ଭୁବନେଶ୍ୱର: ଦୁହେଁ ସବୁବେଳେ ଏକାଠି ବୁଲନ୍ତି । ଘନିଷ୍ଠ ବନ୍ଧୁ ହୋଇଥିବାରୁ ଏକାଠି ମଦ, ମହୁଲି ପିଇ ମଜା ବି କରନ୍ତି । ହେଲେ ଏମିତି କେଉଁ ପରିସ୍ଥିତି ଆସିଲା ଯେ, ଜଣେ ଅନ୍ୟଜଣଙ୍କୁ ହତ୍ୟା କରିବାକୁ ପଛାଇଲା ନାହିଁ । ଏଭଳି ଘଟଣା ମଞ୍ଚେଶ୍ୱର ଥାନା ଅନ୍ତର୍ଗତ ଧିରୁକୁଟି ବସ୍ତିରେ ଚାଞ୍ଚଲ୍ୟ ସୃଷ୍ଟି କରିଛି । ଏହି ଘଟଣା ବନ୍ଧୁ-ବନ୍ଧୁ ମଧ୍ୟରେ ଥିବା ସମ୍ପର୍କରୁ ବିଶ୍ୱାସ ଉଠାଇଦେଇଛି । ମହୁଲି ନିଶାରେ ସାମାନ୍ୟ ଝଗଡ଼ାରୁ ଏଭଳି ଘଟଣା ଘଟିଥିବା କେହି କହୁଥିବାବେଳେ, ପରକୀୟା ପ୍ରୀତି ସମ୍ପର୍କରେ ପ୍ରଘଟ କରିଦେବା ଭୟରେ ତାଙ୍କୁ ହତ୍ୟା କରିଥିବା କୁହାଯାଉଛି । ଧିରୁକୁଟି ସାହି ବସ୍ତିରେ ରହୁଥିବା ଲାଲମୋହନ ଟୁଡୁଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି ।
ଏନେଇ ତାଙ୍କ ସ୍ତ୍ରୀ’ ଥାନାରେ ଅଭିଯୋଗ କରିଛନ୍ତି । ଅଭିଯୋଗକୁ ଭିତ୍ତି କରି ପୁଲିସ କେସ୍ ନଂ ୩୧୯/୨୧ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି । ଏହାସହ ମୃତକଙ୍କ ସାଙ୍ଗ ତଥା ଅଭିଯୁକ୍ତ ମଙ୍ଗଳ ହେମ୍ବ୍ରମ୍(୩୦)କୁ ପୁଲିସ ଅଟକ ରଖି ପଚରାଉଚରା କରୁଛି । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ପ୍ରକୃତରେ ତାଙ୍କୁ ହତ୍ୟା କରାଯାଇଛି ନା ନାହିଁ ଜଣାପଡ଼ିବ ବୋଲି ପୁଲିସ କହିଛି ।
ମନମୋହନ ସ୍ତ୍ରୀ’ଙ୍କ କହିବାନୁସାରେ, ମନମୋହନ ଏବଂ ମଙ୍ଗଳ ମିଶି ସୈନିକ ସ୍କୁଲ ପଡ଼ିଆକୁ ଯାଇଥିଲେ । ତାଙ୍କ ସହିତ ଜଣେ ମହିଳା ବି ଯାଇଥିଲେ । ମଙ୍ଗଳ ଏବଂ ସମ୍ପୃକ୍ତ ମହିଳାଙ୍କ ମଧ୍ୟରେ ଖରାପ ସମ୍ପର୍କ ରହିଛି । ଏହି କଥା ମନମୋହନ ପ୍ରଘଟ କରିଦେବା କହିବାରୁ ତାଙ୍କୁ ମଙ୍ଗଳ ପିଟିପିଟି ହତ୍ୟା କରିଛି । ଅନ୍ୟପକ୍ଷେ ମହୁଲି ନିଶାରେ ଉଭୟ ସବୁବେଳେ ଅଳ୍ପ ସମୟ ପାଇ କଥା କଟାକଟି ହୁଅନ୍ତି ।
କଥା କଟାକଟିକୁ ନେଇ ଝଗଡ଼ା ହେବାରୁ ମଙ୍ଗଳ ତାଙ୍କୁ ମାରିଥାଇପାରେ ବୋଲି ବସ୍ତିରେ ଚର୍ଚ୍ଚା ହେଉଛି । ସୂଚନା ଅନୁଯାୟୀ, ମନମୋହନ ଜଣେ ରାଜମିସ୍ତ୍ରୀ । ସେ ଭୁବନେଶ୍ୱରର ବିଭିନ୍ନ ଅଞ୍ଚଳକୁ ଯାଇ କାମ କରନ୍ତି । ଧିରୁକୁଟି ବସ୍ତିିରେ ୨ପୁଅ ଓ ସ୍ତ୍ରୀ’ ସାଙ୍ଗରେ ସେ ରୁହନ୍ତି । ଗତ ବୁଧବାର ସନ୍ଧ୍ୟାରେ ସବୁଦିନ ଭଳି ମନମୋହନ ତାଙ୍କ ବନ୍ଧୁ ମଙ୍ଗଳ ହେମ୍ବ୍ରମ୍ ଝାଡ଼ା ବସିବା ସହ ମହୁଲି ପିଇବାକୁ ସାଙ୍ଗରେ ଡାକି ନେଇଯାଇଥିଲେ । ସେମାନେ ପାଚେରୀ ଡେଇଁ ସୈନିକସ୍କୁଲ ପଡିଆ ଭିତରକୁ ଝାଡ଼ା ବସିବାକୁ ଯାଇଥିଲେ । ସେଠାରେ ଝାଡ଼ା ବସିବା ସହ ମହୁଲି ମଧ୍ୟ ପିଇଥିଲେ । କିଛି ସମୟ ପରେ ମଙ୍ଗଳ ଘରକୁ ଫେରିଥିବାବେଳେ ମନମୋହନ ଫେରିନଥିଲେ ।
ରାତି ୮ଟା ହୋଇଯାଇଥିଲେ ବି ବାପା ଘରକୁ ନଫେରିବାରୁ ପିଲାଙ୍କ ସନ୍ଦେହ ହୋଇଥିଲା । ଏନେଇ ତାଙ୍କ ପୁଅ ମେଘନାଥ ଟୁଡୁ ସବୁଆଡ଼େ ଖୋଜାଖୋଜି କରିଥିଲେ । ପରେ ସେ ମଙ୍ଗଳଙ୍କୁ ନେଇ ସୈନିକସ୍କୁଲ ପଡ଼ିଆ ଭିତରକୁ ଯାଇଥିଲେ । ସେଠାରେ ଏକ ବୁଦା ଭିତରେ ମନମୋହନ ଅଚେତ୍ ଅବସ୍ଥାରେ ପଡ଼ିବା ସହ ତାଙ୍କ ଶରୀରରେ କ୍ଷତ ଚିହ୍ନ ଥିଲା । ରାତି ୧୦ଟାରେ ମେଘନାଥ ଓ ମଙ୍ଗଳ ମିଶି ମନମୋହନଙ୍କୁ କ୍ୟାପିଟାଲ ହସ୍ପିଟାଲ ନେଇଥିଲେ । ସେଠାରେ ଡାକ୍ତର ମୃତ ଘୋଷଣା କରିଥିଲେ ।
ଏହାପରେ ସେମାନେ ତାଙ୍କୁ ଘରକୁ ନେଇଆସିଥିଲେ । ହେଲେ ଗୁରୁବାର ତାଙ୍କ ସ୍ୱାମୀକୁ ମଙ୍ଗଳ ହତ୍ୟା କରିଥିବା ନେଇ ମନମୋହନଙ୍କ ସ୍ତ୍ରୀ’ ଥାନାରେ ଏତଲା ଦେଇଛନ୍ତି । ଏତଲା ପାଇ ପୁଲିସ ଘଟଣାସ୍ଥଳରେ ପହଞ୍ଚି ଶବକୁ ଜବତ କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଇଥିଲା । ଏହାସହ ଘଟଣାସ୍ଥଳକୁ ସାଇଣ୍ଟିଫିକ୍ ଟିମ୍ ଯାଇ ନମୁନା ସଂଗ୍ରହ କରିଛି । ପୁଲିସ ମନମୋହନ ସ୍ତ୍ରୀ’ଙ୍କ ବୟାନ ରେକର୍ଡ କରିବା ସହ ଅନ୍ୟମାନଙ୍କର ମଧ୍ୟ ରେକର୍ଡ କରିଛି ।
