ନୂଆଦିଲ୍ଲୀ : ଆମେରିକା ଓ ଇରାନ ମଧ୍ୟରେ ପୁଣିଥରେ ଆଲୋଚନା ଆରମ୍ଭ କରିବାକୁ ଉଦ୍ୟମ ଚାଲିଥିବା ବେଳେ ପାକିସ୍ତାନର କଥିତ ମଧ୍ୟସ୍ଥତା ଭୂମିକାକୁ ନେଇ ନୂଆ ପ୍ରଶ୍ନ ଉଠିଛି । ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ ତାଙ୍କର ଇରାନ ସହ ଆଲୋଚନା ଉଦ୍ୟମ ଆଗକୁ ବଢ଼ୁଛି ଏବଂ ଏଥିରେ ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ (UAE) ଓ କତାର ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି । ତେବେ ଟ୍ରମ୍ପଙ୍କ ବୟାନରେ ପାକିସ୍ତାନର ନାଁ ନଥିବାରୁ କୂଟନୈତିକ ମହଳରେ ଚର୍ଚ୍ଚା ବଢ଼ିଛି ।ଟ୍ରମ୍ପଙ୍କ କହିବାନୁସାରେ, ସାଉଦି ଆରବ, UAE ଓ କତାର ଆମେରିକାକୁ ଇରାନ ଉପରେ ବଡ଼ ସାମରିକ ଆକ୍ରମଣରୁ ଦୂରେଇ ଆଲୋଚନାର ପଥ ବାଛିବାକୁ ପ୍ରେରିତ କରିଥିଲେ । ବର୍ତ୍ତମାନ ହର୍ମୁଜ୍ ପ୍ରଣାଳୀରେ ଜାହାଜ ଚଳାଚଳ ସ୍ୱାଭାବିକ କରିବା ଏବଂ ଇରାନର ପରମାଣୁ କାର୍ଯ୍ୟକ୍ରମ ସମ୍ପର୍କିତ ପ୍ରସଙ୍ଗର ସମାଧାନ ଆଲୋଚନାର ପ୍ରମୁଖ ବିଷୟ ହୋଇଛି । ଅନ୍ୟପଟେ, ଇରାନ ଟ୍ରମ୍ପଙ୍କ ଦାବିକୁ ଖଣ୍ଡନ କରି କହିଛି ଯେ ବର୍ତ୍ତମାନ ତାହାର ଆଲୋଚନା କେବଳ ଓମାନ ସହ ହର୍ମୁଜ୍ ପ୍ରଣାଳୀରେ ଜାହାଜ ଚଳାଚଳକୁ ନେଇ ସୀମିତ ରହିଛି ।
ସୂଚନା ଯୋଗ୍ୟ, ୨୦୨୬ ଜୁନ୍ରେ ଆମେରିକା-ଇରାନ ଆଲୋଚନା ସମୟରେ ପାକିସ୍ତାନ ଓ କତାରକୁ ଆନୁଷ୍ଠାନିକ ମଧ୍ୟସ୍ଥ ଭାବେ ଉଲ୍ଲେଖ କରାଯାଇଥିଲା । ସ୍ୱିଜରଲ୍ୟାଣ୍ଡର ବର୍ଗେନଷ୍ଟକରେ ହୋଇଥିବା ଉଚ୍ଚସ୍ତରୀୟ ବୈଠକରେ ମଧ୍ୟ ଉଭୟ ଦେଶ ମଧ୍ୟସ୍ଥ ଭୂମିକା ନେଇଥିଲେ । ତେବେ ଟ୍ରମ୍ପଙ୍କ ନୂଆ ବୟାନରୁ ଗଲ୍ଫ ଦେଶଗୁଡ଼ିକର ଭୂମିକା ଅଧିକ ପ୍ରମୁଖ ହୋଇଥିବା ସଙ୍କେତ ମିଳୁଥିବା ବେଳେ, ପାକିସ୍ତାନ ସମ୍ପୂର୍ଣ୍ଣ ଭାବେ ମଧ୍ୟସ୍ଥତାରୁ ବାଦ ପଡ଼ିଛି ବୋଲି କହିବା ଏବେ ଉଚିତ ହେବ ନାହିଁ ।
