ବ୍ରହ୍ମପୁର: ସହରର ଦୁଇ ଜଣ କର୍ପୋରେଟର ପ୍ରାର୍ଥୀଙ୍କ ଘର ଉପରକୁ ପଥର ମାଡ କରାଯିବା ସହ ତାଙ୍କ ଗାଡି ଭାଙ୍ଗିବା ଅଭିଯୋଗରେ ଗୋସାଇଁନୂଆଗାଁ ଥାନା ପୁଲିସ ୫ ଜଣ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତମାନେ ହେଲେ ବଡ଼ ବଜାର ଥାନା ଅନ୍ତର୍ଗତ କୁମାର ଅଭିଷେକ ବେହେରା ଓରଫ ଶିବ, ସିତୁନ ସାହୁ, ସନ୍ତୋଷ କୁମାର ସାହୁ, ଟାଉନ୍ ଥାନା ଅନ୍ତର୍ଗତ ବିଜିପୁର ଲଷ୍ମୀ ସାହିର ସାଗର ପାତ୍ର ଓ ଗୋସାଇଁନୂଆଗାଁ ଥାନା ଅନ୍ତର୍ଗତ ବିମଳା ନଗରର ସରୋଜ କୁମାର ବେହେରା ଓରଫ ଅରୁଣ ବୋଲି ପୁଲିସ କହିଛି । ସମସ୍ତ ଅଭିଯୁକ୍ତମାନଙ୍କୁ ପୁଲିସ କୋର୍ଟ ଚାଲାଣ କରିଛି ।
ସୂଚନାଯୋଗ୍ୟ, ବ୍ରହ୍ମପୁର ମହାନଗର ନିଗମର ୧୪ ନଂ ୱାର୍ଡର କର୍ପୋରେଟର ପଦ ପାଇଁ ସସ୍ମୀତା ଦାସ ଓ ୧୨ ନଂ ୱାର୍ଡରୁ ତାଙ୍କ ସ୍ୱାମୀ ବିରେନ ପଟ୍ଟନାୟକ ନିର୍ବାଚନ ଲଢିଥିଲେ । ଉଭୟ ସ୍ୱାମୀ-ସ୍ତ୍ରୀ ନିର୍ବାଚନରେ ପରାଜିତ ହୋଇଥିଲେ । ହେଲେ ଗତ ଦୁଇ ଦିନ ପୂର୍ବେ ସ୍ୱାମୀ-ସ୍ତ୍ରୀ ନିଜ ଘର ଭିତରେ ଥିବା ବେଳେ ରାତି ୩ଟା ବେଳେ ୧୦ରୁ ଅଧିକ ବ୍ୟକ୍ତି ତାଙ୍କ ଘର ନିକଟକୁ ଯାଇ ଅଭଦ୍ର ଭାଷାରେ ଗାଳିଗୁଲଜ କରିବା ସହ ଘର ଉପରକୁ ପଥର ମାଡ କରିଥିଲେ । ଏହା ସହ ଘର ବାହାରେ ରଖାଯାଇଥିବା ବାଇକକୁ ପଥର ଛେଚି ଭାଙ୍ଗି ଦେଇଥିଲେ । ଏହି ଘଟଣା ବେଳର ଦୃଶ୍ୟ ବିରେନ ରେକର୍ଡିଂ କରି ରଖିଥିଲେ । ଗତ କାଲି ସକାଳୁ ସସ୍ମୀତା ଗୋସାଇଁନୂଆଗାଁ ଥାନାରେ ଅଭିଯୋଗ କରିବା ସହ ଘଟଣା ବେଳର ଭିଡିଓ କ୍ଲିପ ପୁଲିସକୁ ଦେଇଥିଲେ । ତାଙ୍କ ଅଭିଯୋଗ ପରେ ପୁଲିସ ଘଟଣାର ତଦନ୍ତ କରି ଏଥିରେ ସମ୍ପୃକ୍ତ ଥିବା ୫ ଜଣ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି ।
