ପୋଖରୀ ହୁଡାରୁ ମହିଳାଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର : ହତ୍ୟା ଅଭିଯୋଗ ଆଣିଲେ ପରିବାର ବର୍ଗ 

ବାଲେଶ୍ୱର : ବାଲେଶ୍ୱର ଜିଲ୍ଲା ଭୋଗରାଇ କାନ୍ଥିଭଉଁରୀ ପଞ୍ଚାୟତର ବିଚିତ୍ରପୁର ଗାଁରେ ସୋମବାର ଏକ ହୃଦୟ ବିଦାରକ ଘଟଣା ଘଟିଯାଇଛି । ଘରଠାରୁ ପ୍ରାୟ ତିନିଶହ ମିଟର ଦୂର ଏକ ପୋଖରୀ ହୁଡାରୁ ଜଣେ ମହିଳାଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର ହୋଇଛି । ମୃତକଙ୍କ ଭାଇ ଏ ନେଇ ଭୋଗରାଇ ଥାନାରେ ହତ୍ୟା ଅଭିଯୋଗ କରିଛନ୍ତି । ତାଙ୍କ ଅଭିଯୋଗକୁ ଭିତ୍ତିକରି ପୁଲିସ ଏକ ମାମଲା ରୁଜୁ କରି ମୃତକଙ୍କ ଶାଶୂ, ଶଶୁର ଓ ଦେଢ଼ଶୁରଙ୍କୁ ଅଟକ ରଖି ତଦନ୍ତ ଚଳାଇଥିବା ଥାନାଧିକାରୀ ନରେନ୍ଦ୍ର ଦାସ କହିଛନ୍ତି । ମୃତ ମହିଳା ହେଉଛନ୍ତି ମାର୍କଣ୍ଡ ଗାରୁଙ୍କ ପତ୍ନୀ ମନି(୨୮) । ସୂଚନା ଅନୁଯାୟୀ,  ଭୋଗରାଇ ବ୍ଲକ ବିଚିତ୍ରପୁର ଗାଁର ରମଣୀ ଗାରୁଙ୍କ ମଝିଆ ପୁଅ ସପନ ଓ ସାନ ପୁଅ ମାର୍କଣ୍ଡ ପଶ୍ଚିମବଙ୍ଗ ପୂର୍ବମେଦିନୀପୁର ଜିଲ୍ଲା ରାମନଗର ଥାନା ଅଧୀନ ଫୁଲବାଡି ଗାଁର ବିଦ୍ୟାଧର ବେରାଙ୍କ ମଝିଆ ଝିଅ ଝୁମା ଓ ସାନ ଝିଅ ମନିଙ୍କୁ ଯଥାକ୍ରମେ ବିବାହ କରିଥିଲେ । ମାତ୍ର ମାର୍କଣ୍ଡଙ୍କ ସ୍ତ୍ରୀ ମନିଙ୍କ ନିଆଁରେ ପୋଡିହୋଇ ମୃତ୍ୟୁ ହେବା ଘଟଣା ସମସ୍ତଙ୍କୁ ଚକିତ କରିଛି । ପ୍ରାୟ ୬ବର୍ଷ ପୂର୍ବରୁ ମାର୍କଣ୍ଡ ତାଙ୍କ ଭାଇ ସପନର ଶାଳୀ ମନିଙ୍କୁ ଭଲପାଇ ବିବାହ କରିଥିଲେ । ଏବେ ମାର୍କଣ୍ଡ ଗୁଜରାଟରେ ରହି କାମଧନ୍ଦା କରୁଛନ୍ତି । ରବିବାର ସକାଳେ ଶାଶୂ ଯମୁନା ଓ ବଡ଼ଯାଆ ସସ୍ମିତାଙ୍କ ସହିତ ମନିଙ୍କର କଳି ଝଗଡ଼ା ହୋଇଥିଲା । ଏପରିକି ଦିନସାରା ସେ କିଛି ଖାଇ ନଥିଲେ । ରାତିରେ ତାଙ୍କୁ ମାଡ଼ମାରି ଘରଠାରୁ ଦୂର ପୋଖରୀ ହୁଡ଼ାରେ ପୋଡି ଦେବାକୁ ଉଦ୍ୟମ କରିଥିଲେ । ସୋମବାର ଭୋର ୪ଟାରେ ଗାଁ ଲୋକେ ଧୂଆଁ ବାହାରୁଥିବା ଦେଖିଥିଲେ । ଖବର ପାଇ ଚନ୍ଦନେଶ୍ୱର ଫାଣ୍ଡି ଓ ଭୋଗରାଇ ଥାନା ପୁଲିସ ଘଟଣାସ୍ଥଳରେ ପହଞ୍ଚି ଥିଲେ । ଏହାଛଡା ଅଧିକ ତଦନ୍ତ ପାଇଁ ସନ୍ଧାନୀ କୁକୁର ଓ ସାଇଣ୍ଟିଫିକ୍ ଟିମ୍ ମଧ୍ୟ ପହଞ୍ଚି ତଦନ୍ତ କରିଥିଲେ । ଏହାଛଡା ଘଟଣାସ୍ଥଳରେ ମାଜିଷ୍ଟ୍ରେଟ୍ ତଥା ଭୋଗରାଇ ଅତିରିକ୍ତ ତହସିଲଦାର ସନ୍ତୋଷ କୁମାର ପାଣିଗ୍ରାହୀ ଉପସ୍ଥିତ ଥିଲେ । ଘଟଣାସ୍ଥଳରୁ ପୁଲିସ ଏକ ଡିଆସିଲି ଜବତ କରିଛି । ସ୍ଥାନୀୟ ସରପଞ୍ଚଙ୍କ ପ୍ରତିନିଧି ଶ୍ରୀହରି ଜେନା, ସମାଜସେବୀ ସନ୍ତୋଷ ଦାସ ପହଞ୍ଚି ଘଟଣାର ସଠିକ ତଦନ୍ତ ପାଇଁ ଦାବି କରିଥିଲେ । ତେବେ ତାଙ୍କ ଭଉଣୀଙ୍କୁ ପ୍ରଥମେ ହତ୍ୟା କରାଯାଇ ପରେ ପୋଡ଼ିଦେବାକୁ ଉଦ୍ୟମ କରାଯାଇଥିବା ନେଇ ତାଙ୍କ ଭାଇ ଉତ୍ତମ ବେରା ଥାନାରେ ଲିଖିତ ଅଭିଯୋଗ କରିଛନ୍ତି । ଫଳରେ ପୁଲିସ ମୃତ ମନିଙ୍କ ଶଶୁର ରମଣୀ, ଶାଶୂ ଯମୁନା ଓ ଦେଢ଼ଶୁର ତଥା ଭିଣୋଇ ସପନକୁ ଅଟକ ରଖି ଅଧିକ ତଦନ୍ତ ଚଳାଇଛି । ସୂଚନାଯୋଗ୍ୟ, ମୃତ ମନିଙ୍କର ଗୋଟିଏ ୪ବର୍ଷ ଓ ଗୋଟିଏ ଦେଢ଼ବର୍ଷର ଦୁଇଟି ଝିଅ ଅଛନ୍ତି । ଶବ ବ୍ୟବଚ୍ଛେଦ ପାଇଁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ପଠାଯାଇଛି ।