ସ୍ୱାସ୍ଥ୍ୟ ପାଇଁ ରାମବାଣ ପିଜୁଳି

ଭୁବନେଶ୍ୱର : ପିଜୁଳି ହେଉଛି ଏକ ଏମିତି ଫଳ, ଯାହାକୁ ଖାଇବାକୁ ପ୍ରାୟ ସମସ୍ତେ ଭଲ ପାଇଥାନ୍ତି । ପିଜୁଳି ଆମ ଶରୀର ପାଇଁ ବହୁ ଉପକାରୀ । ତେବେ ଆସନ୍ତୁ ଜାଣିବା ପିଜୁଳି ଖାଇବା ଆମ ଶରୀର ପାଇଁ କେତେ ଉପକାରୀ । ପିଜୁଳିକୁ ଭିଟାମିନ୍ ସି ର ଏକ ସମୃଦ୍ଧ ଉତ୍ସ ଭାବରେ ବିବେଚନା କରାଯାଏ । ଯାହା ଆମ ଶରୀରରେ ରୋଗ ପ୍ରତିରୋଧକ ଶକ୍ତି ବଢାଇଥାଏ । ଏହା ହଜମ ପ୍ରକ୍ରିୟାରେ ମଧ୍ୟ ସହାୟକ ହୁଏ । କୋଷ୍ଠକାଠିନ୍ୟ ପରି ପେଟ ସମସ୍ୟାରୁ ବି ମୁକ୍ତି ଦେଇଥାଏ । କାରଣ ଏଥିରେ କମ୍ କ୍ୟାଲୋରୀ ଏବଂ ଅଧିକ ଫାଇବର ଥାଏ । ଯେଉଁମାନେ ପିଜୁଳି ଖାଆନ୍ତି, ସେମାନଙ୍କର ରକ୍ତରେ ଶର୍କରା ସ୍ତର ନିୟନ୍ତ୍ରଣରେ ରହିଥାଏ । ମଧୁମେହ ରୋଗୀ ଏହି ଫଳ ଖାଇବା ଆବଶ୍ୟକ । ଏହି ଫଳ ଅନ୍ତନଳୀକୁ ସଫା ଏବଂ ସୁସ୍ଥ ରଖିବାରେ ସାହାଯ୍ୟ କରିଥାଏ । ପିଜୁଳିରେ ଅଧିକ ପରିମାଣର ପୋଟାସିୟମ୍ ରହିଥାଏ । ଯାହା ଆମ ହାର୍ଟ ପାଇଁ ଅତ୍ୟନ୍ତ ଲାଭଦାୟକ ଅଟେ । ପିଜୁଳିରେ ଥିବା ଭିଟାମିନ୍ ଏ ଆମ ଦୃଷ୍ଟି ଶକ୍ତିକୁ ତୀକ୍ଷ୍ଣ କରିଥାଏ । ଆମ ଶରୀରରେ ରକ୍ତଚାପକୁ ନିୟନ୍ତ୍ରଣ କରିବାରେ ପିଜୁଳି ବେଶ୍ ସହାୟକ ହୋଇଥାଏ । ଏତଦବ୍ୟତୀତ ପିଜୁଳିରେ ପୋଷକ ତତ୍ତ୍ୱ ଅଧିକ ରହିଥାଏ । ଯାହା ଶରୀରର ଅନେକ ଅଙ୍ଗରେ ଅମ୍ଳଜାନ ଯୋଗାଇବାରେ ସାହାଯ୍ୟ କରିଥାଏ । ଏଥିରେ ଥିବା ଶକ୍ତିଶାଳୀ ଆଣ୍ଟି ଅକ୍ସିଡାଣ୍ଟ କର୍କଟ ରୋଗୀଙ୍କ ପାଇଁ ଅତି ଉପଯୋଗୀ ହୋଇଥାଏ ।