ଭୁବନେଶ୍ୱର: ରାଜ୍ୟର ଶିଳ୍ପ ଅଭିବୃଦ୍ଧି ଏବଂ ନିଯୁକ୍ତି ସମ୍ଭାବନାକୁ ବୃଦ୍ଧି କରିବା ଦିଗରେ ରାଜ୍ୟ ସରକାର ଆଜି ୨୫ ଟି ପ୍ରମୁଖ ପ୍ରକଳ୍ପକୁ ଅନୁମୋଦନ ପ୍ରଦାନ କରିଛନ୍ତି। ଯାହାର ମିଳିତ ପୁଞ୍ଜି ବିନିଯୋଗ ୪,୨୨୨.୨୪ କୋଟି ଟଙ୍କା ରହିଛି। ମୁଖ୍ୟ ଶାସନ ସଚିବ ମନୋଜ ଆହୁଜାଙ୍କ ଅଧ୍ୟ଼କ୍ଷତାରେ ଅନୁଷ୍ଠିତ ୧୩୩ତମ ରାଜ୍ୟସ୍ତରୀୟ ସିଙ୍ଗଲ ୱିଣ୍ଡୋ କ୍ଲିୟରାନ୍ସ ଅଥରିଟି ବୈଠକରେ ଏହି ଅନୁମୋଦନ ପ୍ରଦାନ କରାଯାଇଛି। ବିଭିନ୍ନ କ୍ଷେତ୍ରରେ ବ୍ୟାପକ ପ୍ରଭାବ ଥିବା ଏହି ପ୍ରକଳ୍ପଗୁଡ଼ିକ ଓଡ଼ିଶାର ସାମାଜିକ-ଅର୍ଥନୈତିକ ବିକାଶରେ ଯୋଗଦାନ ଦେଇ ୧୪,୪୯୭ରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବ ବୋଲି ଆଶା କରାଯାଉଛି। ଦିଲ୍ଲୀ, ମୁମ୍ବାଇ ଏବଂ ସିଙ୍ଗାପୁରରେ ଆଯେ଼ାଜିତ ଉତ୍କର୍ଷ ଓଡ଼ିଶା ରୋଡ ସୋ ‘ର ସଫଳତା ଦ୍ୱାରା ଓଡ଼ିଶା ପୂର୍ବ ଭାରତର ପ୍ରମୁଖ ନିବେଶ ଗନ୍ତବ୍ୟ଼ସ୍ଥଳ ଭାବେ ପ୍ରମାଣିତ ହୋଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ରାଜ୍ୟ଼ ସଫଳତାର ସହ ଗୁରୁତ୍ୱପୂର୍ଣ୍ଣ ନିବେଶକଙ୍କ ଆଗ୍ରହ ଆକର୍ଷଣ କରିଛି।
ଏହି ଅନୁମୋଦିତ ପ୍ରକଳ୍ପଗୁଡ଼ିକ ବିବିଧ ଶିଳ୍ପକୁ ପ୍ରୋତ୍ସାହନ ଦେବା ଲାଗି ଓଡ଼ିଶାର ପ୍ରତିବଦ୍ଧତାକୁ ପ୍ରତିଫଳିତ କରୁଛି। ସବୁଜ ଶକ୍ତି ଉପକରଣ, ଫାର୍ମାସ୍ୟୁଟିକାଲ୍, ବୟନଶିଳ୍ପ ଏବଂ ପୋଷାକ, ପ୍ଲାଷ୍ଟିକ୍, ଖାଦ୍ୟ ପ୍ରକ୍ରିୟାକରଣ, ଡାଉନଷ୍ଟ୍ରିମ-ଆଲୁମିନିଯ଼ମ୍, ପ୍ୟାକେଜିଂ, ରବର, ଜୈବ ଇନ୍ଧନ/ଜୈବ ସାର, ରାସାୟନିକ ପଦାର୍ଥ, ଖଣିଜ ପଦାର୍ଥ ଏବଂ ଇସ୍ପାତ ଭିତ୍ତିଭୂମି, ଆର୍ଗୋ ପ୍ରକ୍ରିୟାକରଣ ଏବଂ ପର୍ଯ୍ୟଟନ ଭଳି ୧୬ଟି କ୍ଷେତ୍ରରେ ନିବେଶ କରାଯିବ। ଏହି ପ୍ରକଳ୍ପ ଗୁଡ଼ିକ ରାଜ୍ୟର ୧୧ଟି ଜିଲ୍ଲା ଯଥା ଅନୁଗୁଳ, ଗଞ୍ଜାମ, ଖୋର୍ଦ୍ଧା, ନବରଙ୍ଗପୁର, କଟକ, ଝାରସୁଗୁଡ଼ା, ବରଗଡ, ସମ୍ବଲପୁର, ସୁନ୍ଦରଗଡ, ପୁରୀ, କନ୍ଧମାଳରେ କାର୍ଯ୍ୟକାରୀ ହେବ ବୋଲି ଜଣାପଡିଛି।
