ପାଟନା: ବିହାର ଛାପରା ଜିଲ୍ଲାରେ ଏକ ବଡ ଅଘଟଣ ଘଟିଛି । ଆଜି ଅପରାହ୍ନରେ ବିସ୍ଫୋରଣ ଘଟି ଏକ ଘର ଭୁଶୁଡି ପଡିବା ଫଳରେ ଘଟଣାସ୍ଥଳରେ ୬ ଜଣଙ୍କ ମୃତ୍ୟୁ ହୋଇଛି । କ୍ଷତିଗ୍ରସ୍ତ ହୋଇଥିବା ଘରର ଭଗ୍ନାବଶେଷ ତଳୁ ଅନ୍ୟ କିଛି ବ୍ୟକ୍ତିଙ୍କୁ ମଧ୍ୟ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ବିସ୍ଫୋରଣର କାରଣ ସମ୍ପର୍କରେ କିଛି ସ୍ପଷ୍ଟ ସୂଚନା ମିଳି ପାରିନାହିଁ ।
ସ୍ଥାନୀୟ ପୋଲିସ ଓ ଉଦ୍ଧାରକାରୀ ଟିମ ଘଟଣାସ୍ଥଳରେ ପହଞ୍ଚିଛନ୍ତି । ଘରେ କୌଣସି ବିସ୍ଫୋଟକ ସାମଗ୍ରୀ ରଖାଯାଇଥିବା କାରଣରୁ ଏପରି ହୋଇଥିବା ସନ୍ଦେହରେ ଫୋରେନସିକ ଟିମ ଓ ବମ ଡିସ୍ପୋଜାଲ ଟିମ ମଧ୍ୟ ଘଟଣାସ୍ଥଳରେ ତଦନ୍ତ ଆରମ୍ଭ କରିଛନ୍ତି । ତଦନ୍ତ ପରେ ବିସ୍ଫୋରଣର କାରଣ ସମ୍ପର୍କରେ ସୂଚନା ମିଳିବା ନେଇ ସ୍ଥାନୀୟ ଏସ.ପି ସନ୍ତୋଷ କୁମାର ସୂଚନା ଦେଇଛନ୍ତି । ଏପରି ଘଟଣା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଦେଖିବାକୁ ମିଳିଛି ।
