କଟକ : ବ୍ୟାଙ୍କ୍ ଗ୍ରାହକଙ୍କୁ ଠକିବା ପାଇଁ ସାଇବର ଠକମାନେ ନୂଆନୂଆ ତରିଆ ଆପଣାଉଛନ୍ତି । ଏହି କ୍ରମରେ କ୍ୟାସ୍ବ୍ୟାକ୍ ପାଇବା ଚକ୍କରରେ ଜଣେ ବ୍ୟକ୍ତି ସର୍ବସ୍ୱ ହରାଇଛନ୍ତି । ଏକ ଅଜଣା ନମ୍ବରରୁ ଫୋନ୍ ପାଇ ଏକ ଆପ୍ ଡାଉନ୍ଲୋଡ୍ ପରେ ଏଭଳି ଘଟଣା ଘଟିଛି । ଠକେଇର ଶିକାର ହୋଇଥିବା ବ୍ୟକ୍ତି ଏନେଇ ପୁରୀଘାଟ ଥାନାରେ ଏତଲା ଦାୟର କରିଛନ୍ତି । ପୁଲିସ ମାମଲା ରୁଜୁ କରି ତଦନ୍ତ ଜାରି ରଖିଛି ।
ମିଳିଥିବା ସୂଚନା ଅନୁସାରେ, ପୁରୀଘାଟ ଥାନା ଅଞ୍ଚଳରେ କିଶୋର ମଙ୍ଗରାଜ ନାମକ ବ୍ୟକ୍ତି ରହୁଛନ୍ତି । ଗଲା ସପ୍ତାହରେ ଶ୍ରୀ ମଙ୍ଗରାଜଙ୍କ ଫୋନ୍କୁ ଏକ ଅଜଣା ନମ୍ବରରୁ ଫୋନ୍ ଆସିଥିଲା । ଫୋନ୍ କରିଥିବା ବ୍ୟକ୍ତି ଏକ ଅନ୍ଲାଇନ୍ ଟଙ୍କା ଟ୍ରାନ୍ସଫର ‘ଆପ୍’ର କର୍ମଚାରୀ ବୋଲି କହିଥିଲେ । ତେବେ ଶ୍ରୀ ମଙ୍ଗରାଜଙ୍କୁ ଉକ୍ତ ବ୍ୟକ୍ତି ଜଣକ କହିଥିଲେ କି, ଆପଣଙ୍କ ଆକାଉଣ୍ଟକୁ ୨୫୦୦ ଟଙ୍କାର କ୍ୟାସ୍ବ୍ୟାକ୍ ଆସିବ । ଆପଣଙ୍କ ଫୋନ୍ ନଂ ଏଥି ପାଇଁ ଚୟନ କରାଯାଇଛି । ଏହା ଶୁଣିବା ପରେ ଶ୍ରୀ ମଙ୍ଗରାଜ ପଚାରିଥିଲେ କି ଏହି ଟଙ୍କା କିଭଳି ମିଳିବ? ଫୋନ୍ କରିଥିବା ବ୍ୟକ୍ତି ଜଣକ ଏକ ଆପ୍ ଡାଉନଲୋଡ୍ କରିବା ପାଇଁ ତାଙ୍କୁ କହିଥିଲା । ଏହି ଆପ୍ ଡାଉନଲୋଡ୍ କରି କିଛି ତଥ୍ୟ ପ୍ରଦାନ କଲେ ଏହି ଟଙ୍କା ମିଳିବ ବୋଲି ଫୋନ୍ କରିଥିବା ବ୍ୟକ୍ତି ଜଣକ କହିଥିଲା । ଏହା ପରେ ଶ୍ରୀ ମଙ୍ଗରାଜ ନିଜ ଫୋନ୍ରେ ଉକ୍ତ ଆପ୍କୁ ଡାଉନ୍ଲୋଡ୍ କରିଥିଲେ ।
ପରେ ସେହି ଆପ୍ରେ ଆକାଉଣ୍ଟ ସମ୍ପର୍କରେ କିଛି ତଥ୍ୟ ପ୍ରଦାନ କରିଥିଲେ । ଏଥି ସହିତ ଫୋନ୍ କରିଥିବା ବ୍ୟକ୍ତି ଜଣକ ଫୋନ୍ ଯୋଗେ ମଧ୍ୟ କିଛି ତଥ୍ୟ ଶ୍ରୀ ମଙ୍ଗରାଜଙ୍କଠାରୁ ସଂଗ୍ରହ କରିଥିଲେ । ବାସ୍ ଏହା ପରେ ଶ୍ରୀ ମଙ୍ଗରାଜଙ୍କ ଆକାଉଣ୍ଟରୁ ଏକାଧିକ ଥରରେ ପ୍ରାୟ ୭୭ ହଜାର ଟଙ୍କା କଟିଯାଇଥିଲା । ଏହା ଦେଖି ଶ୍ରୀ ମଙ୍ଗରାଜଙ୍କ ହୋସ୍ ଉଡ଼ିଯାଇଥିଲା । ହଠାତ୍ ଏହି କଥାକୁ ସେ ଭଲ ଭାବେ ବୁଝି ପାରିନଥିଲେ । ପରେ ଆକାଉଣ୍ଟ ଚେକ୍ କରିବାରୁ ନିଜର ଭୁଲ୍ ଜାଣିପାରିଲେ । ମାତ୍ର ସେତେ ବେଳକୁ ଆଉ କଛି କରିବାର ନଥିଲା । ତେଣୁ ସେ ନିରାଶ ହୋଇ ପୁରୀଘାଟ ଥାନାରେ ଏତଲା ଦାୟର କଲେ ।
ଏଥିରୁ ଏକ ନୂଆ ତରିକାରେ ସାଇବର ଠକମାନେ ଟଙ୍କା ଠକିଥବା ପୁଲିସ ଜାଣିବାକୁ ପାଇଥିଲା । ଶ୍ରୀ ମଙ୍ଗରାଜ ଡାଉନ୍ଲୋଡ୍ କରିଥିବା ଉକ୍ତ ଆପ୍ଟି ନକଲି ବୋଲି ପୁଲିସ ଅନୁମାନ କରୁଛି । ତେବେ ଏନେଇ ଆଇପିସିର ଧାରା ୪୨୦ ଓ ଆଇଟି ଆକ୍ଟର ଧାରା ୬୬–ଡି ରେ ଏକ ମାମଲା ରୁଜୁ କରି ପୁଲିସ ତଦନ୍ତ କରୁଛି । ଅନ୍ୟପକ୍ଷରେ ଅଜଣା ଫୋନ୍ ନମ୍ବର ବା ଇମେଲ୍ ଦ୍ୱାରା ପ୍ରଭାବିତ ହୋଇ ଟଙ୍କା ସମ୍ପର୍କିତ କୌଣସି କାମ ନକରିବାକୁ ଥାନା ଅଧିକାରୀ ରଶ୍ମୀରଂଜନ ସାହୁ ପରାମର୍ଶ ଦେଇଛନ୍ତି ।
