ପାକିସ୍ତାନରେ ହିନ୍ଦୁ ଡାକ୍ତରଙ୍କୁ ହତ୍ୟା

କରାଚି : ପାକିସ୍ତାନର କରାଚିରେ ଜଣେ ହିନ୍ଦୁ ଡାକ୍ତର ବୀରବଲ ଜେନାନୀଙ୍କୁ ଗୁରୁବାର ଗୁଳିକରି ହତ୍ୟା କରାଯାଇଛି । ଚକ୍ଷୁରୋଗ ବିଶେଷଜ୍ଞ ଜେନାନୀ ପୂର୍ବରୁ କରାଚି ମେଟ୍ରୋପଲିଟାନ୍ କର୍ପୋରେସନ୍‌ର ସ୍ୱାସ୍ଥ୍ୟ ବିଭାଗର ପୂର୍ବତନ ସିନିୟର୍ ଡାଇରେକ୍ଟର ଥିଲେ । ପୁଲିସ ଏହି ଘଟଣାକୁ ଟାର୍ଗେଟ୍ କିଲିଂ କହିଛି । ପୁଲିସ ଅନୁସାରେ ଡାକ୍ତର ଜେନାନୀ ନିଜ ସହାୟକ ଡାକ୍ତରଙ୍କ ସହିତ ରାମସ୍ୱାମୀ ଅଞ୍ଚଳରୁ ଗୁଲ୍‌ଶନ୍‌-ଏ-ଇକ୍‌ବାଲ୍‌ସ୍ଥିତ ଘରକୁ ଯାଉଥିବା ବେଳେ ଜଣେ ଗନ୍‌ମ୍ୟାନ୍ ତାଙ୍କ କାର୍ ଉପରକୁ ଗୁଳି ଚଳାଇଥିଲା । ଆକ୍ରମଣରେ କାର୍ ନିୟନ୍ତ୍ରଣ ହରାଇ ଏକ କାନ୍ଥରେ ଧକ୍କା ଲାଗିବା ଫଳରେ ଡ. ଜେନାନୀଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା । ତାଙ୍କ ସହାୟକ ମଧ୍ୟ ଗୁଳିମାଡ଼ରେ ଆହତ ହୋଇଛନ୍ତି । ସିନ୍ଧ୍ ଗଭର୍ଣ୍ଣର୍ କାମରାନ୍ ଖାନ୍ ଘଟଣାରେ ଦୁଃଖ ପ୍ରକାଶ କରିବା ସହିତ ପୁଲିସ୍ ଠାରୁ ରିପୋର୍ଟ ମାଗିଛନ୍ତି ।