ପାରା ଅଲିମ୍ପିଆନ୍ ଓସ୍କାର ପିଷ୍ଟୋରିୟସ୍‌ଙ୍କ ପାରୋଲ ଆବେଦନ

ଜୋହାନ୍ସବଗ : ପ୍ରେମିକା ରୀଭା ଷ୍ଟିଙ୍କ୍ୟାମ୍ପଙ୍କୁ ହତ୍ୟା କରିଥିବା ଅଭିଯୋଗରେ ୨୦୧୪ରେ ଜେଲ ଯାଇଥିବା ଦକ୍ଷିଣ ଆଫ୍ରିକାର ପୂର୍ବତନ ପାରାଅଲିମ୍ପିକ୍ ତାରକା ଓସ୍କାର ପିଷ୍ଟୋରିୟସ ଶୁକ୍ରବାର ପାରୋଲ ଆବେଦନ କରିଛନ୍ତି । କାର୍ବନ-ଫାଇବର କୃତ୍ରିମ ଗୋଡ଼ ପାଇଁ ବ୍ଲେଡ୍ ରନର ଭାବରେ ଜଣାଶୁଣା ପିଷ୍ଟୋରିୟସ ଜଣେ ପାରାଅଲିମ୍ପିକ୍ ଚାମ୍ପିଅନ୍ ଭାବେ ପବ୍ଲିକ୍ ହିରୋଙ୍କଠାରୁ ଆରମ୍ଭ କରି ଏକ ଦଶନ୍ଧି ତଳେ ସାରା ବିଶ୍ୱର ଦୃଷ୍ଟି ଆକର୍ଷଣ କରିଥିଲେ । ୨୦୧୩ରେ ଭାଲେଣ୍ଟାଇନ୍ ଡେ’ରେ ପିଷ୍ଟୋରିୟସ୍ ପ୍ରେମିକା ଷ୍ଟିଙ୍କ୍ୟାମ୍ପଙ୍କୁ ଗୁଳି କରି ହତ୍ୟା କରିଥିଲା । ୨୦୧୪ରେ ହାଇକୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରି ପ୍ରଥମେ ୫ ବର୍ଷ ଜେଲ୍ ଦଣ୍ଡାଦେଶ ଶୁଣାଇଥିଲା କିନ୍ତୁ ୨୦୧୫ ଶେଷ ଭାଗରେ ସୁପ୍ରିମକୋର୍ଟ ଓକିଲଙ୍କ ଅପିଲ ପରେ ତାଙ୍କୁ ହତ୍ୟା ଅଭିଯୋଗରେ ଦୋଷୀ ସାବ୍ୟସ୍ତ କରିଥିଲେ । ୨୦୧୬ରେ ହାଇକୋର୍ଟର ଏକ ଦଣ୍ଡାଦେଶ ପରେ ତାଙ୍କୁ ପୁଣି ୬ ବର୍ଷ ପାଇଁ ଜେଲକୁ ପଠାଇ ଦିଆଯାଇଥିଲା, ଯାହାକି ଓକିଲଙ୍କ ଦ୍ୱାରା ଦାବି କରାଯାଇଥିବା ୧୫ ବର୍ଷର ସର୍ବନିମ୍ନ ଅବଧିର ଅଧାରୁ କମ୍ ଥିଲା । ୨୦୧୭ରେ ସୁପ୍ରିମକୋର୍ଟ ତାଙ୍କ ହତ୍ୟା ଦଣ୍ଡକୁ ଦ୍ୱିଗୁଣିତ କରି ୧୩ ବର୍ଷ ୫ ମାସ କରିଥିଲେ ଏବଂ କହିଥିଲେ ଯେ ୬ ବର୍ଷର ଜେଲ୍ ଦଣ୍ଡ ଆଶ୍ଚର୍ଯ୍ୟଜନକ ଭାବେ କୋହଳ ଥିଲା । ଦକ୍ଷିଣ ଆଫ୍ରିକାର ସୁଧାର ସେବା ବିଭାଗର ଜଣେ ମୁଖପାତ୍ର କହିଛନ୍ତି ଯେ ମାମଲା ଉପରେ ଏକ ପାରୋଲ ବୋର୍ଡ ବିଚାର କରିବ, ଯେଉଁଠାରେ ସେ ପାରୋଲରେ ମୁକ୍ତ ହେବା ଉଚିତ କି ନାହିଁ ତାହା ସେମାନେ ନିଷ୍ପତ୍ତି ନେବେ ।