ବାଲାଗୋଡା ପଞ୍ଚାୟତରେ ବୁଥ ଜବରଦଖଲ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା

ଯୋଡା: କେନ୍ଦୁଝର ଜିଲ୍ଲା ଯୋଡା ବ୍ଲକର ବାଲାଗୋଡା ପଞ୍ଚାୟତରେ ବୁଥ ଜବରଦଖଲ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିବା ବେଳେ ଘଟଣା ସ୍ଥଳରେ କେନ୍ଦୁଝର ଏସପି ପହଞ୍ଚି ପରିସ୍ଥିତି ନିୟନ୍ତ୍ରଣ କରିଥିବା ଜଣାପଡିଛି । ଚଳିତ ନିର୍ବାଚନ ଦୃଷ୍ଟିରୁ ଖଣି ଅଞ୍ଚଳ ବାସୀ ସମ୍ବେଦନଶୀଳ ହୋଇଉଠିଥିବା ବେଳେ ଏଠାରେ କେନ୍ଦୁଝର ଜିଲ୍ଲାପାଳ ଆଶିଶ ଠାକରେ ଏବଂ କେନ୍ଦୁଝର ଏସପି ମିତ୍ରଭାନୁ ମହାପାତ୍ର ଉଭୟଙ୍କୁ ଯୋଡା ଖଣି କ୍ଷେତ୍ରରେ ବିଭିନ୍ନ ବୁଥରେ ଦେଖିବାକୁ ମିଳିଥିଲା । ଯୋଡା ବ୍ଲକର ବିଭିନ୍ନ ସ୍ଥାନରେ ଶାନ୍ତି ସୃଙ୍ଖଳା ସହିତ ନିର୍ବାଚନ ଚାଲିଥିବା ବେଳେ ଭୋଟ ଗ୍ରହଣ ଶେଷ ସମୟ ପୂର୍ବରୁ ଚମ୍ପୁଆ ବିଧାୟିକାଙ୍କ ସମର୍ଥକ ଲକ୍ଷ୍ମଣ ମହାନ୍ତ ଓରଫ ଲାଲଟୁ ଏବଂ ତାଙ୍କର କେତେଜଣ ସହଯୋଗୀ ବାଲାଗୋଡା ପଞ୍ଚାୟତର ଡିଏଭି ସ୍କୁଲରେ ଥିବା ୨୩ନଂ ଏବଂ ୨୫ନଂ ବୁଥକୁ ଜବରଦଖଲ କରି, ସେମାନଙ୍କ ପ୍ରାର୍ଥୀ ସପକ୍ଷରେ ଭୋଟ ମାରୁଥିବା ସମୟରେ ଅନ୍ୟ ପ୍ରାର୍ଥୀମାନଙ୍କ ଏଜେଣ୍ଟ ଏହାର ପ୍ରତିବାଦ କରିଥିଲେ । ଏଜେଣ୍ଟମାନଙ୍କ ଉପସ୍ଥିତିରେ ଲାଲଟୁ ପଞ୍ଚାୟତ ବାହାର ଓ ପଡୋଶି ଝାଡଖଣ୍ଡର କେତେକ ଗୁଣ୍ଡା ଆଣି ଏହି ବୁଥକୁ ଜବରଦଖଲ କରିଥିବା ସେମାନେ ଅଭିଯୋଗ କରିଥିଲେ । ଏହି ଜବରଦଖଲକାରିମାନେ ପୁଲିସ ସହିତ ପ୍ରଥମେ ବୁଥ ମଧ୍ୟକୁ ପ୍ରବେଶ କରିଥିଲେ । ସେମାନଙ୍କୁ ବିରୋଧ କରାଯିବା ସମୟରେ ଉପଖଣ୍ଡ ପୁଲିସ ଅଧିକାରୀଙ୍କ ନିର୍ଦ୍ଦେଶକ୍ରମେ ଏହା କରାଯାଉଥିବା ସେମାନେ ଖୋଲାଖୋଲି ଭାବେ ଉପସ୍ଥିତ ଭୋଟରଙ୍କୁ କହିବା ସହ ବିଭିନ୍ନ ଧମକ ଦେଇଥିଲେ । ଏଥିରେ ଏସଡିପିଓଙ୍କ ସମ୍ପୃକ୍ତି ସ୍ପଷ୍ଟ ହୋଇଥିଲା । ଜବରଦଖଲ ଖବର ପ୍ରସାରିତ ହେବା ପରେ ସମ୍ପୃକ୍ତ ଭୋଟ କେନ୍ଦ୍ରରେ ଉତ୍ତେଜନା ପ୍ରକାଶ ପାଇଥିଲା । ଏହି ସମୟରେ ବଡବିଲ ଏସଡିପିଓ ହିମାଂଶୁ ଭୂଷଣ ବେହେରା ଓ ବିଧାୟିକା ମିନାକ୍ଷୀ ମହାନ୍ତଙ୍କ ବିରୋଧରେ ଉପସ୍ଥିତ ଭୋଟର ବିଭିନ୍ନ ନାରାବାଜି କରିଥିଲେ । ଫଳରେ ୨ଘଣ୍ଟା ଧରି ଭୋଟ ଗ୍ରହଣକୁ ବନ୍ଦ ରଖିବାକୁ ପଡିଥିଲା । ତେବେ ବିଜେପି କାର୍ଯ୍ୟକର୍ତ୍ତା ମୁରଲି ଶର୍ମାଙ୍କ ଅଭିଯୋଗ ମୁତାବକ ଏସଡିପିଓଙ୍କ ସହାୟତାରେ ଏବଂ ତାଙ୍କ ଉପସ୍ଥିତିରେ ଏହି ଭୋଟ କେନ୍ଦ୍ର ଜବରଦଖଲ କରାଯାଇଥିଲା । ଖୋଦ ପୁଲିସ ଉପସ୍ଥିତିରେ ରବିବାର ରାତିରେ ବୁରୁହାଟିଂରେ ମିନାକ୍ଷୀଙ୍କ ସମର୍ଥକମାନେ ଭୋଟରମାନଙ୍କୁ ମରଣାନ୍ତକ ଆକ୍ରମଣ କରିଥିଲେ । ତେଣୁ ଖଣି ଅଞ୍ଚଳରେ ଗଣତନ୍ତ୍ର ସମ୍ପୂର୍ଣ୍ଣ ଭାବେ ବିପର୍ଯ୍ୟସ୍ଥ ହୋଇପଡିଥିବା ସେ ଅଭିଯୋଗ କରି ଉକ୍ତ ପଞ୍ଚାୟତରେ ସାନି ନିର୍ବାଚନ ଅନୁଷ୍ଠିତ କରିବା ପାଇଁ ଦାବି କରିଥିବା ଜଣାପଡିଛି । ଉକ୍ତ ଭୋଟ କେନ୍ଦ୍ରରେ ଦୀର୍ଘ ସମୟ ଧରି ଉତ୍ତେଜନା ଲାଗିରହିଥିବା ବେଳେ ଖବର ପାଇ କେନ୍ଦୁଝର ଏସପି ଘଟଣା ସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିବା ସହ ୪ ପ୍ଲାଟୁନ ପୁଲିସ ବଳ ମୁତୟନ କରିଥିବା ଦେଖିବାକୁ ମିଳିଥିଲା । ଜଣେ ପୁଲିସ ଅଧିକାରୀ, ଶାସକ ଦଳର ଚମ୍ପୁଆ ବିଧାୟିକା ମିନାକ୍ଷୀ ମହାନ୍ତ ଏବଂ ସେମାନଙ୍କ ସହଯୋଗୀଙ୍କ ଏପରି କାର୍ଯ୍ୟକଳାପକୁ ସାଧାରଣରେ ତୀବ୍ର ନିନ୍ଦା କରାଯାଇଥିବା ଜାଣିବାକୁ ମିଳିଛି ।