ଭୁବନେଶ୍ୱର : କୃଷି ଓ ଶିଳ୍ପଜାତ ବର୍ଜ୍ୟବସ୍ତୁ ତଥା ଉପଜାତ ପଦାର୍ଥର ବିନିଯୋଗ ମାଧ୍ୟମରେ ମତ୍ସ୍ୟ ଖାଦ୍ୟ ପ୍ରସ୍ତୁତି ସଂପର୍କିତ ଗବେଷଣା ଓ ଆଧୁନିକ ଜ୍ଞାନକୁ ନେଇ ପ୍ରସ୍ତୁତ ପୁସ୍ତକ ‘ଫିସ୍ ଫିଡ୍ ଫର୍ମୁଲେସନ୍ ୱିଥ୍ ଆଗ୍ରୋ-ଇଣ୍ଡଷ୍ଟ୍ରିଆଲ୍ ୱେଷ୍ଟସ୍ ଆଣ୍ଡ ବାଏପ୍ରଡକ୍ଟସ୍’କୁ ନିକଟରେଶିକ୍ଷା ‘ଓ’ ଅନୁସନ୍ଧାନ (ସୋଆ)ର ପ୍ରତିଷ୍ଠାତା ସଭାପତି ପ୍ରଫେସର (ଡକ୍ଟର) ମନୋଜରଞ୍ଜନ ନାୟକ ଉନ୍ମୋଚିତ କରିଛନ୍ତି।ସୋଆର ଶିଳ୍ପ ଜୈବପ୍ରଯୁକ୍ତି ଗବେଷଣା କେନ୍ଦ୍ର (ସିଆଇବିଆର)ର ନିର୍ଦ୍ଦେଶକ ପ୍ରଫେସର ହୃଦୟନାଥ ଥାଟୋଇ, ପଶ୍ଚିମବଙ୍ଗର ରାଇଗଞ୍ଜ ବିଶ୍ୱବିଦ୍ୟାଳୟର ମାଇକ୍ରୋବାୟୋଲୋଜି ପ୍ରଫେସର ଡକ୍ଟର ପ୍ରଦୀପ କେ. ଦାସ ମହାପାତ୍ର, ଅହମ୍ମଦାବାଦସ୍ଥିତ ଫିନେ ବାୟୋଟେକ୍ ପ୍ରାଇଭେଟ୍ ଲିମିଟେଡ୍ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ଡକ୍ଟର ପାର୍ଥ ବାନାର୍ଜୀ ଏବଂ ସିଆଇବିଆରର ସହକାରୀ ପ୍ରଫେସର ଡକ୍ଟର ସୌରଭ ଚଟ୍ଟରାଜଙ୍କ ସଂପାଦନାରେ ପ୍ରକାଶିତ ଏହି ପୁସ୍ତକରେ ଦେଶ ଓ ବିଦେଶର ବିଭିନ୍ନ ଗବେଷକ, ବୈଜ୍ଞାନିକ ଓ ଅଧ୍ୟାପକଙ୍କ ଗବେଷଣାଲବ୍ଧ ଜ୍ଞାନ ଓ ଅଭିଜ୍ଞତାକୁ ସ୍ଥାନ ଦିଆଯାଇଛି। ଆକ୍ୱାକଲ୍ଚର, ମତ୍ସ୍ୟ ବିଜ୍ଞାନ, ଜୈବପ୍ରଯୁକ୍ତି, ପୁଷ୍ଟି ବିଜ୍ଞାନ ଓ ପରିବେଶ ବିଜ୍ଞାନ ଭଳି ବିଭିନ୍ନ କ୍ଷେତ୍ରର ଜ୍ଞାନକୁ ଏହି ପୁସ୍ତକରେ ସ୍ଥାନିତ କରାଯାଇଛି।
