ସ୍ତ୍ରୀ’କୁ ଖୁସି କରିବା ପାଇଁ ପୋଳିସ ସିଷ୍ଟମକୁ ହ୍ୟାକ କଲା ସ୍ୱାମୀ, ଶେଷରେ ଘଟିଲା କିଛି ଏପରି ଘଟଣା….

ମୁମ୍ବାଇ: ସ୍ତ୍ରୀ କୁ ଖୁସି କରିବା ପାଇଁ ମୁଣ୍ଡକୁ ଜୁଟିଲା ଅଜବ ବୁଦ୍ଧି । ଆଉ ଏହି କାରସାଦି ପାଇଁ ଏବେ ସ୍ୱାମୀଙ୍କୁ ଜେଲ ଯିବାକୁ ପଡିଛି । ସୂଚନା ଅନୁସାରେ ମୁମ୍ବାଇ ପୋଲିସ କ୍ରାଇମବ୍ରାଞ୍ଚ ଏବେ ଜଣେ ୨୭ ବର୍ଷୀୟ ସିଭିଲ ଇଂଜିନିୟରଙ୍କୁ ଗିରଫ କରିଛି । ଏହି ଇଂଜିନିୟର ଜଣକ ନିଜ ପତ୍ନୀଙ୍କ ପାସପୋର୍ଟ ଭେରିଫିକେସନ ପାଇଁ ପାସପୋର୍ଟ ଭେରିଫିକେସନ ବ୍ରାଞ୍ଚର ସିଷ୍ଟମକୁ ହ୍ୟାକ କରିଥିଲେ । ଏଭଳି କରି ଯୁବକ ଜଣକ ପତ୍ନୀଙ୍କ ସମେତ ଆଉ ଦୁଇଜଣଙ୍କ ପାସପୋର୍ଟକୁ ମଧ୍ୟ ମଞ୍ଜୁରୀ ଦେଇଦେଇଥିଲେ । ଏହି ଅଭିଯୁକ୍ତଙ୍କ ନାମ ରାଜା ବାବୁ ସାହ ହୋଇଥିବାବେଳେ ତାଙ୍କୁ ଉତ୍ତରପ୍ରଦେଶର ଗାଜିଆବାଦରୁ ଗିରଫ କରାଯାଇଛି । ପୋଲିସ କହିଛି ଯେ ଅଭିଯୁକ୍ତ ଜଣକ ନିଜ ପତ୍ନୀଙ୍କୁ ଖୁସି କରିବା ପାଇଁ ଏଭଳି ବାଟ ଆପଣାଇଥିଲେ । ତାଙ୍କ ପତ୍ନୀ ବିଦେଶ ଯିବା ପାଇଁ ପାସପୋର୍ଟ ଆବେଦନ କରିଥିଲେ । ତେବେ ପାସପୋର୍ଟ କିଭଳି ଶୀଘ୍ର ପୁଲିସ ଭେରିଫିକେସନ ହୋଇ ମିଳିଯିବ ସେଥିପାଇଁ ସେ ପାସପୋର୍ଟ ଭେରିଫିକେସନ ବ୍ରାଞ୍ଚର ସିଷ୍ଟମକୁ ହ୍ୟାକ କରିଥିଲେ । ଏନେଇ ଯେଭଳି କାହାର ସନ୍ଦେହ ନ ହେବ ସେଥିପାଇଁ ଆଉ ଦୁଇ ଜଣଙ୍କର ପାସପୋର୍ଟ ମଧ୍ୟ ଭେରିଫାଇ କରିଦେଇଥିଲେ । ଯେତେବେଳେ ବିନା ପୁଲିସ ତଦନ୍ତରେ ପାସପୋର୍ଟ ଭେରିଫାଇ ହୋଇଥିବାର ସନ୍ଦେହ ହୋଇଥିଲା ଏହା ପରେ ତଦନ୍ତ କରାଯାଇଥିଲା । ଶେଷରେ ଏହା ପଛରେ ରାଜା ବାବୁଙ୍କର ହାତ ଥିବା ଜଣାପଡିଥିଲା ।