ପୋଲସରା : ବନ୍ଧୁକ ମୁନରେ ବାଇକ୍ ଲୁଟ୍ ଘଟଣାରେ ପୋଲସରା ଥାନା ପୁଲିସକୁ ବଡ଼ ସଫଳତା ମିଳିଛି । ଏହି ଘଟଣାରେ ସମ୍ପୃକ୍ତ ୩ ଅଭିଯୁକ୍ତଙ୍କୁ ଗିରଫ କରାଯିବା ସହ ସେମାନଙ୍କ ନିକଟରୁ ଦୁଇଟି ଦେଶୀ ବନ୍ଧୁକ ଓ ଚାରୋଟି ଜୀବନ୍ତ ଗୁଳି ଜବତ କରାଯାଇଥିବା ପୋଲସରା ଥାନାଧିକାରୀ ଜିତେନ୍ଦ୍ର କୁମାର ମଲ୍ଲିକ ସୂଚନା ଦେଇଛନ୍ତି । ପୋଲସରା ଥାନାରେ ଆୟୋଜିତ ସାମ୍ୱାଦିକ ସମ୍ମିଳନୀରେ ଏହି ସୂଚନା ଦିଆଯାଇଛି । ମିଳିଥିବା ସୂଚନା ପ୍ରକାରେ ଗତ ଅଗଷ୍ଟ ୬ ତାରିଖ ସନ୍ଧ୍ୟାରେ ଗୋଛାବାଡ଼ି ଗ୍ରାମର ଗୋପାଳକୃଷ୍ଣ ମହାରଣା ଓରଫ ଲଣ୍ଡା ନିଜ ଗ୍ରାମରୁ ଚିରିକିପଡ଼ା ଅଭିମୁଖେ ଆସୁଥିବାବେଳେ ଗମ୍ଭାରିଆ ନାଳ ନିକଟରେ ଭାଲିଆମାଳ ଗ୍ରାମର ସଞ୍ଜୟ ଶବର, ମିନା ଶବର ଓ ଜରା ଶବର ଅଟକାଇ ଟଙ୍କା ମାଗିଥିଲେ । ଲଣ୍ଡା ଟଙ୍କା ନଦେବାରୁ ଗାଳି କରିବା ସହ ଆକ୍ରମଣ କରିଥିଲେ ।
ଏହା ପରେ ଲଣ୍ଡା ମହାରଣା ପ୍ରତିରୋଧ କରିବାରୁ ସଞ୍ଜୟ ଶବର ଏକ ଦେଶୀ ବନ୍ଧୁକ ବାହାର କରି ତା ଉପରକୁ ବ୍ଲାଙ୍କ ଫାୟାରିଂ କରିଥିଲା । ବନ୍ଧୁକ ମୁନରେ ଲଣ୍ଡା ମହାରଣାକୁ ଭୟଭୀତ କରି ତାଙ୍କ ଓଡି ୦୭-୮୦୭୭ ନମ୍ବର ବିଶିଷ୍ଟ ବାଇକ୍କୁ ଛଡ଼ାଇ ନେଇଥିଲେ । ଏ ନେଇ ଲଣ୍ଡା ପୋଲସରା ଥାନାରେ ଲିଖିତ ଅଭିଯୋଗ କରିବା ପରେ ଏକ ମାମଲା ରୁଜୁ ହୋଇଥିଲା । ଥାନାଧିକାରୀ ଜିତେନ୍ଦ୍ର କୁମାର ମଲ୍ଲିକ ଏହାର ତଦନ୍ତ ଆରମ୍ଭ କରିଥିଲେ । ଘଟଣାରେ ସମ୍ପୃକ୍ତ ୩ ଅଭିଯୁକ୍ତଙ୍କୁ ଗିରଫ କରାଯିବା ସହ ସେମାନଙ୍କ ନିକଟରୁ ଦୁଇଟି ଦେଶୀ ବନ୍ଧୁକ, ୪ ଟି ଜୀବନ୍ତ ଗୁଳି, ଲୁଟ୍ ହୋଇଥିବା ବାଇକ୍ ଓ ଘଟଣାସ୍ଥଳରୁ ଗୋଟିଏ ଖୋକା ଜବତ କରାଯାଇଛି । ଗିରଫ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି ।
