ରଶ୍ମିକା ଡିପଫେକ ଭିଡିଓ ମାମଲା: ଦିଲ୍ଲୀ ପୋଲିସ ହାତରେ ଲାଗିଲା ଗୁରୁତ୍ୱପୂର୍ଣ୍ଣ ତଥ୍ୟ

ମୁମ୍ବାଇ: ଅଭିନେତ୍ରୀ ରଶ୍ମିକା ମନ୍ଦାନାଙ୍କ ଡିପଫେକ ଭିଡିଓ ମାମଲାରେ ଦିଲ୍ଲୀ ପୋଲିସକୁ ମିଳିଛି ଗୁରୁତ୍ୱପୂର୍ଣ୍ଣ ତଥ୍ୟ । ଏହି ଭିଡିଓ ସହ ଜଡିତ ମାମଲାର ତଦନ୍ତରେ ସେମାନେ ଗୁରୁତ୍ୱପୂର୍ଣ୍ଣ ସୂଚନା ପାଇଛି । ବୈଷୟିକ ବିଶ୍ଳେଷଣ ମାଧ୍ୟମରେ ଏହାର ଯାଞ୍ଚ କରାଯାଉଛି । ବୈଷୟିକ ବିଶ୍ଳେଷଣର ଏକ ଅଂଶ ଭାବରେ ଭିଡିଓଗୁଡିକ ଅପଲୋଡ ହୋଇଥିବା ସମସ୍ତ ଆଇପି ଠିକଣା ଚିହ୍ନଟ କରାଯାଉଥିବା ଜଣେ ପୋଲିସ ଅଧିକାରୀ କହିଛନ୍ତି । ପୋଲିସ କହିଛି, ଆମେ ସେହି ଠିକଣାକୁ ଖୋଜିବାକୁ ଚେଷ୍ଟା କରୁଛୁ , ଯେଉଁଠାରୁ ଭିଡିଓ ପ୍ରଥମେ ଇଣ୍ଟରନେଟରେ ଅପଲୋଡ ହୋଇଥିଲା । ଆଇପି ଠିକଣା ହେଉଛି ଏକ ଠିକଣା ଯାହା ଇଣ୍ଟରନେଟ କିମ୍ବା ସ୍ଥାନୀୟ ନେଟୱାର୍କରେ ଏକ ଉପକରଣ ଚିହ୍ନଟ କରେ । ଡେପୁଟି କମିଶନର ହେମନ୍ତ ତିୱାରୀ କହିଛନ୍ତି ଯେ, ସେମାନଙ୍କୁ ଗୁରୁତ୍ୱପୂର୍ଣ୍ଣ ସୂଚନା ମିଳିଛି ଏବଂ ଅଭିଯୁକ୍ତଙ୍କୁ ଶୀଘ୍ର ଗିରଫ କରାଯିବ । ନଭେମ୍ବର ୧୧ରେ, ଦିଲ୍ଲୀ ମହିଳା କମିଶନ ନଗର ପୋଲିସକୁ ନୋଟିସ ପଠାଇବା ପରେ ଦିଲ୍ଲୀ ପୋଲିସର ଇଣ୍ଟେଲିଜେନ୍ସ ଫ୍ୟୁଜନ ଆଣ୍ଡ ଷ୍ଟ୍ରାଟେଜିକ ଅପରେସନ (ଆଇଏଫଏସଓ) ଏହି ଘଟଣାରେ ଅଜ୍ଞାତ ବ୍ୟକ୍ତିଙ୍କ ବିରୋଧରେ ଏଫଆଇଆର ପଞ୍ଜୀକୃତ କରିଥିଲା ।