ନୂଆଦିଲ୍ଲୀ: ଦେଶରେ ପ୍ରଥମ ଥର ପାଇଁ ସୁନା ମୂଲ୍ୟ ୯୫ ହଜାର ଟଙ୍କା ଅତିକ୍ରମ କରିଛି। ଏହା ସୁନା ମୂଲ୍ୟରେ ସର୍ବକାଳୀନ ରେକର୍ଡ ସ୍ତର। ଇଣ୍ଡିଆ ବୁଲିୟନ୍ ଆଣ୍ଡ୍ ଜୁଏଲର୍ସ ଆସୋସିଏସନ୍ (ଆଇବିଜେଏ) ପକ୍ଷରୁ ଦିଆଯାଇଥିବା ସୂଚନାନୁସାରେ, ବୁଧବାର ଅର୍ଥାତ୍ ୧୬ ଏପ୍ରିଲରେ ମଲ୍ଟି କମୋଡିଟି ଏକ୍ସଚେଞ୍ଜ୍ (ଏମ୍ସିଏକ୍ସ)ରେ ୨୪ କ୍ୟାରେଟ୍ ସୁନା ମୂଲ୍ୟ ପ୍ରତି ୧୦ ଗ୍ରାମ୍ ୧.୦୬% ବୃଦ୍ଧି ପାଇଛି। ଫଳରେ ସୁନା ମୂଲ୍ୟ ୯୫,୦୦୦ ଅତିକ୍ରମ କରିଛି। ଦେଶର ଅଧିକାଂଶ ବଡ଼ ସହରରେ ସୁନା (୨୪ କ୍ୟାରେଟ୍) ମୂଲ୍ୟ ଆଜି ୯୫,୧୭୨ଟଙ୍କାରୁ ୯୫,୩୨୦ ଟଙ୍କା ପର୍ଯ୍ୟନ୍ତ ବିକ୍ରି ହୋଇଥିବା ସୂଚନା ମିଳିଛି। ସେହିପରି ରୂପା ମଧ୍ୟ ଆଜି ଦିନରେ ଉପର ମୁହାଁ ଧାରା ପ୍ରତିଫଳିତ ହୋଇଥିଲା, ଯାହା ୧.୫୬% ବୃଦ୍ଧି ପାଇ ୯୬,୨୫୩ ଟଙ୍କା ପ୍ରତି କିଲୋଗ୍ରାମ ଥିଲା, ଯାହା କିଛି ସମୟ ପାଇଁ ଇଣ୍ଟରଡେ ସର୍ବାଧିକ ୯୬,୩୪୪ ଟଙ୍କା ଛୁଇଁଥିଲା।
ଆମେରିକା ସରକାରଙ୍କ ନୂଆ ଟାରିଫ୍ ନୀତି ଯୋଗୁଁ ବାଣିଜ୍ୟ ଯୁଦ୍ଧର ଆଶଙ୍କା ବୃଦ୍ଧି ପାଇଛି। ଏହା ଅର୍ଥନୀତିର ଅଭିବୃଦ୍ଧି ହାରକୁ ମନ୍ଥର କରିପାରେ। ଅର୍ଥାତ୍ ଆଗାମୀ ଦିନରେ ବିଶ୍ୱ ମାନ୍ଦାବସ୍ଥାଜନିତ ଆଶଙ୍କା ବୃଦ୍ଧି ପାଇଛି। ଏପରି ପରିସ୍ଥିତିରେ, ଲୋକମାନେ ଏବେ ସୁନାରେ ସେମାନଙ୍କର ନିବେଶ ବୃଦ୍ଧି କରୁଛନ୍ତି। କାରଣ ମାନ୍ଦାବସ୍ଥା ସମୟରେ ସୁନାକୁ ଏକ ସୁରକ୍ଷିତ ନିବେଶ ଭାବରେ ବିବେଚନା କରାଯାଏ। ସେହିପରି ସୁନା ମୂଲ୍ୟ ବୃଦ୍ଧି ପାଇବାର ଅନ୍ୟ ଏକ କାରଣ ହେଉଛି, ଡଲାର ତୁଳନାରେ ଟଙ୍କା ଦୁର୍ବଳ ହେବା। କାରଣ ଯେତେବେଳେ ଟଙ୍କା ଦୁର୍ବଳ ହୁଏ, ଏହାକୁ ଆମଦାନୀ କରିବା ପାଇଁ ଅଧିକ ଟଙ୍କା ଖର୍ଚ୍ଚ ହୁଏ। ଏହି ବର୍ଷ ଟଙ୍କାର ମୂଲ୍ୟ ପ୍ରାୟ ୪% ହ୍ରାସ ପାଇଛି, ଯାହା ସୁନା ମୂଲ୍ୟ ଉପରେ ଚାପ ସୃଷ୍ଟି କରିଛି। ଅନ୍ୟତମ କାରଣ ମଧ୍ୟରେ ଆଗକୁ ଆସୁଥିବା ବିବାହ ଋତୁ। ବିବାହ ଋତୁରେ ସୁନା ଅଳଙ୍କାରର ଚାହିଦା ବୃଦ୍ଧି ପାଇବା ସୁନା ମୂଲ୍ୟକୁ କିଛି ମାତ୍ରାରେ ଉପରମୁହାଁ କରିଛି। ମୁମ୍ବାଇ, ଦିଲ୍ଲୀ ଏବଂ ଚେନ୍ନାଇ ଭଳି ସହରର ଅଳଙ୍କାର ବ୍ୟବସାୟୀମାନେ ରିପୋର୍ଟ କରିଛନ୍ତି ଯେ, ଲୋକମାନେ ସୁନାକୁ ନିବେଶ ଏବଂ ସମୃଦ୍ଧିର ପ୍ରତୀକ ଭାବରେ ଦେଖୁଥିବାରୁ ଉଚ୍ଚ ମୂଲ୍ୟ ସତ୍ତ୍ୱେ ବିକ୍ରୟ ଦ୍ରୁତ ଗତିରେ ହୋଇଥିଲା।
ଚଳିତ ବର୍ଷ ଏପର୍ଯ୍ୟନ୍ତ ସୁନା ୧୮,୪୧୭ ଟଙ୍କା ମହଙ୍ଗା ହୋଇଛି। ଅର୍ଥାତ୍ ଜାନୁଆରୀ ୧ ରୁ ଏପର୍ଯ୍ୟନ୍ତ, ୨୪ କ୍ୟାରେଟ୍ ସୁନାର ୧୦ ଗ୍ରାମ ମୂଲ୍ୟ ୭୬,୧୬୨ ଟଙ୍କାରୁ ୧୮,୪୧୭ ଟଙ୍କା ବୃଦ୍ଧି ପାଇ ୯୪,୫୭୯ ଟଙ୍କା ହୋଇଛି। ସେହି ସମୟରେ, ରୂପାର ମୂଲ୍ୟ ମଧ୍ୟ ପ୍ରତି କିଲୋଗ୍ରାମ ୮୬,୦୧୭ ଟଙ୍କାରୁ ୧୦,୫୫୮ ଟଙ୍କା ବୃଦ୍ଧି ପାଇ ୯୬,୫୭୫ ଟଙ୍କା ହୋଇଛି। ତେବେ ବର୍ଷ ଶେଷ ସୁଦ୍ଧା ସୁନା ମୂଲ୍ୟ ୧.୧୦ ଲକ୍ଷ ପର୍ଯ୍ୟନ୍ତ ପହଞ୍ଚିବ ବୋଲି ବଜାର ବିଶେଷଜ୍ଞ ଅନୁମାନ କରୁଛନ୍ତି। ଯଦି ସାମ୍ପ୍ରତିକ ଅନ୍ତର୍ଜାତୀୟ ବାଣିଜ୍ୟିକ ପରିସ୍ଥିତି ଉପରେ ନଜର ପକାଯାଏ ତେବେ ଭାରତରେ ୧୦ ଗ୍ରାମ ସୁନାର ମୂଲ୍ୟ ୧.୧୦ ଲକ୍ଷ ଟଙ୍କା ପର୍ଯ୍ୟନ୍ତ ଯାଇପାରେ। ବିଦେଶୀ ନିବେଶ ବ୍ୟାଙ୍କ ଗୋଲ୍ଡମ୍ୟାନ୍ ସାକ୍ସ ମଧ୍ୟ ଏପ୍ରକାର କିଛି ସମାନ ଆକଳନ କରିଛି।
