ନୂଆଦିଲ୍ଲୀ: ଶ୍ରୀଲଙ୍କାରେ ଏବେ ଜାରି ରହିଛି ଘରୋଇ ଟୁର୍ଣ୍ଣାମେଣ୍ଟ ଲଙ୍କା ପ୍ରିମିୟର ଲିଗ୍ । ଏହି ଟୁର୍ଣ୍ଣାମେଣ୍ଟ ସମୟରେ ଖେଳାଯାଉଥିବା ଏକ ମ୍ୟାଚରେ ଘଟି ଯାଇଛି ଏକ ବଡ ଦୁର୍ଘଟଣା । ଫିଲ୍ଡିଙ୍ଗ ସମୟରେ ମୁହଁରେ ବଲ ବାଜିବାରୁ ଗୁରୁତର ଆହତ ହୋଇଛନ୍ତି ଜଣେ ଷ୍ଟାର କ୍ରିକେଟର । ଫଳରେ ସଙ୍ଗେ ସଙ୍ଗେ ସେ ପଡିଆ ଛାଡିବା ପାଇଁ ବାଧ୍ୟ ହୋଇଛନ୍ତି । ଏହି ଘଟଣା ଏବେ ତାଙ୍କ ଦଳ ପାଇଁ ଏକ ବଡ ଚିନ୍ତାର ବିଷୟ ପାଲଟିଛି ।
ସୂଚନା ଅନୁସାରେ, ବୁଧବାର ଟୁର୍ଣ୍ଣାମେଣ୍ଟର ଏକ ମ୍ୟାଚରେ ମୁହାଁମୁହିଁ ହୋଇଥିଲେ କ୍ୟାଣ୍ଡି ଫେଲକାନ୍ସ ଏବଂ ଗାଲ ଗ୍ଲାଡିଏଟର୍ସ । ଏହି ମ୍ୟାଚରେ ଫେଲକାନ୍ସ ଟିମ ତରଫରୁ ଶ୍ରୀଲଙ୍କାର ଷ୍ଟାର ଅଲରାଉଣ୍ଡର ଚମିକା କରୁନାରତ୍ନେ ଖେଳୁଥିବା ବେଳେ ଏପରି ଦୁର୍ଘଟଣାର ଶିକାର ହୋଇଛନ୍ତି । କାର୍ଲସ ବ୍ରେଥୱେଟଙ୍କ ବଲକୁ ଫର୍ଣ୍ଣାଣ୍ଡୋ କଭର ଉପରେ ଏକ ବଡ ଶଟ୍ ଖେଳିବା ପାଇଁ ଚେଷ୍ଟା କରି କ୍ୟାଚ ଉଠାଇ ଦେଇଥିଲେ । ଚମିକା ଏହି କ୍ୟାଚ ଧରିବା ସମୟରେ ବଲ ସିଧା ଆସି ଚମିକାଙ୍କ ମୁହଁରେ ବାଜିଥିଲା ।
Chamika hospitalized while attempting catch for Kandy Falcons#LPL2022 #LPL #ChamikaKarunaratne #Cricket pic.twitter.com/yrkT2bbhoG
— Ada Derana Sports (@AdaDeranaSports) December 7, 2022
ନିଜ ଚେଷ୍ଟାରେ ସଫଳ ହୋଇଥିଲେ ଚମିକା । କିନ୍ତୁ ଏଥିପାଇଁ ସେ ତାଙ୍କ ମୁହଁରେ ଆଘାତ ପାଇଛନ୍ତି । ବଲ ମୁହଁରେ ବାଜିବାରୁ ତାଙ୍କ ମୁହଁ ଫାଟି ଯାଇଥିବା ବେଳେ ପାଟିରୁ ୩-୪ଟି ଦାନ୍ତ ଭାଙ୍ଗି ଯାଇଥିବା ଦେଖିବାକୁ ମିଳିଛି । ଫଳରେ ସେ ସଙ୍ଗେ ସଙ୍ଗେ ପଡିଆ ଛାଡି ଡ୍ରେସିଙ୍ଗ ରୁମକୁ ଚାଲିଯାଇଥିଲେ । ଏବେ ସେ ହସ୍ପିଟାଲରେ ଚିକିସବିତ ଅବସ୍ଥାରେ ରହିଛନ୍ତି । ତେବେ ଏହାପରେ ଆଗାମୀ ମ୍ୟାଚରେ ତାଙ୍କ ଖେଳିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏବେ ଏହି ଘଟଣାର ଏକ ଭିଡିଓ ସୋଶାଲ ମିଡିଆରେ ଭାଇରାଲ ହେବାରେ ଲାଗିଛି ।
