ଭୁବନେଶ୍ୱର: ଆସନ୍ତା ୨୮ ଓ ୨୯ ତାରିଖରେ ବନ୍ଦ ରହିବ ରାଜ୍ୟର ସମସ୍ତ ସ୍କୁଲ । ଦୋଳ ପୂର୍ଣ୍ଣିମା ଓ ହୋଲି ପାଇଁ ସ୍କୁଲ ବନ୍ଦ ରଖିବାକୁ ଘୋଷଣା ହୋଇଛି । ସ୍କୁଲ ବନ୍ଦ ନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଘୋଷଣା କରାଯାଇଛି ।
ସୂଚନାଯୋଗ୍ୟ, ଦେଶରେ କରୋନା ଏବେ ଉପରମୁହାଁ ହେବା କାରଣରୁ ହୋଲି ଫିକା ପଡିଛି । ଦେଶର ଅଧିକାଂଶ ରାଜ୍ୟରେ ହୋଲି ସମେତ ଅନ୍ୟ ପର୍ବ ପାଇଁ ଗାଇଡଲାଇନ ଜାରି କରାଯାଇଛି । କୋଣସି ପ୍ରକାରର ସମାରୋହକୁ ଅନୁମତି ମିଳିବ ନାହିଁ । ରାଜ୍ୟରେ ବୃଦ୍ଧି ପାଉଥିବା ମହାମାରୀ କରୋନା ସଂକ୍ରମଣ ଜିଲ୍ଲା ପ୍ରଶାସନର ମୁଣ୍ଡବ୍ୟଥାର କାରଣ ପାଲଟିଛି । ସ୍ଥିତି ଯେପରି ଆୟତରେ ରହିବ ସେ ନେଇ ଜିଲ୍ଲା ପ୍ରଶାସନ ତତ୍ପର ହେବା ସହିତ ଦୋଳ ଓ ହୋଲି ପର୍ବ ସର୍ବସାଧାଣଙ୍କ ସ୍ଥାନରେ ପାଳନ କରିବାକୁ ବାରଣ କରିବା ସହିତ କୌଣସି ଶୋଭାଯାତ୍ରା, ସାଂସ୍କୃତିକ କାର୍ଯ୍ୟକ୍ରମ, ଦୋଳ ନାଚ ଉପରେ ଅଙ୍କୁଶ ଲଗାଇବା ସହ ଏଥିପ୍ରତି ଦୃଷ୍ଟି ଦେବାକୁ ପ୍ରଶାସନ ଅଧିକାରୀମାନଙ୍କୁ ପରାମର୍ଶ ଦିଆଯାଇଛି । ଆସନ୍ତା ୨୮ ଓ ୨୯ ତାରିଖରେ ସର୍ବସାଧାରଣ ସ୍ଥାନରେ ହୋଲି ଉତ୍ସବ ପାଳନକୁ ନିଷିଦ୍ଧ କରାଯାଇଛି । ଲୋକମାନେ ନିଜ ଘରେ ପରିବାର ଲୋକଙ୍କ ସହ ହୋଲି ଉତ୍ସବ ପାଳନ କରିପାରିବେ । ସ୍ଥାନୀୟ ପରିସ୍ଥିତିକୁ ଦୃଷ୍ଟିରେ ରଖି ଜିଲ୍ଲାପାଳ ବା ମ୍ୟୁନିସିପାଲ କମିଶନର ଅତିରିକ୍ତ କଟକଣା ଲଗାଇପାରିବେ ।
