ଭୁବନେଶ୍ୱର,(ଓଏନଏ): ଏନଏମଏ ଚିଠା ଅଧିନିୟମକୁ ନେଇ ବିବାଦ ତୁଟି ନାହିଁ । ପୁରୀ ଶ୍ରୀମନ୍ଦିର ପରେ ଏବେ ଏକାମ୍ରକ୍ଷେତ୍ରରେ ଏହି ଅଧିନିୟମକୁ ନେଇ ବିବାଦ ମୁଣ୍ଡ ଟେକିଛି । ବିଜେପିର ଭୁବନେଶ୍ୱର ସାସଂଦ ଅପରାଜିତା ଷଡଙ୍ଗୀଙ୍କୁ ଟାର୍ଗେଟ କରାଯାଇଛି । ପୁରୀ ଶ୍ରୀମନ୍ଦିରକୁ ଏହି ଅଧିନିୟମରୁ ପ୍ରତିବାଦ ପରେ ବାଦ ଦିଆଯାଇଥିବା ବେଳେ ଏକାମ୍ର କ୍ଷେତ୍ର ପାଇଁ ବଳବତ୍ତର ରହିଛି । ବାସୁଦେବ ମନ୍ଦିର ଓ ବ୍ରହ୍ମେଶ୍ୱର ମନ୍ଦିର ପାଇଁ ଏହି ଅଧିନିୟମର ବାଇ ଲରେ ବଳବତ୍ତର ରହିଛି । କିନ୍ତୁ, ଏଥିନେଇ ସାଂସଦ ଅପରାଜିତା ଷଡଙ୍ଗୀ କୌଣସି ପ୍ରତିକ୍ରିୟା ରଖୁନଥିବାରୁ ଏବଂ କେନ୍ଦ୍ର ନିକଟରେ ଏହି ନିୟମ ହଟାଇବା ପାଇଁ ଦାବି କରୁନଥିବାରୁ ତାଙ୍କୁ ସମାଲୋଚନା କରାଯାଇଛି । ଏପରିକି ଭୁବନେଶ୍ୱର-ଏକାମ୍ର ନିର୍ବାଚନ ମଣ୍ଡଳୀର ବିଧାୟକ ତଥା ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ଏନେଇ ଟ୍ୱିଟ କରି ଅପରାଜିତାଙ୍କୁ ଟାର୍ଗେଟ କରିଛନ୍ତି । ଏହାପରେ ବିଭିନ୍ନ ସଂଗଠନ ଆଗକୁ ଆସି ଅପରାଜିତାଙ୍କୁ ଘେରିଛନ୍ତି ।
The silence of BhubaneswarMP on the move to stall Ekarma khetra project exposes her sheer commitment to Bhubaneswar Development.People of Bhubaneswar will not forgive those hindering the Ekarmakhetra project.Har Har Mahadev
— Ashok Chandra Panda (@Ashokpandabbsr) February 10, 2021
ଏହି ଅଧିନିୟମ ଅନୁଯାୟୀ, ମନ୍ଦିରର ୩ ଶହ ମିଟର ଭିତରେ କୌଣସି ବିକାଶମୂଳକ କାର୍ଯ୍ୟ କିମ୍ବା ନିର୍ମାଣ କାର୍ଯ୍ୟ କରିବାକୁ ଗଲେ ଏଥିନେଇ ଅନୁମତି ନେବାକୁ ପଡିବ । ବିନା ଅନୁମତିରେ କୌଣସି ନିର୍ମାଣ କାର୍ଯ୍ୟ ହୋଇପାରିବ ନାହିଁ । ଏହାଫଳରେ ସରକାର ଏବେ ଯେଉଁ ଏକାମ୍ର ଯୋଜନା କରି ଲିଙ୍ଗରାଜ ମନ୍ଦିରର ବିକାଶମୂଳକ କାର୍ଯ୍ୟ ହାତକୁ ନେଇଛନ୍ତି, ତାହା ହୋଇପାରିବ ନାହିଁ । ବାସୁଦେବ ମନ୍ଦିରର ୩ ଶହ ମିଟର ପରିଧି ଭିତରେ ଲିଙ୍ଗରାଜ ମନ୍ଦିରର ବିକାଶ କାର୍ଯ୍ୟ ଆସୁଛି । ଏଣୁ ଏହି କାର୍ଯ୍ୟ ବାଧାପ୍ରାପ୍ତ ହେବାକୁ ଥିବାରୁ ଏକାମ୍ରକ୍ଷେତ୍ରର ଲୋକେ ବିରୋଧ କରିବା ଆରମ୍ଭ କରିଛନ୍ତି । ସାଂସଦ ଶ୍ରୀମତି ଷଡଙ୍ଗୀ ଏହି ଘଟଣାକୁ ନେଇ ବିରୋଧ କରିନଥିବାରୁ କିମ୍ବା କୌଣସି ପ୍ରତିକ୍ରିୟା ରଖୁନଥିବାରୁ ତାକୁ ନେଇ ବିରୋଧାଭାବ ସୃଷ୍ଟି ହୋଇଛି । ମନ୍ତ୍ରୀ ଶ୍ରୀ ପଣ୍ଡା ଟ୍ୱିଟ କରି ଅପରାଜିତାଙ୍କ ନିରବତା ନେଇ ପ୍ରଶ୍ନ ଉଠାଇଛନ୍ତି । ‘ଏକାମ୍ରକ୍ଷେତ୍ର ପ୍ରକଳ୍ପ କାର୍ଯ୍ୟରେ ବାଧାପ୍ରାପ୍ତ ହେଲେ ଭୁବନେଶ୍ୱରବାସୀ କ୍ଷମା ଦେବେନାହିଁ’ ବୋଲି ସେ ତାଙ୍କ ଟ୍ୱିଟରେ ଚେତାଇ ଦେଇଛନ୍ତି । ଅନ୍ୟପଟେ ଜନଜାଗରଣ ମଂଚ ଓ ବଳୁନିଯୋଗ ପକ୍ଷରୁ ମଧ୍ୟ ସାସଂଦଙ୍କ ନିରବତା ନେଇ ପ୍ରଶ୍ନ ଉଠାଯାଇଛି । ସାଂସଦଙ୍କ ଏହି ନିରବତା ତାଙ୍କ ପାଇଁ ମହଙ୍ଗା ପଡିବ । ସାସଂଦ କୁଆଡେ ଗଲେ, ସେବାୟତମାନଙ୍କ ସହ ଏନେଇ କାହିଁକି ଆଲୋଚନା କରୁନାହାନ୍ତି , ଏସବୁ ପ୍ରଶ୍ନ ଉଠାଇବା ସହ ତାଙ୍କୁ ଲିଙ୍ଗରାଜ ମନ୍ଦିର ଭିତରକୁ ପୁରାଇ ଦିଆଯିବ ନାହିଁ ବୋଲି କୁହାଯାଇଛି । ଲିଙ୍ଗରାଜ ସେନା ଅପରାଜିତାଙ୍କୁ ବିରୋଧ କରାଯିବ ବୋଲି ଘୋଷଣା କରିଛି । ଏହାଛଡା ବିଭିନ୍ନ ସୋସିଆଲ ମିଡିଆରେ ଅପରାଜିତା କେଉଁଠି ବୋଲି ପ୍ରଶ୍ନ ଉଠାଯାଇଛି ।
ଏହି ଘଟଣା ଉପରେ ଦିଲ୍ଲୀରେ ଥିବା ଅପରାଜିତା ଏକ ଗଣମାଧ୍ୟମକୁ ସାକ୍ଷାତକାର ଦେଇ କହିଛନ୍ତି ଯେ, ‘ସବୁପ୍ରକାର ବିରୋଧ ଓ ସମର୍ଥନକୁ ମୁଁ ସ୍ୱାଗତ କରୁଛି । ବର୍ତମାନ ସଂସଦ ଅଧିବେଶନ ଚାଲିଛି । ମୁଁ ଦିଲ୍ଲୀରେ ଅଛି । ସଂସଦ ଅଧିବେଶନର ପ୍ରଥମ ପର୍ଯ୍ୟାୟ କିଛି ଦିନ ପରେ ସରିଯିବ । ତା ପରେ ୧୫ ତାରିଖରେ ମୁଁ ଭୁବନେଶ୍ୱର ଆସୁଛି । ସବୁବେଳେ ତର୍କ ଓ ତଥ୍ୟକୁ ନେଇ ମୁଁ କଥା ହୁଏ । ତର୍କ ଓ ତଥ୍ୟ ବିନା ମୁଁ କଥା ହୁଏନି କିମ୍ବା କୌଣସି ପ୍ରକାର କାର୍ଯ୍ୟ କରେ ନାହିଁ । ସେଥିପାଇଁ ଭୁବନେଶ୍ୱର ଗଲାପରେ ଏକାମ୍ରକ୍ଷେତ୍ର ଯିବି । ସମସ୍ତଙ୍କ ସହ ଆଲୋଚନା କରିବି । କଥାଟା ସୁନ୍ଦର ଭାବରେ ବୁଝିବି । କିନ୍ତୁ, ଯେଉଁସବୁ କଥା ମୋତେ କୁହାଯାଇଛି, ଅଳ୍ପ ଯେତେ ମୁଁ ଜାଣିଛି ତାକୁ ଆଧାର କରି ମୁଁ କହିବି, ପ୍ରଧାନମନ୍ତ୍ରୀଙ୍କ ରାଜନୀତି ହେଉଛି ବିକାଶର ରାଜନିତୀ । କେବେ ବି କୌଣସି ପରିସ୍ଥିତିରେ ବିକାଶକୁ ବିରୋଧ କରିବୁ ନାହିଁ । ବିକାଶକୁ ବିରୋଧ କରିବାର ପ୍ରଶ୍ନ ଉଠୁନାହିଁ । ଆମେ ସମସ୍ତେ ଚାହୁଁଛୁ ବିକାଶ । କିନ୍ତୁ ମୁଁ ଗୋଟିଏ କଥା କହିବି, ଯେତେବେଳେ ବିକାଶ କାର୍ଯ୍ୟ ହାତକୁ ନିଆଯାଉଛି, ସେତେବେଳେ ଉତ୍ସାହ ରହିବା ଦରକାର । ଏଇଟା ଭଲ କଥା । କିନ୍ତୁ ଆଇନକୁ ଦେଖିକି କାମ କରିବା କଥା । ଯାହା ନୀତି ନିୟମ ଓ ରେଗୁଲେସନ ଅଛି ତାକୁ ଦେଖିକି କାମ କରିବା କଥା । ଆଉ ଯେତେ ଷ୍ଟେକ ହୋଲ୍ଡର ଅଛନ୍ତି ତାଙ୍କ ମତାମତ ନେଇ କାମ କରିବା କଥା । କିଛିଟା ପାଠ ପଢି କାମ କରିବା କଥା । ଯେଉଁ ଘଟଣାଟି ହେଲା ଏଏସଆଇ ତରଫରୁ ହେଲା, ଏଏସଆଇ ଅବଜେକ୍ସନ କଲା, ମୁଁ ଯେତିକି ଜାଣିଛି କହିବି । ଏହା ଶାସନର ଅପରିପକ୍ୱତା କହିଲେ ଅତ୍ୟୁକ୍ତି ହେବନାହିଁ । ଆର୍କୋଲୋଜିକାଲ ସର୍ଭେ ଅଫ ଇଣ୍ଡିଆର କନସର୍ନକୁ ନେଇ କାମ କରିବା କଥା । ଏହାପରେ ଯେଉଁସବୁ ପଦକ୍ଷେପ ନିଆଯିବା କଥା, ମୁଁ ୧୫ ତାରିଖ ପରେ ଆସିଲେ ଅନୁସନ୍ଧାନ କରିବା ପରେ ନିଷ୍ପତି ନେବି । ସେବାୟତମାନେ ଆମର । ମୁଁ ସେବାୟତଙ୍କର’ ।
‘ସମସ୍ତଙ୍କର ବହୁ ଆଶୀର୍ବାଦ ଓ ସ୍ନେହ ରହିଛି । ମୁଁ ଯାଏ, ସମସ୍ତଙ୍କ ସହିତ ଆଲୋଚନା କରିବି । ଯେଉଁଟା ଠିକ ହେବ ଆମ ସମସ୍ତଙ୍କ ପାଇଁ ଭଲ ସେଇଟା ହିଁ କରାଯିବ’ ।
