ପୁଣେ : ରଦ୍ଦ ହେଲା ପୋର୍ସେ ଦୁର୍ଘଟଣା ମାମଲାରେ ଅଭିଯୁକ୍ତଙ୍କ ଜାମିନ । ତେବେ ଏହି ଘଟଣାକୁ ନେଇ ବିବାଦ ତେଜିବା ପରେ ଆଜି ଅଭିଯୁକ୍ତର ଜାମିନ ରଦ୍ଦ କରାଯାଇଛି। ଜୁଭେନାଇଲ ଜଷ୍ଟିସ ବୋର୍ଡ ୧୭ ବର୍ଷୀୟ ଅଭିଯୁକ୍ତକୁ ଜାମିନ ପ୍ରଦାନ କରିବାର ୩ ଦିନ ପରେ ଆଜି ଜାମିନ ରଦ୍ଦ କରିଛନ୍ତି। ଜୁଭେନାଇଲ ଜଷ୍ଟିସ ବୋର୍ଡ ଅଭିଯୁକ୍ତକୁ ଜୁନ୍ ୫ ତାରିଖ ପର୍ଯ୍ୟନ୍ତ ରିମାଣ୍ଡରେ ନେଇଛି। ଜୁନ୍ ୫ ପର୍ଯ୍ୟନ୍ତ ଅଭିଯୁକ୍ତ ବାଳ ସୁଧାର ଗୃହରେ ରହିବ। ସୂଚନା ଯୋଗ୍ୟ ଯେ, ପୁଣେରେ ଜଣେ ଧନୀ ବ୍ୟବସାୟୀଙ୍କ ନାବାଳକ ପୁଅ ତା’ ବାପାଙ୍କ ଦାମୀ ପୋର୍ସେ କାର୍ ନିଶାସକ୍ତ ଅବସ୍ଥାରେ ହାଇସ୍ପିଡ୍ରେ ଚଲାଇଥିଲା ଏବଂ ୨ ଜଣ ସଫ୍ଟୱେର ଇଞ୍ଜିନିୟରଙ୍କ ଉପରେ ଚଢ଼ାଇ ମାରି ଦେଇଥିଲା। ଏହି ମାମଲାରେ ସେ ଗିରଫ ହୋଇଥିଲେ ମଧ୍ୟ ଜୁଭେନାଇଲ ଜଷ୍ଟିସ ଆଇନ ଅଧୀନରେ ତାକୁ ମାତ୍ର ୧୫ ଘଣ୍ଟା ମଧ୍ୟରେ ଜାମିନ ମିଳିଯାଇଥିଲା। ଜୁଭେନାଇଲ ବୋର୍ଡ ପୁନେ ଅଭିଯୁକ୍ତକୁ ଜାମିନ ଦେବା ସହ ତା’ର ଦଣ୍ଡ ଅତି କୋହଳ କରିଥିଲେ। ଜୁଭେନାଇଲ ବୋର୍ଡ ତାକୁ ଦୁର୍ଘଟଣା ଉପରେ ୩୦୦ ଶବ୍ଦର ଏକ ରଚନା ଲେଖିବାକୁ କହିବା ସହ ୧୫ ଦିନ ପାଇଁ ଟ୍ରାଫିକ୍ ପୁଲିସ କାମ କରିବାପାଇଁ କହିଥିଲେ। ଏହି କାରଣ ପାଇଁ ବୋର୍ଡଙ୍କୁ କଡ଼ା ସମାଲୋଚନାର ଶିକାର ହେବାକୁ ପଡ଼ିଲା। ଏଭଳି ନିଷ୍ପତ୍ତି ପାଇଁ ଦେଶବ୍ୟାପୀ ତୀବ୍ର ପ୍ରତିକ୍ରିୟା ଦେଖାଦେଇଛି। ଉଭୟ ବିଜେପି ଏବଂ କଂଗ୍ରେସ ଦଳର ନେତାମାନେ ଅଭିଯୁକ୍ତକୁ ଜାମିନ ଏବଂ ଏତେ କୋହଳ ଦଣ୍ଡକୁ ନେଇ ପ୍ରଶ୍ନ ଉଠାଇଛନ୍ତି। ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନାବିସ ଗତକାଲି କହିଥିଲେ ଯେ ଅଭିଯୁକ୍ତ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ ହେବ। ଅନ୍ୟପକ୍ଷେ କଂଗ୍ରେସ ନେତା ରାହୁଲ ଗାନ୍ଧୀ କହିଥିଲେ, ଦେଶରେ ସମ୍ପତ୍ତି ଆଧାରରେ ଲୋକଙ୍କୁ ନ୍ୟାୟ ମିଳୁଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨ଟି ଭାରତ ସୃଷ୍ଟି କରିଛନ୍ତି ବୋଲି କହି ରାହୁଲ ଉକ୍ତ ପ୍ରସଙ୍ଗରେ ମୋଦୀଙ୍କୁ ଟାର୍ଗେଟ୍ କରିଥିଲେ।
