ଦେବଗଡ଼: ବାରକୋଟ ଥାନା ଗୁରୁସଙ୍ଗ ପଂଚାୟତ ଅନ୍ତର୍ଗତ ଦେପତଳା ଗ୍ରାମରେ ଘଟିଛି ଏକ ଅଭାବନୀୟ କାଣ୍ଡ l ଡାହାଣୀ ସନ୍ଦେହରେ ଗ୍ରାମବାସୀଙ୍କ ସଙ୍ଘବଦ୍ଧ ଆକ୍ରମଣରେ ଏକ ଦମ୍ପତି ଗୁରୁତର ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି ହୋଇଥିବା ଜଣା ପଡିଛି l ମିଳିଥିବା ସୂଚନା ଅନୁଯାଇ ସେହି ଗ୍ରାମର ଗଣ୍ଡ ପ୍ରଧାନଙ୍କ ସ୍ତ୍ରୀ ତୁଳସୀ କିଛିଦିନ ହେବ ସ୍ୱସ୍ଥ୍ୟଗତ ସମସ୍ୟା ନେଇ ଗତି କରୁଥିବା ବେଳେ ଭୂୟାଁଣୀ ମହାକୁଳ ତାଙ୍କୁ ଗୁଣି କରୁଥିବା ସନ୍ଦେହ କରି ପୂର୍ବରୁ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା l
ତେବେ ଗତକାଲି ପୁଣିଥରେ ଉକ୍ତ ଘଟଣାକୁ କେନ୍ଦ୍ରକରି ଗ୍ରାମରେ ଏକ ବୈଠକ ପାଇଁ ଗ୍ରାମବାସୀ ପ୍ରସ୍ତୁତ ହୋଇ ପୂର୍ବାହ୍ନରେ ଭୂୟାଁଣୀଙ୍କ ଘରକୁ ବୈଠକରେ ସାମିଲ ହେବାକୁ ଡାକି ଆସିଥିଲେ l ଭୂୟାଁଣୀ ସ୍ୱାମୀନଥିବା ରୁ ପ୍ରଥମେ ବୈଠକକୁ ଯିବାପାଇଁ ଅମଙ୍ଗ ହୋଇଥିଲେ l ତେବେ ପୁଣିଥରେ ଗ୍ରାମର କେତେକ ମହିଳା ସେଠାକୁ ଆସି ଭୂୟାଁଣୀଙ୍କୁ ଜୋରଜବରଦସ୍ତ ବୈଠକ ସ୍ଥଳକୁ ନେବା ବେଳେ ଭୂୟାଁଣୀଙ୍କ ସ୍ୱାମୀ ଦେବାନନ୍ଦ ମହାକୁଳ ସେଠାକୁ ଆସି ପହଁଚି ଘଟଣା ସମ୍ପର୍କରେ ପଚାରି ବୁଝିବାକୁ ଉଦ୍ୟମ କରିବା ବେଳେ ରକ୍ତମୁଖା ଗ୍ରାମବାସୀ ଭୂୟାଁଣୀ କୁ ଡାହାଣୀ ଅଭିହିତ କରି ଉଭୟ ସ୍ୱାମୀ ଓ ସ୍ତ୍ରୀଙ୍କୁ ଇଟା, ପଥର, ସାହାଯ୍ୟରେ ଆକ୍ରମଣ କରିବା ସହ ଗାଁ ଦାଣ୍ଡରେ ଘୋଷାରି ଘୋଷାରି ଗ୍ରାମର ଜଟିଆ, ବୈଷ୍ଣବ ଟିକୁ, କାଁଚନ, କାନ୍ସଲା, କୀର୍ତନଙ୍କ ସମେତ ବହୁ ପୁରୁଷ ଓ ମହିଳା ଭୂୟାଁଣୀଙ୍କୁ ପ୍ରବଳ ମାଡ଼ ମରିବା ସହ ଉଲଗ୍ନ କରିଥିଲେ l
ପରେ ପୀଡିତ ଦମ୍ପତିଙ୍କ ପରିବାର ସଦସ୍ୟ ସେମାନଙ୍କୁ ଆକ୍ରମଣକାରିଙ୍କ କବଳରୁ ଉଦ୍ଧାର କରି ଚିକିତ୍ସା ପାଇଁ ପ୍ରଥମେ ବାରକୋଟ ଡାକ୍ତରଖାନାରେ ଭର୍ତି କରିଥିଲେ l ମାତ୍ର ଗୁରୁତର ଥିବା କାରଣରୁ ସେମାନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି l ଏବେ ମଧ୍ୟ ଉଭୟ ଦମ୍ପତି ଚିକିତ୍ସାଧୀନ ଥିବା ଜଣା ପଡିଛି l
