କନ୍ଧମାଳ : ପୁଣି ନକ୍ସଲଙ୍କ ବର୍ବରତା | ଜୋର ଜବରଦସ୍ତ ଘରେ ପଶି ଜଣେ ଯୁବକକୁ ଗୁଳିକରି ମାରିଛନ୍ତି | ଘଟଣାଟି ଘଟିଛି କନ୍ଧମାଳ ଜିଲ୍ଲା କ. ନୂଆଗାଁ ଥାନା ଅନ୍ତର୍ଗତ ବୁଡ୍ରୁମାହା ଗାଁରେ | ପୁଲିସ୍ ଇନ୍ଫର୍ମର ସନ୍ଦେହରେ ନକ୍ସଲମାନେ ଏଭଳି କରିଛନ୍ତି । ତାଙ୍କ ନାଁ ରଞ୍ଜନ ଦିଗାଲ। ତାଙ୍କ ଘର ବାଲିଗୁଡ଼ା ଥାନା ରେବିଙ୍ଗିଆ ପଞ୍ଚାୟତର ମାରଦୁଲି ଗାଁରେ। ତେବେ ତାଙ୍କ ପତ୍ନୀ ବୁଡ୍ରୁମାହାରେ ଅଙ୍ଗନବାଡ଼ି କର୍ମୀ ଭାବେ କାମ କରୁଥିବାରୁ ସେ ଏଠାରେ ବର୍ଷେ ହେବ ରହୁଥିଲେ।
ଗତକାଲି ରାତି ପ୍ରାୟ ୯ଟା ବେଳେ ୬ରୁ ୭ ଜଣ ନକ୍ସଲ ରଞ୍ଜନଙ୍କ ବୁଡୁମାହା ସ୍ଥିତ ଘରକୁ ଆସିଥିଲେ ଓ ତାଙ୍କୁ ଡାକିଥିଲେ। ହେଲେ ସେ କବାଟ ନ ଖୋଲି ନଥିଲେ। ତେଣୁ ନକ୍ସଲମାନେ କବାଟ ଭାଙ୍ଗି ଘର ଭିତରେ ପଶିଥିଲେ ଓ ତାଙ୍କୁ ଗୁଳି କରିଥିଲେ। ଏହାପରେ ତାଙ୍କ ମୃତଦେହକୁ ଗାଁ ସ୍କୁଲ ନିକଟରେ ଫିଙ୍ଗି ଦେଇଥିଲେ। ମୃତଦେହ ନିକଟରେ ସେମାନେ ପୋଷ୍ଟର ଛାଡ଼ି ଯାଇଥିଲେ। ଏଥିରେ ସିପିଆଇ ନକ୍ସଲ କେକେବିଏନ୍ ଡିଭିଜନାଲ କମିଟି ପକ୍ଷରୁ ରଞ୍ଜନଙ୍କୁ ମୃତ୍ୟୁଦଣ୍ଡ ଦିଆଯାଇଛି ବୋଲି ଲେଖା ହୋଇଥିଲା। ଘଟଣାଟି ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି କରିଛି |
ପୁଣି ନକ୍ସଲଙ୍କ ବର୍ବରତା : ଘରେ ପଶି ଗୁଳି କଲେ
