ଭୁବନେଶ୍ୱର: ଯୌତୁକ ନିର୍ଯ୍ୟାତନା ଅଭିଯୋଗରେ ପାହାଳ ଥାନା ପୁଲିସ ଜଣଙ୍କୁ କରି କୋର୍ଟଚାଲାଣ କରିଛି । ସେ ହେଲେ ହଂସପାଳର ଆଲୋକ କୁମାର ମହାନ୍ତି । ସୂଚନାଯୋଗ୍ୟ ଯେ, ପୀଡ଼ିତା ଜଣକ ଆଲୋକଙ୍କୁ ବିବାହ କରିଥିଲେ । ବିବାହର କିଛିଦିନ ଖୁବ ହସଖୁସିରେ କଟିଥିଲା । ଇତିମଧ୍ୟରେ ପୀଡ଼ିତା ଜଣକ ଏକ କନ୍ୟା ସନ୍ତାନ ଜନ୍ମ ଦେଇଥିଲେ । ଅଭିଯୁକ୍ତଙ୍କ ବାପା ଜଣେ ସରକାରୀ ଚାକିରିଆ ହୋଇଥିବାରୁ ଅଭିଯୁକ୍ତଙ୍କ ପରିବାରବର୍ଗ ସତ୍ୟନଗର ଠାରେ ଥିବା କ୍ୱାର୍ଟରରେ ରହୁଥିଲେ ।
କିନ୍ତୁ କିଛି ପାରିବାରିକ ସମସ୍ଯା ଯୋଗୁଁ ପୀଡ଼ିତା ନିଜ ସ୍ୱାମୀ ଏବଂ ଝିଅଙ୍କ ସହିତ ହଂସପାଳରେ ରହୁଥିଲେ । ବିବାହ ସମୟରେ ପୀଡ଼ିତା ଜଣକ ଯୌତୁକ ଆଣି ନଥିବାରୁ ଅଭିଯୁକ୍ତ ଜଣକ ତାଙ୍କୁ ବାପଘରୁ ୫,୦୦,୦୦୦ଟଙ୍କା ଏବଂ ସୁନା ଗହଣା ଇତ୍ୟାଦି ଆଣିବା ଲାଗି ବାଧ୍ୟ କରିବା ସହିତ ନ ଆଣିଲେ ଘରୁ ବାହାର କରିଦେବାର ଧମକ ଦେଉଥିଲେ । ଏହି ସମୟରେ ଅଭିଯୁକ୍ତ ଜଣକ ଅନ୍ୟଜଣେ ମହିଳାଙ୍କ ସହିତ ସମ୍ପର୍କରେ ଥିବା କଥା ଜାଣିପାରି, ସେପରି ନକରିବାକୁ ଅଭିଯୁକ୍ତଙ୍କୁ ଅନୁରୋଧ କରିଥିଲେ । ଏଥିରେ ଉତକ୍ଷିପ୍ତ ହୋଇ ଅଭିଯୁକ୍ତ ଜଣକ ପୀଡିତାଙ୍କୁ ଅଶ୍ରାବ୍ୟ ଭାଷାରେ ଗାଳି କରିବା ସହିତ ଏକ କୁରାଢି ସାହାଯ୍ୟରେ ମରଣାନ୍ତକ ଆକ୍ରମଣ କରିଥିଲେ ।
ପୀଡ଼ିତା ଜଣକ ବଞ୍ଚାଇବା ଲାଗି ଡାକ ପକାଇବାରୁ ତାଙ୍କ ଡାକ ଶୁଣି ପାଖ ପଡୋଶୀ ଘଟଣା ସ୍ଥଳକୁ ଆସିଥିଲେ । ଆଲୋକ ସେମାନଙ୍କୁ ମଧ୍ୟ ଅଶାଳୀନ ବ୍ୟବହାର କରିବା ସହିତ ଧମକ ଦେଇଥିଲେ । ପରେ ଆଲମୀରାରେ ଥିବା ପୀଡ଼ିତାଙ୍କ ସମସ୍ତ ସୁନା ଗହଣା ନେଇ ଘଟଣା ସ୍ଥଳରୁ ପଳାଇଯାଇଥିଲେ । ପୀଡିତାଙ୍କ ଅଭିଯୋଗ କ୍ରମେ ପାହାଳ ଥାନା ପୁଲିସ ମାମଲା ରୁଜୁ କରି ନିମ୍ନୋକ୍ତ ଅଭିଯୁକ୍ତଙ୍କୁ ଗିରଫ କରିବା ସହିତ ପଥଇଦିତଙ୍କ ସମସ୍ତ ସୁନା ଗହଣା ଜବତ କରିଥିଲେ । ପଚରାଉଚରା ସମୟରେ ଅଭିଯୁକ୍ତ ଜଣକ ନିଜ ଦୋଷ ସ୍ୱୀକାର କରିଥିଲେ ।
