ତ୍ରିନିଦାଦ: ଟିମ୍ ଇଣ୍ଡିଆ ଷ୍ଟାର୍ ବ୍ୟାଟର୍ ବିରାଟ କୋହଲିଙ୍କ ସାରା ବିଶ୍ୱରେ ବହୁ ପ୍ରଂଶସକ ରହିଛନ୍ତି । ଏହି ଷ୍ଟାର୍ ଖେଳାଳିଙ୍କୁ ଶୁକ୍ରବାର ତାଙ୍କର ଜଣେ ଅଦ୍ୱିତୀୟ ପ୍ରଶଂସକ ଭେଟିଛନ୍ତି । ସେ ହେଲେ ୱେଷ୍ଟ୍ଇଣ୍ଡିଜ୍ ୱିକେଟ୍କିପର୍ ଜୋଶୁଆ ଡା ସିଲ୍ଭାଙ୍କ ମା’ । ଏକ ଭାଇରାଲ୍ ଭିଡିଓରେ ଡା ସିଲ୍ଭାଙ୍କ ମା’ କୋହଲିଙ୍କୁ ଆଲିଙ୍ଗନ କରିବା ସହିତ ନିଜ ପସନ୍ଦର କ୍ରିକେଟର୍ଙ୍କୁ ଭେଟିବା ପରେ ଭାବବିହ୍ୱଳ ହୋଇପଡ଼ିଥିବା ଦେଖିବାକୁ ମିଳିଛି ।
ଏହି ହୃଦୟସ୍ପର୍ଶୀ ଘଟଣାର ପୂର୍ବଦିନ ମ୍ୟାଚ୍ ବେଳେ ତାଙ୍କ ମା’ କୋହଲିଙ୍କର ଜଣେ ବଡ଼ ପ୍ରଂଶସକ ବୋଲି ଡା’ ସିଲ୍ଭା ତାଙ୍କୁ କହିଥିଲେ । କେବଳ ବିରାଟ କୋହଲିଙ୍କୁ ଦେଖିବାକୁ ପାଇଁ ସେ ଷ୍ଟାଡିୟମ୍ ଆସିଥିବା ଡା ସିଲ୍ଭା କହିଥିଲେ । ଶୁକ୍ରବାର କୋହଲି ନିଜର ୫୦୦ତମ ମ୍ୟାଚ୍ରେ ଶତକ ହାସଲ କରିବାରେ ବିଶ୍ୱର ପ୍ରଥମ ବ୍ୟାଟର୍ ମଧ୍ୟ ହୋଇଥିଲେ । ଏହା ଟେଷ୍ଟ୍ କ୍ରିକେଟ୍ରେ ତାଙ୍କର ୨୯ତମ ଶତକ ଥିଲା । ମ୍ୟାଚ୍ ପରେ ଡା’ ସିଲ୍ଭାଙ୍କ ମା’ କୋହଲିଙ୍କୁ ଭେଟି ଆଲିଙ୍ଗନ କରିବା ସହିତ ଶତକ ପାଇଁ ତାଙ୍କୁ ବଧେଇ ଜଣାଇଥିଲେ । ଏହା ସହିତ ସେ ଏବଂ ଡା’ ସିଲ୍ଭା ତାଙ୍କ ବଡ଼ ପ୍ରଶଂସକ ବୋଲି କହିଥିଲେ । କୋହଲି ତାଙ୍କ ଦେଶକୁ ଆସି କ୍ରିକେଟ୍ ଖେଳୁଥିବା ଏକ ବଡ଼ କଥା ବୋଲି ମଧ୍ୟ ସେ ଜଣାଇଛନ୍ତି ।
