ମହିଳା ହୋମଗାର୍ଡଙ୍କୁ ଛୁରାମାଡ କରି ଅଭିଯୁକ୍ତ ଗିରଫ

ରାୟଗଡ଼ା: ମହିଳା ହୋମଗାର୍ଡଙ୍କୁ ମାରଣାନ୍ତକ ଆକ୍ରମଣ ଘଟଣାରେ ପୁଲିସ ଜଣେ ଅଭିଯୁକ୍ତକୁ ଗିରଫ୍ କରିଛି । ଗିରଫ୍ ଅଭିଯୁକ୍ତ ହେଲେ ଚାନ୍ଦିଲି ଥାନା ଅନ୍ତର୍ଗତ ଭାଟ୍ଟିପଡା ଅଞ୍ଚଳର ରାଜେନ୍ଦ୍ର ମାଝି ବୋଲି ଏକ ସାମ୍ବାଦିକ ସମ୍ମିଳନୀରେ ରାୟଗଡା ଏସଡିପିଓ ଦିବ୍ୟଜ୍ୟୋତି ଦାସ ସୂଚନା ଦେଇଛନ୍ତି । ଗତ ୧୩ ତାରିଖ ଦିନ ମଦ୍ୟପ ରାଜେନ୍ଦ୍ର ମହିଳା ହୋମଗାର୍ଡ ରୀନା ବିଡ଼ିକା (୨୬) ଙ୍କୁ ଛୁରୀରେ ଆକ୍ରମଣ କରି ରକ୍ତାକ୍ତ କରିଥିଲେ । ଟ୍ରାଫିକ୍ ନିୟମ ଅବମାନନା କରିବାରୁ ହୋମଗାର୍ଡ ଜଣକ ଅଭିଯୁକ୍ତକୁ ଅଟକାଇବା ପରେ ଦୁହିଁଙ୍କ ମଧ୍ୟରେ କଥା କଟାକଟି ହୋଇଥିଲା ପରେ ଘଟଣାସ୍ଥଳରୁ ଅଭିଯୁକ୍ତ ଚାଲିଯିବା ପରେ ସନ୍ଧ୍ୟା ସମୟରେ ମଦ୍ୟପାନ କରି ହୋମଗାର୍ଡ ରୀନା ବିଡିକାକୁ ଛୁରା ମାଡ କରିଥିଲା । ଆକ୍ରମଣରେ ଗୁରୁତର ରୀନାଙ୍କୁ ଚିକିତ୍ସା ପାଇଁ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯିବା ପରେ ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା । ଆକ୍ରମଣ କରିଥିବା ମଦ୍ୟପ ୩ ଦିନ ଧରି ଫେରାର ରହିଥିବା ବେଳେ ଆଜି ଚାନ୍ଦିଲି ଥାନା ପୁଲିସ ବିଭିନ୍ନ ସ୍ଥାନରେ ଚଢ଼ଉ କରି ଅଭିଯୁକ୍ତ ରାଜେନ୍ଦ୍ରକୁ ଗିରଫ୍ କରି କୋର୍ଟ ଚାଲାଣ କରିଛି । ଅନ୍ୟପଟେ ଅଭିଯୁକ୍ତ ରାଜେନ୍ଦ୍ର କଣ୍ଡାଗିରୀଙ୍କ ନାମରେ ପୂର୍ବରୁ କିଛି ଅପରାଧିକ ମାମଲା ରହିଛି କି ନାହିଁ ସେନେଇ ପୁଲିସ ତଦନ୍ତ ଜାରି ରଖିଛି ବୋଲି କୁହାଯାଇଛି ।