ମୁମ୍ବାଇ: ମହାରାଷ୍ଟ୍ରରୁ ଏକ ଆଶ୍ଚର୍ଯ୍ୟଜନକ ଘଟଣା ସମ୍ପର୍କରେ ସୂଚନା ମିଳିଛି । ସିନ୍ଧୁଦୁର୍ଗ ଜିଲ୍ଲାର ଏକ ଜଙ୍ଗଲରେ ଏକ ଗଛ ସହ ଲୁହା ଶିକୁଳିରେ ବନ୍ଧା ଜଣେ ୫୦ବର୍ଷ ବୟସ୍କା ମହିଳାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି । ସ୍ଥାନୀୟ ପୁଲିସ ଷ୍ଟେସନକୁ ଏହି ମହିଳାଙ୍କ ସମ୍ପର୍କରେ ସୂଚନା ଦିଆଯିବା ପରେ ପୁଲିସ୍ ଆସି ତାଙ୍କୁ ଉଦ୍ଧାର କରିଛି । ତେବେ ଉଦ୍ଧାର ସମୟରେ ଏହି ମହିଳାଙ୍କ ପକେଟରୁ ଆମେରିକୀୟ ପାସପୋର୍ଟର ଏକ ଫଟୋକପି ଏବଂ ତାମିଲନାଡୁର ଠିକଣା ଉଲ୍ଲିଖିତ ଆଧାର କାର୍ଡ ସମେତ ଅନ୍ୟାନ୍ୟ କେତେକ ଗୁରୁତ୍ୱପୂର୍ଣ୍ଣ ଦସ୍ତାବିଜ୍ ମଧ୍ୟ ପୁଲିସକୁ ମିଳିଛି । ପୁଲିସ୍ ଏସମ୍ପର୍କରେ ସୂଚନା ଦେଇ କହିଛି ଯେ, ମହିଳାଙ୍କ ଠାରୁ ମିଳିଥିବା କାଗଜପତ୍ର ଅନୁସାରେ ସେ ମୂଳତଃ ଆମେରିକୀୟ ନାଗରିକ, କିନ୍ତୁ ଦୀର୍ଘବର୍ଷ ଧରି ସେ ତାମିଲନାଡୁରେ ରହିଆସୁଥିବା ଜଣାପଡୁଛି । ସେହିପରି ତାଙ୍କ ଠାରୁ ମିଳିଥିବା ଏକ ଡାକ୍ତରୀ ରିପୋର୍ଟ ଅନୁସାରେ ସେ ମାନସିକ ସ୍ତରରେ ମଧ୍ୟ ସାମାନ୍ୟ ଦୁର୍ବଳ ଥିବା ସ୍ପଷ୍ଟ ହୋଇଛି । ଏସବୁ କାଗଜପତ୍ରରୁ ଏହି ବୟସ୍କା ମହିଳାଙ୍କ ନାମ ଲଲିତା କାୟି କୁମାର ଏସ୍ ବୋଲି ଜଣାପଡିଛି ।
ପୁଲିସ୍ ସୂତ୍ରରୁ ମିଳିଥିବା ସୂଚନାନୁସାରେ ସୋର୍ଲି ଗ୍ରାମର ଜଣେ ଗ୍ରାମବାସୀ ସନ୍ଧ୍ୟା ସମୟରେ ଜଙ୍ଗଲ ଭିତରୁ ଜଣେ ମହିଳାଙ୍କ ଚିତ୍କାର ଶୁଣିଥିଲେ । ସେ କିଛି ପଡ଼ିଶା ଲୋକଙ୍କୁ ଧରି ଜଙ୍ଗଲ ଭିତରକୁ ଯାଇ ଦେଖିଲା ବେଳକୁ ଏହି ମହିଳାଜଣକ ଗଛ ତଳେ ପଡ଼ିରହିଛନ୍ତି । ତାଙ୍କ ଗୋଡହାତକୁ ଲୁହା ଚେନ୍ରେ ଏକ ଗଛ ସହ ବାନ୍ଧି ଦିଆଯାଇଛି । ପରେ ଗ୍ରାମବାସୀ ପୁଲିସ୍କୁ ଏସମ୍ପର୍କରେ ସୂଚନା ଦେଇଥିଲେ । ପୁଲିସ୍ ଟିମ ଯାଇ ଘଟଣାସ୍ଥଳରେ ପହଞ୍ଚି ଏହି ମହିଳାଙ୍କୁ ଉଦ୍ଧାର କରିବା ସହ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରିଛି ।
ସେ ବର୍ତ୍ତମାନ ସମୟରେ କୌଣସି ପ୍ରକାର ପ୍ରଶ୍ନର ଉତ୍ତର ଦେବାର ସ୍ଥିତିରେ ନଥିବାରୁ ତାଙ୍କୁ କିଏ ଓ କାହିଁକି ଏପ୍ରକାର ଏକ ଜଙ୍ଗଲରେ ବାନ୍ଧିଥିଲା? କେତେ ଦିନ ଧରି ସେ ଏହି ଜଙ୍ଗଲରେ ବନ୍ଦିନୀ ଭାବେ ଥିଲେ ସେସବୁ କିଛି ବି ପୁଲିସ୍ ଜାଣିପାରିନାହିଁ । କିନ୍ତୁ ତାଙ୍କ ସ୍ୱାସ୍ଥ୍ୟାବସ୍ଥା ଯାଞ୍ଚ ସମୟରେ ସେ ଗତ ୪୦ ଦିନ ଧରି କିଛି ବି ଖାଇନଥିବା ଜଣାପଡିଛି । ତେବେ ଚିକିତ୍ସା ହେବା ପରେ ଏବେ ସେ ସାମାନ୍ୟ ସୁସ୍ଥ ହେଉଥିବା ଡାକ୍ତରୀ ଦଳ କହିଛନ୍ତି । ଏସବୁ ମଧ୍ୟରେ ମହିଳାଜଣକ ତାଙ୍କ ସ୍ୱାସ୍ଥ୍ୟ ସମସ୍ୟା ବାବଦରେ ଏବଂ ଜଙ୍ଗଲରେ ତାଙ୍କୁ କିଏ ବାନ୍ଧିଲା ସେସବୁ ସମ୍ପର୍କରେ ଜଣେ ଡାକ୍ତରଙ୍କୁ ଲେଖିକରି ଜଣାଇଛନ୍ତି । ମହିଳା ଜଣକ ଲେଖିଛନ୍ତି ଯେ, ତାଙ୍କ ସ୍ୱାମୀ ତାଙ୍କୁ ଜଙ୍ଗଲରେ ବାନ୍ଧି ପଳାଇଛନ୍ତି । ଝଗଡ଼ା ହେବା କାରଣରୁ ତାଙ୍କ ସ୍ୱାମୀ ଏପରି କରିଛନ୍ତି । ଏଥିସହ ସେ ୪୦ ଦିନ ହେବ କିଛି ଖାଇନଥିବା କହିଛନ୍ତି । ପୁଲିସ ଏନେଇ ଏକ ମାମଲା ରୁଜୁ କରି ତାଙ୍କ ସ୍ୱାମୀଙ୍କୁ ଖୋଜାଖୋଜି କରିବା ଆରମ୍ଭ କରିଛି ।
ଜଙ୍ଗଲରୁ ଶିକୁଳିରେ ବନ୍ଧା ମହିଳା ଉଦ୍ଧାର
