ନୂଆଦିଲ୍ଲୀ: ଆସିଛି ୨୦୨୩ ଆର୍ଥିକ ବଜେଟ । ପ୍ରତି ବର୍ଷ ସଂସଦରେ ଆସିଥାଏ ବଜେଟ । କିନ୍ତୁ ଜାଣନ୍ତି କି ବଜେଟ ପାଇଁ କେତେ ସମୟ ଦରକାର । କଣ ଏହାର ପକ୍ରିୟା । ବଜେଟ ପ୍ରସ୍ତୁତ ପାଇଁ ସୁରକ୍ଷା ବ୍ୟବସ୍ଥା କେମିତି ହୋଇଥାଏ । ଅର୍ଥ ମନ୍ତ୍ରାଳୟ ସମେତ ଉଦ୍ୟୋଗ ଏବଂ ଅନେକ ସେକ୍ଟରର ସହଭାଗିତା ଆବଶ୍ୟକ ପଡିଥାଏ । ବଜେଟକୁ ଶେଷ ସ୍ପର୍ଶ ଦେବା ପାଇଁ ଆବଶ୍ୟକ ପଡିଥାଏ ୧୦ ଦିନ । ଆଉ ଯେଉଁ ୧୦ ଦିନ ସେହି କର୍ମଚାରୀ ବନ୍ଦୀ ଭଳି ଜୀବନ ବିତାଇଥାନ୍ତି ।
ବହୁତ ଗୋପନୀୟ ହୋଇଥାଏ ଏହି ପକ୍ରିୟା । ବଜେଟ ପ୍ରସ୍ତୁତରେ ସାମିଲ ଥିବା ପ୍ରତିଟି କର୍ମଚାରୀ ଘର ବା ସମ୍ପର୍କୀୟଙ୍କ ଠାରୁ ନିର୍ଦ୍ଧିଷ୍ଟ କିଛି ଦିନ ପାଇଁ ସମ୍ପର୍କ ଛିନ୍ନ କରିଥାନ୍ତି । ୧୦ ଦିନ ପର୍ଯ୍ୟନ୍ତ କାହାରି ସହ ସମ୍ପର୍କରେ ରୁହନ୍ତି ନାହିଁ । ଯଦି ଏହି ୧୦ ଦିନକୁ ମିନିଟରେ କନଭର୍ଟ କରିବା ତେବେ ଦେଖିବା ୧୪ ହଜାର ୪ଶହ ମିନିଟ ପର୍ଯ୍ୟନ୍ତ ଏମାନେ ବନ୍ଦୀ ହୋଇ ରହିଥାନ୍ତି । କେବଳ ସେହି ମାନଙ୍କୁ ଘରକୁ ଯିବାକୁ ଅନୁମତି ମିଳିଥାଏ, ଯେଉଁମାନେ ସେତିକି ବିଶ୍ୱସ୍ତ ଏବଂ ବରିଷ୍ଠ । କଡ଼ା କଡି ହୋଇଥାଏ ସୁରକ୍ଷା ବ୍ୟବସ୍ଥା । ବଜେଟ ପକ୍ରିୟାରେ ଯୋଡି ହୋଇଥିବା ପ୍ରତିଟି ବ୍ୟକ୍ତିଙ୍କୁ ସ୍କାନରରେ ରଖାଯାଇଥାଏ । କାହାକୁ ମଧ୍ୟ ବାହାରକୁ ବାହାରିବା ପାଇଁ ଅନୁମତି ମିଳିନଥାଏ ।
ବଜେଟ ଛପାଉଥିବା ବ୍ୟକ୍ତିଠାରୁ ପ୍ରସ୍ତୁତ କରୁଥିବା କର୍ମଚାରୀ, କାହାକୁ ମଧ୍ୟ ସହଯୋଗୀଙ୍କ ସହ ସମ୍ପର୍କ ରଖିବାକୁ ଅନୁମତି ମିଳିନଥାଏ । ସେଇଠି କରାଯାଇଥାଏ ସମସ୍ତ ବ୍ୟବସ୍ଥା । ଯଦି ବଜେଟ ପ୍ରସ୍ତୁତ ବେଳେ କୌଣସି କର୍ମଚାରୀ ଅସୁସ୍ଥ ହୋଇପଡନ୍ତି, ତେବେ ସେଇଠି ହିଁ ଚିକିତ୍ସାର ବ୍ୟବସ୍ଥା କରାଯାଇଥାଏ । ବଜେଟ ପ୍ରସ୍ତୁତ ବେଳେ କଟାହୋଇଯାଏ ଇଣ୍ଟରନେଟ ସୁବିଧା । ତଥ୍ୟ ଚୋରି ବା ଡାଟା ହ୍ୟାକ କାରଣରୁ ଏହାକୁ ଗୁରୁତ୍ୱ ଦିଆଯାଇଥାଏ । ସମସ୍ତ କମ୍ପ୍ୟୁଟରରୁ ନେଟର ସୁବିଧା କଟାହୋଇଯାଏ । କେବଳ କମ୍ପ୍ୟୁଟର ସହ ପ୍ରିଣ୍ଟର ମେସିନକୁ ସଂଯୋଗ ରଖାଯାଇଥାଏ ।
