ଦ୍ଵାରଶୁଣି ଘାଟିରେ ପୁଣି ଦୁର୍ଘଟଣା, ଜଳିଗଲା ପିଆଜ ବୋଝେଇ ଟ୍ରକ୍, ଲାପାତ୍ତା ଡ୍ରାଇଭର ହେଲପର

ମୟୂରଭଞ୍ଜ : ଦ୍ଵାରଶୁଣି ଘାଟିକୁନେଇ ଥମୁନି ଚର୍ଚ୍ଚା କି ଦୁର୍ଘଟଣା। ଭଗବାନ ଭରସାରେ ଗାଡ଼ି ମଟର ଚଳାଉଥିବା ଡ୍ରାଇଭର। ହେଲେ ବାଟ ଓଗାଳି ବସିଛି ନଛୋଡବନ୍ଧା ଜମ। ସାମାନ୍ୟ ମଉକା ପାଇଲେ ନେଇ ଯାଉଛି ଜୀବନ। ତ୍ରାହି ତ୍ରାହି ଡାକିଲେଣି ଗାଡ଼ି ମଟର ଚାଳକ। ମୟୂରଭଞ୍ଜ ଜିଲ୍ଲା ୪୯ନମ୍ବର ଜାତୀୟ ରାଜପଥର ବାଙ୍ଗିରିପୋଷି ସ୍ଥିତ ଦ୍ଵାରଶୁଣି ଘାଟିରେ ଦୁର୍ଘଟଣା ଥମିବାର ନାଁ ଧରୁ ନ ଥିବା ବେଳେ,ଆଜି ପୁଣି ଘଟି ଯାଇଛି ଏକ ଦୁର୍ଘଟଣା। ସୂଚନା ଅନୁସାରେ ଏକ ପିଆଜ ବୋଝେଇ ଟ୍ରକ ନାସିକ ରୁ କଲିକତା ଅଭିମୁଖେ ଯାଉଥିବାବେଳେ, ଟ୍ରକ୍ ଟି ଭାରସମ୍ୟ ହରେଇ ରାସ୍ତା କଡକୁ ଓଲଟି ପଡିଥିଲା। ଫଳରେ ଟ୍ରକ୍ ଟିରେ ନିଆଁ ଲାଗିଯାଇ ଜଳିବାରେ ଲାଗିଥିଲା। ଖବରପାଇ ବାଙ୍ଗିରିପୋଷି ଏବଂ ବିଶୋଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ କରିବାକୁ ଚେଷ୍ଟା ଜାରି ରଖିଛନ୍ତି। ଅନ୍ୟପଟେ ପରିସ୍ଥିତି ନିୟନ୍ତ୍ରଣ ପାଇଁ ଘଟଣାସ୍ଥଳରେ ପୋଲିସ ମୁତୟନ ଥିବାବେଳେ,ଟ୍ରକ୍ ର ଚାଳକ ଏବଂ ହେଲପର ଙ୍କ କୌଣସି ଖବର ମିଳି ପାରି ନାହିଁ।