ଦ୍ରୁତଗତିରେ ବିକାଶଶୀଳ ଜଳକୃଷି କ୍ଷେତ୍ର ପାଇଁ ସ୍ଥାୟୀ ଓ ପରିବେଶ ଅନୁକୂଳ ସମାଧାନ ଖୋଜିବା ଦିଗରେ ଏହି ପୁସ୍ତକର ପ୍ରକାଶନ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ପାରମ୍ପରିକ ମତ୍ସ୍ୟ ଖାଦ୍ୟ ପ୍ରସ୍ତୁତିରେ ବ୍ୟବହୃତ କଂଚାମାଲର ବର୍ଦ୍ଧିତ ମୂଲ୍ୟ ଏବଂ ଏହାର ପରିବେଶଗତ ପ୍ରଭାବ ଏବେ ଜଳକୃଷି କ୍ଷେତ୍ର ପାଇଁ ଏକ ବଡ଼ ଆହ୍ୱାନ। କୃଷି ଓ ଶିଳ୍ପଜାତ ବର୍ଜ୍ୟବସ୍ତୁ ତଥା ଉପଜାତ ପଦାର୍ଥକୁ ମୂଲ୍ୟବାନ ମତ୍ସ୍ୟ ଖାଦ୍ୟ ଉପାଦାନରେ ପରିଣତ କରିବାର ସମ୍ଭାବନା ଉପରେ ଏହି ପୁସ୍ତକ ଆଲୋକପାତ କରିଛି। ଏହାଦ୍ୱାରା ବର୍ଜ୍ୟବସ୍ତୁର ସୁପରିଚାଳନା ସହ ସମ୍ବଳର ପୁନଃବିନିଯୋଗ ଏବଂ ମତ୍ସ୍ୟ ଉତ୍ପାଦନକୁ ଅଧିକ ସ୍ଥାୟୀ କରିବା ସମ୍ଭବ ହୋଇପାରିବ।ପ୍ରଫେସର ଥାଟୋଇ କହିଛନ୍ତି ଯେ ବିଶ୍ୱରେ ଜଳକୃଷି କ୍ଷେତ୍ର ପାରଂପରିକ ମତ୍ସ୍ୟ ଖାଦ୍ୟ ଉପାଦାନର ବିକଳ୍ପ ଭାବେ ଅର୍ଥନୈତିକ ଦୃଷ୍ଟିରୁ ସୁଲଭ ଏବଂ ପରିବେଶ ଅନୁକୂଳ ଉପାଦାନ ଖୋଜୁଥିବା ବେଳେ ଏହି ପୁସ୍ତକ ବିଶେଷ ପ୍ରାସଙ୍ଗିକତା ବହନ କରୁଛି। କୃଷି ଓ ଶିଳ୍ପ କାର୍ଯ୍ୟକଳାପରୁ ବିପୁଳ ପରିମାଣର ବର୍ଜ୍ୟବସ୍ତୁ ଓ ଉପଜାତ ପଦାର୍ଥ ସୃଷ୍ଟି ହେଉଥିବା ବେଳେ ସେଥିରୁ ଅନେକରେ ମୂଲ୍ୟବାନ ପୋଷକ ତତ୍ୱ ରହିଥାଏ। ବୈଜ୍ଞାନିକ ପଦ୍ଧତିରେ ଏହି ପଦାର୍ଥ ଗୁଡିକୁ ସୁରକ୍ଷିତ ଓ ପୁଷ୍ଟିକର ମତ୍ସ୍ୟ ଖାଦ୍ୟ ଉପାଦାନରେ ପରିଣତ କରାଯାଇପାରିଲେ ଏକ ଚକ୍ରାକାର ଜୈବ ଅର୍ଥନୀତିର ବିକାଶ ସମ୍ଭବ ହୋଇପାରିବ। ଏଥିରେ ବର୍ଜ୍ୟବସ୍ତୁକୁ ଫିଙ୍ଗି ଦେବା ପରିବର୍ତେ ଉପଯୋଗୀ ସମ୍ବଳରେ ପରିଣତ କରାଯାଇପାରିବ।