ସ୍ତ୍ରୀର ଆତ୍ମହତ୍ୟା ଘଟଣାରେ ସ୍ୱାମୀ ଗିରଫ

ବୁଗୁଡା: ବୁଗୁଡ଼ା ଥାନା ଅନ୍ତର୍ଗତ ବାଲିପଦର ଗ୍ରାମରେ ଜଣେ ବିବାହିତା ମହିଳା ଗତକାଲି ବାପ ଘରେ ରଶି ଲଗାଇ ଆତ୍ମହତ୍ୟା କରିବା ଘଟଣାରେ ମହିଳାଙ୍କ ସ୍ୱାମୀ ବିରୁପାକ୍ଷ ମହାରଣାଙ୍କୁ ପୁଲିସ ଗିରଫ କରି ଆଜି କୋର୍ଟ ଚାଲାଣ କରିଛି । ମୃତକ ବାଲିପଦର ଶତପଥୀ କଲୋନୀର ସନ୍ୟାସୀ ମହାରଣାଙ୍କ ଝିଅ ରାଧାରାଣୀ ମହାରଣା(୨୨) ଓରଫ୍ ମାମା । ଦୁଇ ବର୍ଷ ତଳେ ମାମା ଆସ୍କା କଲେଜ ଛକରେ ରହୁଥିବା ବିଜୟ ମହାରଣାଙ୍କ ପୁଅ ବିରୁପାକ୍ଷଙ୍କୁ ବିବାହ କରିଥିବା ବେଳେ ବର୍ତ୍ତମାନ ତାଙ୍କର ବର୍ଷକର ଝିଅଟିଏ ଅଛି । ବିବାହ ପରଠାରୁ ପାରିବାରିକ କଳହରୁ ମାମା ବାପ ଘରେ ରହୁଥିଲେ । ଉଭୟ ପକ୍ଷ ପୁଣି ଆପୋଷ ଆଲୋଚନା ପରେ ଶାଶୁ ଘରକୁ ଫେରୁଥିଲେ । ତେବେ ପୁଣି ଝଗଡା କାରଣରୁ ମାମା ପ୍ରାୟ ୨୫ ଦିନ ହେଲା ବାପଘରେ ଆସି ରହୁଥିଲେ । ଗତ ମଙ୍ଗଳବାର ସକାଳ ସମୟରେ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ସକାଳ ପ୍ରାୟ ୧୧ ସମୟରେ ମାମା ଉପର ମହଲାକୁ ଯାଇ ବେକରେ ରଶି ଲଗାଇ ଆତ୍ମହତ୍ୟା କରିଥିଲେ । ପୋଲିସ୍ ଏକ ମାମଲା ରୁଜୁ କରି ସ୍ୱାମୀ ବିରୁପାକ୍ଷକୁ ଅଟକ ରଖି ପଚରା ଉଚରା ଜାରି ରଖିଥିବା ଜଣାପଡିଛି ।