ବ୍ରହ୍ମପୁର : ମାଁ ଶବ୍ଦର କୌଣସି ବିକଳ୍ପ ନଥିବା ବେଳେ ସେହି ମାଁକୁ ହିଁ ପର ଘରକୁ ଠେଲିଦେବା ଏବଂ ବୃଦ୍ଧା ଅବସ୍ଥାରେ ତାଙ୍କୁ ଘରୁ ବାହାର କରିଦେବା ଘଟଣା ବର୍ତ୍ତମାନ ଆଧୁନିକ ଯୁଗରେ ବହୁଳ ଭାବରେ ଦେଖିବାକୁ ମିଳୁଛି । ଗର୍ଭରେ ଦଶମାସ ରଖିବା ପରେ ନିଜ କୋଳରେ ପିଲାରୁ ବଡ଼ କରିଥିବା ମାଁ ଏବଂ ବାପାଙ୍କୁ ଘରେ ରଖିବା ପାଇଁ ଜନ୍ମିତ ପିଲାମାନେ ମନା କରିଦେଉଥିବା ଘଟଣା ଦୁର୍ଭାଗ୍ୟଜନକ । ମୁଖ୍ୟତଃ ବ୍ରହ୍ମପୁର ସହରରେ ଏହିପରି ଘଟଣାମାନ ପ୍ରତିଦିନ ଦେଖିବାକୁ ମିଳୁଛି । କୌଣସି ଘରେ ବୃଦ୍ଧ ପିତା ଏବଂ ମାତାଙ୍କୁ ଘରୁ ବାହାର କରିଦେଉଛନ୍ତି ତ କେଉଁଠାରେ ସମ୍ପତ୍ତି ପାଇଁ ମାଡ଼ମାରି ଧମକ ଦେବା ସହ ଆଶ୍ରମରେ ଛାଡି ଦେଉଛନ୍ତି । ଏପରି ପରିସ୍ଥିତିରେ ଅନେକ ବୃଦ୍ଧ ପିତାମାତା ପୁଲିସର ଆଶ୍ରୟ ନେଉଥିବା ବେଳେ ପ୍ରଶାସନ ପକ୍ଷରୁ ସେମାନଙ୍କୁ ଥଇଥାନ କରାଯାଉ ନଥିବା ଅଭିଯୋଗ ହେଉଛି ।
ଏଭଳି ଏକ ଘଟଣା ଆଜି ପୁଣି ବ୍ରହ୍ମପୁର ସହରରେ ଦେଖିବାକୁ ମିଳିଛି । ବୃଦ୍ଧାଙ୍କ ନାମ ହେଉଛି ଦଣ୍ଡାଶୁଣି ସାହୁ । ବୟସ ୮୦ ଛୁଇଁଲାଣି । ସ୍ୱାମୀଙ୍କର ବହୁଦିନରୁ ମୃତ୍ୟୁ ଘଟିଥିବା ବେଳେ ତାଙ୍କର ଜଣେ ପୁଅ ଏବଂ ଜଣେ ଝିଅ ମଧ୍ୟ ଅଛନ୍ତି । ପୁଅ କୌଣସିଠାରେ କାର୍ଯ୍ୟ କରୁଥିବା ବେଳେ ଝିଅ ମଧ୍ୟ ବ୍ରହ୍ମପୁର ସହରରେ ରହୁଛି । ତେବେ ବୃଦ୍ଧା ମାଁଙ୍କୁ ଦୁଇମୁଠା ଖାଇବାକୁ ଦେବା ପାଇଁ ପୁଅ ଅସମର୍ଥତା ପ୍ରକାଶ କରୁଥିବା ବେଳେ ଝିଅ ମଧ୍ୟ ରଖିବା ପାଇଁ ନାରାଜ ହେଉଥିବା କହିଛନ୍ତି ଏହି ବିଧବା ବୃଦ୍ଧା । ତେଣୁ ସେ ଘରୁ ବାହାରି ରାସ୍ତା ଘାଟରେ ଜୀବନ ବିତାଉଛନ୍ତି । କେହି କିଛି ଦେଲେ ଖାଉଛନ୍ତି । ଏପରି ଅବସ୍ଥାରେ ଅଶୋକ ନଗରସ୍ଥିତ ପଡିଆ ସାହି ଅଞ୍ଚଳର ଜଣେ ମହିଳାଙ୍କ ନଜର ଏହି ବୃଦ୍ଧାଙ୍କ ଉପରେ ପଡ଼ିବା ପରେ ସେ ତାଙ୍କୁ ନିଜ ଘରେ ଆଶ୍ରୟ ଦେଇଛନ୍ତି । ବୃଦ୍ଧା ମହିଳା ଏବେ କୌଣସି ବୃଦ୍ଧାଶ୍ରମରେ ରହିବାକୁ ଚାହୁଁଥିବା ବେଳେ ପ୍ରଶାସନ ପକ୍ଷରୁ ମଧ୍ୟ ବର୍ତ୍ତମାନ ସେପରି କୌଣସି ଥଇଥାନ ବ୍ୟବସ୍ଥା କରାଯାଇ ନାହିଁ ।
ଏପରି ପରିସ୍ଥିତିରେ ଭଦ୍ର ମହିଳା ଜଣକ ବୃଦ୍ଧାଙ୍କୁ ଖାଇବା ପିଇବା ଦେଇ ଯତ୍ନ ନେଉଛନ୍ତି । ବୃଦ୍ଧା କେତେ ଦିନ ଅବା ପରଘରେ ରହିବେ, ସେହି ଚିନ୍ତାରେ ଏବେ ମନମାରି ପରଘରେ ବାଧ୍ୟବାଧକତାରେ ରହୁଛନ୍ତି । ଥଇଥାନ ପାଇଁ ସେ ପ୍ରଶାସନ ନିକଟରେ ଗୁହାରୀ କରିଛନ୍ତି । ବର୍ତ୍ତମାନ ଲୋଚାପଡ଼ାସ୍ଥିତ ବୃଦ୍ଧାଶ୍ରମ ଏବଂ ଗୋପାଳପୁରସ୍ଥିତ ବୃଦ୍ଧାଶ୍ରମରେ ସ୍ଥାନର ଅଭାବ ଥିବା ସୂଚନା ମିଳୁଥିବା ବେଳେ ବୃଦ୍ଧା ତାଙ୍କ ଅନ୍ତିମ ଜୀବନ କେଉଁଠି ଏବଂ କିପରି କଟାଇବେ ତାହା ନେଇ ଚିନ୍ତାରେ କାନ୍ଦୁଥିବା ଦେଖିବାକୁ ମିଳୁଛି ।
ଜନ୍ମ ଦେଇଥିବା ମା’ ହେଲା ପର : ପୁଅ ଏବଂ ଝିଅଙ୍କ ଠାରୁ ତଡ଼ାଖାଇ ପରଘରେ ଆଶ୍ରୟ ନେଇଛନ୍ତି ବୃଦ୍ଧା
