙ୍କ ପରିବାରକୁ ଖବର ଦେଇଥିଲେ । ପରିବାର ଲୋକେ ସେଠାରେ ପହଞ୍ଚି ଘଟଣା ସଂପର୍କରେ ମାହାଙ୍ଗା ଥାନାକୁ ସୂଚନା ଦେଇଥିଲେ ।
ତାଙ୍କର ବଡ଼ପୁତ୍ର କାଳନ୍ଦୀ ବେହେରା ତାଙ୍କ ବାପାଙ୍କୁ କେହି ଦୁର୍ବୃତ୍ତ ହାଣି ହତ୍ୟା କରିଥିବା ଥାନାରେ ଲିଖିତ ଅଭିଯୋଗ କରିଛନ୍ତି । ପୁଲିସ ଏକ ହତ୍ୟା ମାମଲା ରୁଜୁକରି ଅନୁସନ୍ଧାନକାରୀ ଦଳ ଓ କୁକୁର ସହାୟତାରେ ତଦନ୍ତ ଚଳାଇଛି । ଘଟଣାର ପୁଙ୍ଗାନୁପୁଙ୍ଖ ତଦନ୍ତ କରାଯାଇ ହତ୍ୟାକାରୀଙ୍କୁ ତୁରନ୍ତ ଗିରଫ କରାଯିବ ବୋଲି ସାଲେପୁର ଏସଡିପିଓ ବିମଳ ବାରିକ ସୂଚନା ଦେଇଛନ୍ତି ।