ତେବେ ଚଳିତବର୍ଷର ଏହି ରାଜ୍ୟସ୍ତରୀୟ ସିଙ୍ଗଲ ୱିଣ୍ଡୋ କ୍ଲିୟରାନ୍ସ ଅଥରିଟି ବୈଠକ ହେଉଛି ପ୍ରଥମ। ଫଳରେ ଏହା ପୁଞ୍ଜିନିବେଶ ଆକୃଷ୍ଟ କରିବା ଏବଂ ସ୍ଥାୟୀ ଶିଳ୍ପ ଅଭିବୃଦ୍ଧିରେ ନିଜକୁ ଅଗ୍ରଣୀ ଭାବେ ପ୍ରତିଷ୍ଠିତ କରିବା ଲାଗି ଓଡ଼ିଶାର ଦୃଢ଼ ପ୍ରତିବଦ୍ଧତାକୁ ଦର୍ଶାଉଛି। ଶ୍ରୀ ମୋହନ ଚରଣ ମାଝୀଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱ ଦ୍ୱାରା ପରିଚାଳିତ ହୋଇ ରାଜ୍ୟ ପ୍ରମୁଖ ପୁଞ୍ଜିନିବେଶକୁ ଅନୁମୋଦନ କରିଛି ଯାହା ଆର୍ôଥକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ଏବଂ ଯଥେଷ୍ଟ ନିଯୁକ୍ତି ସୁଯୋଗ ସୃଷ୍ଟି କରିବାର ପ୍ରତିଶ୍ରୁତି ଦେଇଥାଏ। ଓଡ଼ିଶାର ସକ୍ରିୟ ନୀତି ଏବଂ ପ୍ରଗତିଶୀଳ ଦୂରଦୃଷ୍ଟି ଏହାକୁ ଉଭୟ ଘରୋଇ ଏବଂ ବିଶ୍ୱ ନିବେଶକଙ୍କ ପାଇଁ ଶୀର୍ଷ ପସନ୍ଦରେ ପରିଣତ କରିଛି। ଏହି ପ୍ରକଳ୍ପଗୁଡିକ ସମଗ୍ର ଓଡ଼ିଶାରେ ବିଭିନ୍ନ କ୍ଷେତ୍ର ପାଇଁ ଏକ ଗୁରୁତ୍ୱପୂର୍ଣ୍ଣ ପ୍ରତିବଦ୍ଧତାକୁ ପ୍ରତିନିଧିତ୍ୱ କରେ, ଯାହାର ସାମୂହିକ ମୂଲ୍ୟ ୪,୨୨୨.୨୪ କୋଟି ଟଙ୍କା ଏବଂ ୧୪,୪୯୭ ନିଯୁକ୍ତି ସୃଷ୍ଟି କରିବାର ପ୍ରତିଶ୍ରୁତି ଦେଇଛି।
ତେବେ ପ୍ରକଳ୍ପ ଗୁଡିକ ମଧ୍ୟରେ ଅନୁଗୁଳରେ ଶୋଭା ସୋଲାର ଲିମିଟେଡ ପକ୍ଷରୁ ୩୮୦କୋଟି ଟଙ୍କାରେ ସୋଲାର ସେଲ ମ୍ୟାନୁଫାକଚିଂ ୟୁନିଟ୍ ପ୍ରତିଷ୍ଠା କରାଯିବ। ଯେଉଁଥିରେ ୮୫୦ଜଣଙ୍କୁ ନିଯୁକ୍ତିର ସୁଯୋଗ ମିଳିବ। ସେହିପରି ଗଞ୍ଜାମରେ ଏଚ୍ଏଲଏଲ୍ ପକ୍ଷରୁ ୭୦୦କୋଟିର ପ୍ରକଳ୍ପରେ ୨୬ଶହ ନିଯୁକ୍ତି ସୁଯୋଗ, ଖୋର୍ଦ୍ଧାରେ ଏଭି ପ୍ରା,ଲି ପକ୍ଷରୁ ୧୩୯.୦୨କୋଟି ପ୍ରକଳ୍ପରେ ୨୪୦୦ ଏବଂ ଏଏ ପ୍ରା.ଲି ପକ୍ଷରୁ ୫୨କୋଟିର ପ୍ରକଳ୍ପରେ ୨୬୦୦ ନିଯୁକ୍ତି ସୁଯୋଗ ମିଳିବ। ଗଞ୍ଜାମରେ ଜିଇପ୍ରାଲି ପକ୍ଷରୁ ପ୍ଲାଷ୍ଟିକ କମ୍ପାନୀ ପ୍ରତିଷ୍ଟା ଲାଗି ୫୨୦କୋଟିର ପ୍ରକଳ୍ପରେ ୫୦୦ଜଣଙ୍କୁ ନିଯୁକ୍ତି ସୁଯୋଗ, ନବରଙ୍ଗପୁରରେ ଆର୍ଏଫ୍ଟି ପ୍ରାଲିର ୧୬୭.୫୯କୋଟଇର ପ୍ରକଳ୍ପରେ ୧୧୫୩ଜଣଙ୍କୁ ନିଯୁକ୍ତି ପ୍ରଦାନ କରାଯିବ। ଏହିପରି ରାଜ୍ୟର ବିଭିନ୍ନ ଜିଲ୍ଲାରେ ମୋଟ ଉପରେ ୨୫ଟି ପ୍ରକଳ୍ପ ଲାଗି ୪,୨୨୨.୨୪କୋଟି ବ୍ୟୟ କରାଯିବ। ଏବଂ ୧୪,୪୯୭ଜଣଙ୍କୁ ନିଯୁକ୍ତିର ସୁଯୋଗ ମିଳିବ।
