ଭୁବନେଶ୍ୱର: ବର୍ତମାନ କୋଭିଡ ୧୯ ମହାମାରୀ ଦେଶରେ ବ୍ୟାପିଛି । ଯାହାଫଳରେ ଲୋକମାନଙ୍କର ଯାତାୟାତ କମିଯାଇଛି । ଆଉ ରାଜ୍ୟରେ ଏବେ ବି ଏକପ୍ରକାର ଲକ ଡାଉନ ଜାରି ରହିଛି କହିଲେ ଅତ୍ୟୁକ୍ତି ହେବ ନାହିଁ । ତେବେ ଏହାର ବେଶ ଫାଇଦା ଉଠାଉଛନ୍ତି ଦୁବୃତ୍ତ । ଖୋର୍ଦ୍ଧା ଜିଲ୍ଲା ଜଟଣୀ ଥାନା ଅନ୍ତର୍ଗତ ପଦନପୁର ଗ୍ରାମ ନିକଟ ମଶାଣି ତଥା ତା ନିକଟରୁ ରାତାରାତି ଟ୍ରକ ଟ୍ରକ ମୋରମ ବୋହି ନେଇଯାଉଥିବା ଦୃଶ୍ୟ ଦେଖିବାକୁ ମିଳିଛି । ପ୍ରାୟ ୬ ମାସ ଧରି ଏହା ଚାଲିଛି । ତେବେ ତହସିଲ ଅଫିସ ଠାରୁ ମାତ୍ର ୧ କିମି ଦୂରରେ ଏହି କାରନାମା ହେଉଥିବାରୁ ତହସିଲଦାର କିପରି ଜାଣିପାରୁନାହାନ୍ତି ସେ ନେଇ ଏବେ ପ୍ରଶ୍ନ ଉଠିଛି । ଖାଲି ଏତିକି ନୁହେଁ, ମଶାଣି ଜାଗା ସହ ତା ନିକଟରେ ଥିବା ସରକାରୀ ଜାଗା ମଧ୍ୟ କ୍ଷତି ହେବାକୁ ଲାଗିଲାଣି ବୋଲି ପଦନପୁର ଗ୍ରାମ୍ୟ ବିକାଶ ସମିତି ପକ୍ଷରୁ ଖୋର୍ଦ୍ଧା ଜିଲ୍ଲାପାଳଙ୍କ ନିକଟକୁ ପତ୍ର ଲେଖାଯାଇଛି ।
ତେବେ ଏହାର ତଦନ୍ତ କରାଯାଇ ଏଥିରେ ସଂପୃକ୍ତ ଥିବା ବ୍ୟକ୍ତିଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ଉକ୍ତ ଜାଗାଟିକୁ କିପରି ସଂପୂର୍ଣ୍ଣ ରୂପେ ପୋତାଯାଇ ତାକୁ ପୂର୍ବାବସ୍ଥାକୁ ଅଣାଯାଇପାରିବ ତାର ବ୍ୟବସ୍ଥା କରିବାକୁ ପତ୍ରରେ ଉଲ୍ଲେଖ କରାଯାଇଛି । ବାରମ୍ବାର ଅଭିଯୋଗ ହେଉଥିଲେ ମଧ୍ୟ ପ୍ରଶାସନ ଶୁଣୁନଥିବା ସୂଚନା ମିଳିଛି ।
ଲକ ଡାଉନର ଫାଇଦା ଉଠାଇ ବୋହି ନେଉଛନ୍ତି ଶହ ଶହ ଟ୍ରକ ମୋରମ, ଅଭିଯୋଗ ଶୁଣୁନି ପ୍ରଶାସନ
