ବ୍ୟୁରୋ : ବାହାଘର ପର ଦିନ ଝିଅ ଶାଶୂ ଘରକୁ ବିଦା ନ ହୋଇ ପହଞ୍ଚିଥିଲା ପରୀକ୍ଷା ହଲ୍ରେ । ପରୀକ୍ଷାରେ ବୋହୂ ବେଶରେ ନବବଧୂ ନିଜ ପେପର ଲେଖି ସାରିବା ପରେ ଆରମ୍ଭ ହୋଇଥିଲା ବାକି ବିବାହ କାର୍ଯ୍ୟକ୍ରମ । ଏଭଳି ଏକ ନିଆରା ଦୃଶ୍ୟ ଦେଖିବାକୁ ମିଳିଛି ଉତ୍ତର ପ୍ରଦେଶର ଝାନ୍ସୀରେ । ଏଠାରେ ବିବାହ ପର ଦିନ ହିଁ ନିଜ ସ୍ତ୍ରୀକୁ ଧରି ପରୀକ୍ଷା ହଲ୍ରେ ପହଞ୍ଚିଥିଲା ବର । ଦିନକ ପୂର୍ବରୁ ସୁଲତାନପୁର ଗାଁରେ ଯେଉଁ ଝିଅ ପାଇଁ ବରଯାତ୍ରୀ ଆସିଥିଲା, ପର ଦିନ ଥିଲା ତା’ ପରୀକ୍ଷା । ବିବାହର ସମସ୍ତ କର୍ମ କରି ସାରିବା ପରେ ସକାଳେ ଯଦି ଝିଅ ବିଦା ହୋଇଥାନ୍ତା ତେବେ ପରୀକ୍ଷା ସରିଯାଇଥାନ୍ତା । ଏଣୁ ଉଭୟ ବର ଓ କନ୍ୟା ପକ୍ଷର ଆଲୋଚନା ପରେ ଝିଅ ପରୀକ୍ଷା ଦେବାକୁ ପହଞ୍ଚିଥିଲା । ପରୀକ୍ଷା ପରେ ସେ ବାକି ବିବାହ କର୍ମ କରିଥିଲା ।
ମଧ୍ୟ ପ୍ରଦେଶର ପୃଥ୍ୱୀପୁରର ବାସିନ୍ଦା ଅଙ୍କୁଶ ସାହୁ ନବବିବାହିତା ପତ୍ନୀ ପୂଜାକୁ ନେଇ ପରୀକ୍ଷା ଦେବାକୁ କଲେଜରେ ପହଞ୍ଚିଥିଲା । ସୁଲତାନପୁରର ପୂଜା ସାହୁ ଯେତେବେଳେ ବିବାହ ପୋଷାକରେ ବିଏ ଦ୍ୱିତୀୟ ବର୍ଷ ପରୀକ୍ଷା ଦେବାକୁ କଲେଜରେ ପହଞ୍ଚିଥିଲା, ସେତେବେଳେ ସମସ୍ତଙ୍କ ନଜର ତା’ ଉପରେ ହିଁ ଅଟକି ଯାଇଥିଲା । ପୂଜା ସହ ତା’ ବର ବି ପରୀକ୍ଷା ହଲ୍ ଯାଏଁ ଯାଇଥିଲା । କଲେଜ ପରିସରରେ ଥିବା ଶିକ୍ଷକ ଶିକ୍ଷୟିତ୍ରୀଙ୍କ ପାଇଁ ଏଭଳି ଦୃଶ୍ୟ ସମ୍ପୂର୍ଣ୍ଣ ନିଆରା ଥିଲା । ସ୍ତ୍ରୀର ପରୀକ୍ଷା ସରିବା ଯାଏଁ ସ୍ୱାମୀ ବାହାରେ ତାଙ୍କୁ ଅପେକ୍ଷା କରିଥିଲା । ପରୀକ୍ଷା ପରେ ପୂଜା ମିଡିଆ ସହ କଥା ହୋଇ କହିଥିଲେ, ବାପ ଘର ଓ ଶ୍ୱଶୁର ଘର ଲୋକଙ୍କ ସହମତିରେ ସେ ପରୀକ୍ଷା ଦେବାକୁ ଆସିଥିଲେ ।
ଶ୍ୱଶୁର ଘର ଲୋକ ଆଗକୁ ପଢ଼ିବାକୁ ହଁ ଭରିଛନ୍ତି, ଯାହା ତାଙ୍କ ପାଇଁ ଏକ ବଡ଼ କଥା । ଝିଅଙ୍କୁ ବିବାହ ପରେ ପଢ଼ା ଛାଡ଼ିବା ଉଚିତ୍ ନୁହେଁ । ପାଠ ପଢ଼ିଲେ ହିଁ ସେ ଜୀବନରେ କିଛି କରିପାରିବେ । ଏଣୁ ସେ ନିଜ ସବୁ ସାଙ୍ଗକୁ ପାଠ ପଢ଼ି ଜୀବନରେ କିଛି କରିବାକୁ ପରାମର୍ଶ ଦେଇଛନ୍ତି । ଫଳରେ ତାଙ୍କୁ ଆଉ କାହା ଉପରେ ନିର୍ଭର କରିବାକୁ ପଡ଼ିବ ନାହିଁ । ପରୀକ୍ଷା ଦେଇ ସାରିବା ପରେ ବର କନ୍ୟା ପୁଣିଥରେ ଘରକୁ ଫେରି ବାକି କର୍ମ ସାରିଥିଲେ । ତା’ ପରେ ଝିଅ ବିଦା କାର୍ଯ୍ୟକ୍ରମ ହୋଇଥିଲା ଓ ବର ନିଜ ସ୍ତ୍ରୀକୁ ଧରି ଘରକୁ ଫେରିଥିଲା ।
