ପ୍ରାର୍ଥୀପତ୍ର ଦାଖଲ କଲେ ଟିଏମସି ସୁପ୍ରିମୋ ମମତା ବାନାର୍ଜୀ

କୋଲକାତା : ପ୍ରାର୍ଥୀପତ୍ର ଦାଖଲ କଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମସି ସୁପ୍ରିମୋ ମମତା ବାନାର୍ଜୀ । ଶୁକ୍ରବାର ଅଲୀପୁରରେ ମମତା ଭବାନୀପୁର ବିଧାନସଭା ଆସନ ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି । ସେପ୍ଟେମ୍ବର ୩୦ରେ ପଶ୍ଚିମବଙ୍ଗର ଭବାନୀପୁର ବିଧାନସଭା ନିର୍ବାଚନମଣ୍ଡଳୀରେ ଉପ-ନିର୍ବାଚନ ଅନୁଷ୍ଠିତ ହେବ ଏବଂ ଅକ୍ଟୋବର ୩ରେ ‌ଭୋଟ ଗଣତି ହେବ। ଏନେଇ ନିର୍ବାଚନ ଆୟୋଗ ପକ୍ଷରୁ ଘୋଷଣା କରାଯାଇଛି। ପୂର୍ବରୁ ମମତା ଭବାନୀପୁର ଆସନରୁ ଦୁଇ ଥର ନିର୍ବାଚନ ଜିତିଛନ୍ତି। ତେବେ ମୁଖ୍ୟମନ୍ତ୍ରୀ ପଦ ବଜାୟ ରଖିବାକୁ ହେଲେ ମମତାଙ୍କୁ ଏହି ନିର୍ବାଚନ ଜିତିବାକୁ ପଡ଼ିବ। କାରଣ ବିଧାନସଭା ନିର୍ବାଚନରେ ମମତା ହାରିଯାଇଥିଲେ। ସେ ନନ୍ଦିଗ୍ରାମ ଆସନରୁ ବିଜେପିର ସୁଭେନ୍ଦୁ ଅଧିକାରୀଙ୍କଠାରୁ ନିର୍ବାଚନ ହାରିଥିଲେ। ସୂଚନା ଯେ, ଏହି ବିଧାନସଭା ଆସନରେ ଅନୁଷ୍ଠିତ ହେବାକୁ ଥିବା ଉପ-ନିର୍ବାଚନ ପାଇଁ ବିଜେପି ପ୍ରିୟଙ୍କା ଟିବ୍ରେୱାଲଙ୍କୁ ପ୍ରାର୍ଥୀ କରିଛି। ପ୍ରିୟଙ୍କା ଟିବ୍ରେୱାଲ୍‌ ପୂର୍ବତନ କେନ୍ଦ୍ରମନ୍ତ୍ରୀ ବାବୁଲ୍‌ ସୁପ୍ରିୟୋଙ୍କର ଆଇନଗତ ପରାମର୍ଶଦାତ୍ରୀ ଥିଲେ। ୨୦୧୪ରେ ସେ ବିଜେପିରେ ଯୋଗ ଦେଇଥିଲେ। ଏହା ପରେ ସେ ୱାର୍ଡ କାଉନସିଲର ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିଥିଲେ, କିନ୍ତୁ ଟିଏମସି ନେତାଙ୍କଠାରୁ ନିର୍ବାଚନରେ ​​ହାରିଯାଇଥିଲେ।