ଏହି ପୁସ୍ତକର ଗୁରୁତ୍ୱ କେବଳ ଶିକ୍ଷା ଓ ଗବେଷଣା ମଧ୍ୟରେ ସୀମିତ ନୁହେଁ; ଏହାର ସାମାଜିକ ଓ ପରିବେଶଗତ ଗୁରୁତ୍ୱ ମଧ୍ୟ ରହିଛି। ପାରଂପରିକ ମତ୍ସ୍ୟ ଖାଦ୍ୟ ଉପାଦାନ ଉପରେ ନିର୍ଭରଶୀଳତା ହ୍ରାସ କରି ସ୍ଥାନୀୟ ଭାବେ ଉପଲବ୍ଧ ସମ୍ବଳର ବ୍ୟବହାର ଦ୍ୱାରା ମତ୍ସ୍ୟଚାଷୀ ଓ ଜଳକୃଷି ଉଦ୍ୟୋଗୀମାନେ ଉପକୃତ ହୋଇପାରିବେ। ବିଶେଷକରି ମତ୍ସ୍ୟ ଖାଦ୍ୟରେ ଅଧିକ ଖର୍ଚ୍ଚ କରୁଥିବା କ୍ଷୁଦ୍ର ଓ ନାମମାତ୍ର ଚାଷୀଙ୍କ ପାଇଁ ଏହା ଲାଭଦାୟକ ହୋଇପାରେ।
ଏହା ସହିତ କୃଷି, ଖାଦ୍ୟ ପ୍ରକ୍ରିୟାକରଣ ଶିଳ୍ପ ଓ ଜଳକୃଷି ମଧ୍ୟରେ ସମନ୍ୱୟ ସୃଷ୍ଟି କରିବା ସହ ବର୍ଜ୍ୟବସ୍ତୁ ଜମା ହେବା ଓ ଏହା ସହ ଜଡ଼ିତ ପରିବେଶଗତ ସମସ୍ୟାକୁ ହ୍ରାସ କରିବାରେ ଏହି ପଦ୍ଧତି ସହାୟକ ହୋଇପାରିବ। ଫଳରେ ସମ୍ବଳର ଦକ୍ଷ ବ୍ୟବହାର, ନୂତନ ଉଦ୍ୟୋଗ ସୃଷ୍ଟି ଓ ଆୟ ବୃଦ୍ଧି ପାଇଁ ମଧ୍ୟ ସୁଯୋଗ ସୃଷ୍ଟି ହେବ।ଏହି ପୁସ୍ତକ ଗବେଷକ, ଶିକ୍ଷକ, ଛାତ୍ରଛାତ୍ରୀ, ନୀତି ନିର୍ଦ୍ଧାରକ, ଜଳକୃଷି ବିଶେଷଜ୍ଞ, ମତ୍ସ୍ୟ ଖାଦ୍ୟ ଉତ୍ପାଦନକାରୀ ଏବଂ ମତ୍ସ୍ୟଚାଷୀଙ୍କ ପାଇଁ ଏକ ଉପାଦେୟ ସନ୍ଦର୍ଭ ପୁସ୍ତକ ଭାବେ କାର୍ଯ୍ୟ କରିବ ବୋଲି ପ୍ରଫେସର ଥାଟୋଇ ଆଶା ପ୍ରକାଶ କରିଛନ୍ତି। ଏହା ସ୍ଥାୟୀ ମତ୍ସ୍ୟ ଖାଦ୍ୟ ପ୍ରଯୁକ୍ତିର ବିକାଶ, ଗବେଷଣା ଓ ନୂତନ ଉଦ୍ଭାବନକୁ ଉତ୍ସାହିତ କରିବା ସହ ଜଳକୃଷିକୁ ଅଧିକ ସୁଲଭ, ସୁଦୃଢ଼ ଓ ପରିବେଶ ଅନୁକୂଳ କରିବାରେ ସହାୟକ ହେବ।ପୁସ୍ତକ ଉନ୍ମୋଚନ କାର୍ଯ୍ୟକ୍ରମରେ ସୋଆ ବିଶ୍ୱବିଦ୍ୟାଳୟର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦଙ୍କ ସମେତ ସୋଆର ଅନ୍ୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ।
