ଢାକା : ଅଗଷ୍ଟ ୩୦ରୁ ଆରମ୍ଭ ହେବାକୁ ଥିବା ଏସିଆ କପ୍ରୁ ବାଂଲାଦେଶ ଫାଷ୍ଟ୍ ବୋଲର୍ ଇବାଦତ୍ ହୁସେନ୍ ବାଦ୍ ପଡ଼ିଛନ୍ତି । ଗତମାସରେ ବାଂଲାଦେଶ ବିପକ୍ଷ ଦିନିକିଆ ସିରିଜ୍ ବେଳେ ଆଣ୍ଠୁରେ ଲାଗିଥିବା ଆଘାତରୁ ଇବାଦତ୍ ସୁସ୍ଥ ହୋଇପାରି ନାହାନ୍ତି । ଇବାଦତ୍ଙ୍କ ସ୍ଥାନରେ ଅନ୍କ୍ୟାପ୍ଡ ଫାଷ୍ଟ୍ ବୋଲର୍ ତନ୍ଜିମ୍ ହସନ୍ଙ୍କୁ ଦଳରେ ସାମିଲ କରାଯାଇଥିବା ବାଂଲାଦେଶ କ୍ରିକେଟ୍ ବୋର୍ଡ ପକ୍ଷରୁ ସୂଚନା ଦିଆଯାଇଛି । ତେବେ ଇବାଦତ୍ ବିଶ୍ୱକପ୍ ପାଇଁ ଫିଟ୍ ହୋଇପାରିବେ କି ନାହିଁ ସେ ସମ୍ପର୍କରେ ବୋର୍ଡ ପକ୍ଷରୁ ସ୍ପଷ୍ଟ କରାଯାଇ ନାହିଁ । ୧୦ ଦିନ ପୂର୍ବେ ଏସିପ୍ କପ୍ ପାଇଁ ଘୋଷିତ ୧୭ ଜଣିଆ ଦଳରେ ଇବାଦତ୍ଙ୍କ ସାମିଲ କରାଯାଇଥିଲା ।
ଗତବର୍ଷ ଅଗଷ୍ଟରେ ଜିମ୍ବାୱେ ବିପକ୍ଷରେ ଇବାଦତ୍ ଦିନିକିଆ ପଦାର୍ପଣ କରିଥିଲେ । ବର୍ତ୍ତମାନ ସୁଦ୍ଧା ହ୍ୱାଇଟ୍ ବଲ୍ କ୍ରିକେଟ୍ରେ ତାଙ୍କ ପ୍ରଦର୍ଶନ ଉନ୍ନତ ରହିଛି । ଇତିମଧ୍ୟରେ ସେ ୧୨ଟି ଦିନିକିଆ ମ୍ୟାଚ୍ ଖେଳିଥିବା ବେଳେ ପ୍ରତ୍ୟେକ ମ୍ୟାଚ୍ରେ ୱିକେଟ୍ ହାସଲ କରିଛନ୍ତି । ଅନ୍ୟପକ୍ଷରେ ଅନ୍କ୍ୟାପ୍ଡ ତନ୍ଜିମ୍ ହସନ୍ ୩୭ ଲିଷ୍ଟ୍-ଏ’ ମ୍ୟାଚ୍ରେ ୫୭ ୱିକେଟ୍ ହାସଲ କରିଛନ୍ତି । ଏହା ମଧ୍ୟରେ ଏସିସି ଇମର୍ଜିଂ ପୁରୁଷ ଏସିଆ କପ୍ ୨୦୨୩ର ତିନି ମ୍ୟାଚ୍ରେ ୯ ୱିକେଟ୍ ମଧ୍ୟ ସାମିଲ । ତନ୍ଜିମ୍ ୨୦୨୦ ଅଣ୍ଡର-୧୯ ୱାର୍ଲ୍ଡ କପ୍ ବିଜେତା ଦଳର ସଦସ୍ୟ ଥିଲେ ।
