୯୦ ପଇସାର ପୁରୁଣା ଚାମଚ ୨ ଲକ୍ଷରେ ନିଲାମ

ଲଣ୍ଡନ: ଅନେକ ସମୟରେ ଗୋଟିଏ ସାମାନ୍ୟ ଜିନିଷ ମଧ୍ୟ ଜଣେ ମଣିଷର ଭାଗ୍ୟ ବଦଳାଇ ଦେଇପାରେ । ଏଭଳି ଏକ ଘଟଣା ନିକଟରେ ବ୍ରିଟେନରେ ଦେଖିବାକୁ ମିଳିଛି । ୯୦ ପଇସାରେ କିଣାଯାଇଥିବା ଏକ ପୁରୁଣା ଚାମଚ ୨ ଲକ୍ଷ ଟଙ୍କାରେ ନିଲାମ ହେବା ଫଳରେ ଚାମଚ ମାଲିକଙ୍କ ଭାଗ୍ୟ ଖୋଲିଯାଇଛି । ଏହି ସୌଭାଗ୍ୟଶାଳୀ ବ୍ୟକ୍ତିଜଣକ ଦିନେ ଲଣ୍ଡନ ରାସ୍ତାରେ ଯାଉଥିବାବେଳେ କବାଡିଆ ଦୋକାନରେ ରଖାଯାଇଥିବା ପୁରଣା କାଳିଆ ଜଙ୍କ୍ ଲାଗିଥିବା ଚାମଚ ଦେଖିବାକୁ ପାଇଥିଲେ । ସେ ଭାବିଲେ ଏହା ନିଶ୍ଚୟ ମଧ୍ୟଯୁଗୀୟ ସମୟର ଚାମଚ । କୌତୁହଳ ହେବାରୁ ସେ ଦୋକାନୀ ନିକଟରୁ ମାତ୍ର ୯୦ ପଇସାରେ ଚାମଚଟି କିଣିଥିଲେ । କିଛି ଦିନ ପରେ ବ୍ୟକ୍ତିଜଣକ ସୋମରସେଟ୍‌ରେ ଥିବା ଲରେନ୍ସ ଅକ୍ସନ କମ୍ପାନୀ କାର୍ଯ୍ୟାଳୟକୁ ଯାଇ ଚାମଚକୁ ନିଲାମ ତାଲିକାଭୁକ୍ତ କରିଥିଲେ । କମ୍ପାନୀର ବିଶେଷଜ୍ଞମାନେ ପରୀକ୍ଷା କରି ଜାଣିବାକୁ ପାଇଥିଲେ ଯେ ରୂପାରେ ତିଆରି ଉକ୍ତ ଚାମଚଟି ୧୩ଶ ଶତାବ୍ଦୀ ପୁରୁଣା । କମ୍ପାନୀ ପକ୍ଷରୁ ଉକ୍ତ ବ୍ୟକ୍ତିଙ୍କୁ ଚାମଚ ମୂଲ୍ୟ ବାବଦରେ ୫୧,୭୧୨ ଟଙ୍କାର ପ୍ରସ୍ତାବ ଦିଆଯାଇଥିଲା । ତେବେ ଏହା ମନକୁ ନ ପାଇବାରୁ ସେ ଚାମଚକୁ ଅନଲାଇନ ନିଲାମ ପ୍ରକ୍ରିୟାରେ ସାମିଲ କରିଥିଲେ । ଶେଷରେ ଏହା ୧,୯୭,୦୦୦ ଟଙ୍କାରେ ନିଲାମ ହୋଇଥିବା ଜଣାପଡିଛି । ଟିକସ ଓ ଅନ୍ୟାନ୍ୟ ଖର୍ଚ୍ଚ ମିଶାଇ ଉକ୍ତ ବ୍ୟକ୍ତିଙ୍କୁ ଚାମଚ ବିକ୍ରିରୁ ୨ ଲକ୍ଷ ଟଙ୍କା ମିଳିଛି । ଏହି ଅର୍ଥରେ ବ୍ୟକ୍ତିଜଣକ ସପରିବାର ଇଷ୍ଟ ଲଣ୍ଡନର ଏକ ରିସର୍ଟରେ ଛୁଟି କଟାଇବାକୁ ଯୋଜନା କରିଛନ୍ତି ।