ମୋବାଇଲ୍‌ ପାଇଁ ସାଙ୍ଗ ନେଇଗଲା ସାଙ୍ଗର ଜୀବନ

ଉମରକୋଟ : ମୋବାଇଲ୍‌ ପାଇଁ ଜଣେ ସାଙ୍ଗ ଆଉ ଜଣେ ସାଙ୍ଗକୁ ହତ୍ୟା କରିଥିବା ଅଭିଯୋଗ ହୋଇଛି । ମୋବାଇଲ ହଜିବା ଘଟଣାକୁ କେନ୍ଦ୍ର କରି ଦୁଇ ଘନିଷ୍ଠ ସାଙ୍ଗଙ୍କ ମଧ୍ୟରେ ଯୁକ୍ତିତର୍କ ପରେ ଗଣ୍ଡଗୋଳ ଏବଂ ଜଣେ ଯୁବକ ତା ସାଙ୍ଗକୁ ପଥରରେ ଛେଚି ହତ୍ୟା କରିଛି । ଏହି ଅଭାବନୀୟ ଘଟଣାଟି ଘଟିଛି ନବରଙ୍ଗପୁର ଜିଲ୍ଲା ରାଇଘର ଥାନା ଅଞ୍ଚଳରେ । ଏଠାକାର ପାରୁଆ ପଞ୍ଚାୟତ ଛତାବେଡା ଆଦିବାସୀ ଗ୍ରାମରେ ଗତ ୭ ତାରିଖ ଦିନ ଘଟିଛି ଏହି ଅଘଟଣ । ସନ୍ଧ୍ୟା ସମୟରେ ଦୁଇ ସାଙ୍ଗ ଘନଶ୍ୟାମ ମାଝୀ ଓ ସୁକଲାଲ ରାଉତ ମଦ୍ୟପାନ କରିଥିଲେ । ଦୁହିଁଙ୍କ ମଧ୍ୟରେ ମୋବାଇଲ ହଜିବା ଘଟଣାକୁ ନେଇ ଯୁକ୍ତିତର୍କ ହୋଇଥିଲା । ପରେ ମାରପିଟ୍‌ ହେଲା । ଏହି ସମୟରେ ଘନଶ୍ୟାମ ସୁକଲାଲଙ୍କ ମୁଣ୍ଡକୁ ଏକ ପଥର ଛେଚି ଦେଇଥିଲେ । ଏଥିରେ ଗୁରୁତର ଆହତ ହୋଇ ସେ ତାଙ୍କ ଝିଅ ଘରେ ରହିଥିଲେ ।କାଲି ସନ୍ଧ୍ୟାରେ ତାଙ୍କର ମୃତ୍ୟୁ ଘଟିଥିଲା । ଗତକାଲି ରାତିରେ ସୁକଲାଲଙ୍କ ପରିବାର ପକ୍ଷରୁ ରାଇଘର ଥାନାରେ ଏତଲା ଦିଆ ଯାଇଥିଲା । ଏ ଜଘନ୍ୟ କାଣ୍ଡ ଘଟାଇଥିବା ଘନଶ୍ୟାମକୁ ପୋଲିସ୍ ଗିରଫ କରିଛି l